تحذير من معرض موتور سيتى اللى في شارع النزهة
كان واحد صاحبي عاوز يشترى عربية تويوتا كورولا 2010 كاملة اتوماتيك هاي لاين بفتحة سقف
اتصلنا بكذا معرض منهم المصرية و سمير ريان و اليسر وكانت عندهم اللى هيا تجميع تايوان و كانت بـ 164 الف و ممكن تنزل الى 163 الف و صاحبى مرضاش بالتايواني .
المهم , كلمنا موتور سيتى من اعلان في جريدة الاهرام يوم الجمعة و قال ان عنده برضوا تجميع تايوان و جميع الالوان , بس المفاجأة بقى انه عنده عربيتين و بس ( تجميع ياباني ) بس موديل 2009 و عنده منها لونين فيراني و تركواز و بـ 162 الف
و قال تيجي تحجزوها علشان الناس بتتكلم عليها علطول .
روحنا له في نفس اليوم بعد الشغل و قابلنا العميد / .... ( مدير مبيعات )
و لاقيناه عارض العربية الفيراني في نفس المعرض و بتلمع و زي الفل و تفتح النفس !!
و كان معانا عربون خمسة الالاف جنيه لحين عمل الاوراق المتبقية !! و قال ماشي اتفرجو عليها
صاحبي ابتدأ يتفرج و بيحط ايده بالصدفة على الباب الورانى اللى ورا باب السواق فلقى نقرة بسيطة لا تذكر في طبلة الباب من الناحية الشمال ..
وقالى تعالى بص كده !!
قعدت انا افحص و اتفحص لاقيت انه نقرة غائرة في البوية و شكيت في ان العربية رشه الباب ده !
قلت اتمم على الباقي و نحاول ننزل في سعرها الف او الفين تاني .
لفيت على العربية كلها و جيت من الجنب اليمين و ضغطت على خفيف كده على باكتات الزجاج ,لاقيت اللون الفيراني الاصلي بتاع العربية و سايب حز خفيف حوالى ( 2 ملي ) بطول البابين كلهم و ده معناه ان الجنب كله راشش . ولكن طبعا مرشوش بصنعة وحرفة و اكتشافها صعب للغاية لانك لا يمكن تاخد بالك الا اذا شكيت في موضوع الرش ده اللى جه بالصدفة ..
طبعا بدأنا ندقق في العربية كلها لاقينا ان حباية البرونز بتاعة اللون الفيراني الميتالك مختلفة عن بعضها في مناطق زي السقف و الشنطة و الرفارف .
طبعا ده مش معناها حادثة و لكن قد تكون اتخطبت اثناء الشحن او النقل او كده يعنى , طبعا باقى العربية زيزو و مفيهاش مشكلة .
المهم الراجل حاول يحلف و يقنعنا و يقلنا خدوا اللى لونها تركواز , و لكن مرضيناش ما دام مفيش ذمة و لا ضمير
وكمان الفار لعب في العب و قلنا له هنشوف و نرد عليك .. ومشينا طبعا
اللى عاوز يتأكد اعتقد ان العربية مازالت موجودة لانى شفتها اول امبارح و معتقدش انه باعها و كمان احنا ربطنا انها قاعدة الفترة دي كلها بسبب حاجة زي كده لان في عرف السوق عربية زي كده لو كانت سليمة هتبقى لقطة بإعتبار انها ياباني 100 % و بتعرفها من حاجتين بالمناسبة .علشان لو حد قالك انا عندي الياباني ده
اولا : مكتوب على القايم بتاع السواق انها صنع في اليابان و ثانيا انك بتشوف نسخة من الافراج الجمركى بتاعها ان بلد المنشأ : اليابان وكان الراجل مجهزة و لكن احنا مشينا و نفسنا وقفت منه
آآدى الموضوع