الموضوع: ساوند سيستم للانوس

المشاركة الأصلية كتبت بواسطة عصام غنايم

الموضوع بسيط اوى

مبدائياٌ بتختار كاسيت يناسب امكانياتك ( انا بفضل البيونير لنقاء صوته ووضوح جميع مستويات الصوت فيه ( الكينوود ممتاز فى الترددات الخفيضه ( الدبه او البييس ) وضعيف فى الترددات العاليه ( تربلات او السكسكه ) مكتوم يعنى وعلى عكسه السونى )

وبعد كده

لازم تركب 4 سماعات علشان تسمع الصوت صح

بس ازاى ؟

هنفك فرش البابين اللى قدام ونشيل سماعات الابواب القديمه ونركب سماعات جديده ( انا بفضل البيونير ) ولو وات السماعات عالى فده كويس مش حاجه وحشه ابداٌ

وخلى بالكم الوات المكتوب على السماعات ده وات وهمى نقدر نقول رقم موديل مثلا تلاقى سماعات مكتوب عليها 1000 وات وده كلام مش منطقى لان ال 1000 وات دول استهلاك موتور مكنسه مش سماعه

المهم لما نيجى نجيب سماعات مدوره او بيضاوى نبص على رقم ال rms او رقم الطاقه المستمره للسماعه ولازم يكون الرقم ده اعلى من رقم خرج الكاسيت

للتوضيح

كاسيت مكتوب ان خرجه 50 وات * 4
لازم نجيب سماعات القدره المستمره ليهم 50 وات او اعلى ( ايىٌ كان الوات المكتوب عليهم 400 , 500 )


طيب ده قدام

وراء بقى هنركب ايه

هنفتح فى الكوبسته اللى وراء ونركب سماعتين بيضاوى ويا حبذا لو كانوا دوبل بيس ( المقاس الكبير يعنى )

لو ركبت وراء سماعات مدوره اى كان نوعها مش هتلاقى صوت خالص لان الشنطه كبيره

لو كنت جبت كاسيت بيونير موديل عالى هتلاقى فيه تحكمين مهمين اوى

هاى باس فلتر
وده هنشغله مع السماعتين اللى قدام فيمنع عنهم الترددات الخفيضه ( الدبه ) ويخليهم يشتغلوا فى المدى المتوسط والعالى فقط ( فتسمع صوت نقى وعمرهم يبقى طويل )

لوو باس فلتر
وده هنشغله مع السماعتين اللى وراء فتسمع منهم ترددات خفيضه فقط ( دبه ) ومش هتسمع منهم ترددات عاليه خالص

كده هتلاقى الصوت واضح وجميل ومسموع فى كل انحاء المقصوره بكل نقاء ووضوح

وصدقنى مش هتحتاج كده لصب او gm

جرب وادعيلى

شكرا يا باشا علي المعلومات دي عندي استفسار انا عندي بايونير 2150 وعايز اغير السماعات اللي ورا واللي

علي البابين اية الماركة والموديل وياريت السعر كمان اللي ينفعوا مع الجهاز دة مع العلم اني مش عايز قطع في

الصاج وشكراااا