يا رجاله عايز المشوره من اهل الخبره راس سدر ولا الساحل الشمالى انا عارف الساحل وبحبه جدآ لاكن مشعارف فى السنين الجايه مع انشاء المحطه النوويه فى الضبعه هيكون ليه اثر سلبى على الساحل كأستثمار ولا ايه وفى ناس نصحتنى براس سدر لاكن انا عمرى مرحتها ولا اعرف هيا كام كيلو بلعربيه لاكن بيقولو ان هيا المستقبل ان شاء الله ياريت تبادل الاراء والنصيحه للافاده وهل الموضوع كأستثمار جيد ولا ايه بارك الله فيكم يا اخوانى
انا بحب العين السخنة جدا
ومش بقبل راس سدر خالص
وربنا يوفقك للخير
الساحل الشمالي طبعا
انا رحت راس سدر وحبيتها جدا بس هو مش بحر هو خليج فالمياه هادية ورايقة وتحفة وفى فالطريق عيون موسى والجبل بتاع العيون الكبريتية ونقطة حصينة من خط بارليف
انما حكاية الأستثمار عالمدى البعيد دى عيزة حد عنده خبرة
اعتقد ان راس سدر والعين السخنة حيبقى ليهم فرصة كويسة قدام
بس راس سدر متاخرة عنهم اوى فاعتقد حتحتاج وقت طويل
لكن فى المقابل حتقدر تلاقى حاجات بسعر رخيص
شوف مطروح من كام سنة الشاليهات كانت بكام ودلوقتى بقت بكام
والله عندك حق في الحيرة لكن نقدر نقول مميزات وعيوب كل واحدة فيهم
مميزات راس سدر
- أقرب مسافه من القاهرة
- تقدر تروحها معظم ايام السنة نظرا لجوها الدافئ في الشتاء
- البحر افضل وهادئ
عيوبها
شدة الحرارة في فصل الصيف وعدم الأستمتاع بجو البحر ونسمة الهواء
مميزات الساحل الشمالي
- جو افضل في الصيف والأستمتاع بنسيم البحر
- قربها من الأسكندرية وفرصة اكتر للفسح الليلية
عيوبها
- ابعد من راس سدر
- استحالة الذهاب لها في الشتاء حيث الأمطار والجو قارس البرودة بالأضافة ان كل الخدمات في الساحل بتقفل بداية من شهر 9
- البحر موجه عالي وغير مستقر لذلك بعض القرى بتعمل بحيرات صناعية زي قرية سيدي كرير ومارينا او حمامات السباحة العذبة ودي موجودة في كل القرى تقريبا
شكرآ لجميع المشاركات بس مازلت فى حيره لغايه دلوقتى معلوماتى عن راس سدر قليله والمسافه من القاهره مجهوله وبرده محدش قالى موضوع الساحل ايه وخاصه بعد قصه الضبعه والمحطه النوويه هل هتضرب الساحل يعنى الناس ممكن تخاف من فكره انها جمب محطه نوويه ولا ايه فين اصوات خبراء الاستثمار
موضوع ان المحطه هتأثر على المنطقه اعتقد انه امر مستبعد لان الشركات اللى مستثمره فى المنطقه دى شركات تقيله اوى ومش هتسمح باى تهديد لمشاريعها الاستثماريه الاهم فى الموضوع الناحيه الماديه هل انت معاك الفلوس المطلوبه علشان تشترى فى الساحل لان راس سدر ارخص بكتير وهى فعلا المستقبل غير انها اقرب بكتير وممكن تروح صيف شتاء هو بس يعيبها انها بعيده شويه عن العمار بس فى المستقبل اعتقد انها هتتعمر جامد اوى وربنا يوفقك ان شاء الله فى الاختيار المناسب .اقتباس:
المشاركة الأصلية كتبت بواسطة ashrafsadany
اعتقد ان فى عروض كويسه فى القرى الجديده الى تحت الانشاء زى مارسيليا 3 وماربيلا ومينا ستار ومرسيليا مقدمه عروض بتبتدى من 150 تقريبآ بلتقسيط والاستلام فى خلال سنتين لان القرى الجاهزة السعر مضروب فى 2
كمتعة ،،،
دي حاجة ترجعلك ،،، الساحل هيصة و قري و حفلات و خروج
بس مش طبيعة خلابة و لا بحر أحمر تحفة زي راس سدر
راس سدر ،،، هدوء و استرخاء و بحر فقط
رأس سدر أقرب للقاهرة و لكن خدماتها أقل بكتير
استثماريا ،،، أنا ليا رأي مخالف
الساحل خلاص عدي ،،، الزيادات بعد كده هتكون الزيادات العادية للعقارات خاصة إن مساحته كبيرة جدا و المعروض فيه كتير
رأس سدر لسه بكر ،،، فأعتقد إن قريب هتزيد جامد يعني بتشتري حاجة رخيصة دلوقتي و ممكن تزيد جامد بعدين
و في نفس الوقت لو استهوتك كمصيف ،،، فهيا شغالة من دلوقتي بس هدوء و استرخاء فقط و تنام من الساعة 9
علي فكرة سمعت إن هيتبني فيها بورتو سدر ،،، تبع عامر جروب زي بورتو السخنة و بورتو مارينا
علي فكرة اللي بينصحوا بالعين السخنة
فالعين السخنة أغلي من الساحل الشمالي و أغلي من راس سدر طبعا
بس للأمانة عامة مستوي القري في رأس سدر اقل من مستوي القري في العين السخنة و الساحل الشمالي إلا بعد القري و الفنادق المميزة
فلو هتشتري اسأل كويس عن الخدمات و شوف شركة تكون ليه سابقة قبل كده و شوف القري اللي بنتها عاملة إزاي