الموضوع: ماكنة حلاقة جديدة من جيليت !

المشاركة الأصلية كتبت بواسطة shnory

مع اني روحت اضرب طاجن الساعه 7 الصبح ولقيت المطعم مقفول

هههههههههههههههههه
ياشنوري ارحم نفسك..طيب بالليل الساعة واحدة ماشي...إنما الساعة ٧ الصبح؟؟!!..إنت حصلك إيه بس...ربنا يسامحني إني عرفتك سكة الطاجن ده...هههههه...خد بالك الإدمان مش مخدرات بس..بعد كده هابقى مضطر أحجزلك في (جماعة مدمنين الطواجن المجهولين ) TAWAGEN ANONYMOUS
حاجة كده زي الـ Narcotic anonymous
وخلي قصة العفريت تنفعك ساعتها

المشاركة الأصلية كتبت بواسطة shnory

هي ليه الناس معترضين علي حلاقه الدقن؟؟؟؟؟؟؟؟؟
ولا هو اعتراض وخلاص وعلشان نعرف ان فيه ناس متدينين اكتر مننا وبيربوا دقنهم سنه
ولا ربايه الدقن حتعز الاسلام
ولا حلاقه الدقن حتقلل منه

بغض النظر سنة ولا فرض .. اللحيه (الدقن) من الفطره .. معنى الفطرة السليمة انك تشوف الصح صح و الغلط غلط.


عن عائشة رضي الله عنها قالت: قال رسول الله صلى الله عليه وسلم : "عشر من الفطرة: قص الشارب وإعفاء اللحية، والسواك، واستنشاق الماء، وقص الأظافر، وغسل البراجم، ونتف الإبط، وحلق العانة، وانتقاص الماء، يعني الاستنجاء" قال الراوي: ونسيت العاشرة إلى أن تكون المضمضة. رواه مسلم.


و عكس الفطرة السليمة .. الفطرة غير السليمة .. و دى اللى بتشوف الغلط كأنه شىء عادى و ممكن كمان تنفر من الصح .. وده مرض اسمه مرض انتكاسة الفطرة و ده له أسباب كتير منتشرة فى مجتمعنا للأسف و له علاج كمان ..

هديك مثال على فطرة سليمة حصل لها انتكاس .. شاب عادى راح اشتغل فى مدينة ساحلية معروفه .. أول ما راح ذهل من منظر البنات اللى على البجر و الخلاعة اللى هناك .. و قعد يقول الناس دى عايشه كده ازاى و أهلها فين .. بعد شهر الموضوع بأه بالنسبة له عادى و بأه بيتكلم و يهزر معاهم عادى .. و بأه لما يشوف بنت محجبه يستغرب شكلها .. ده جاله مرض انتكاسة الفطرة نتيجة الف (التعود على) المعصية.. والأمثلة على كدة كتير .. من المعروف ان اللحية من الفطرة بأحاديث صحيحة كلها .. أنا بتكلم على الفطرة مش على حكم دينى .. يعنى لو كنا نشأنا فى مجتمع كل الناس فيه ملتحين .. كنا هنستغرب جدا لو شفنا واحد مش بلحية .. بالضبط زى لو انت اتولدت و عشت فى مجتمع الناس كلها بتصحى من النوم تحلق حواجبها .. و بعدين جيت فى مجتمع الناس زينا كده .. كنت هتستغرب جدا من شكلهم مع ان ده الطبيعى .. ده بالضبط اللى بيحصل دلوقتى لما نشوف حد بدقن .. عشان ده اللى اتعودنا عليه بالاضافه لعوامل تانيه زى الاعلام اللى شوه لنا منظر أى شخص بلحية و ربط بينه و بين التشدد و التعصب.

السبب التانى: اللحية (الدقن) حكمها ايه؟ لو قلنا الأحكام الفقهية "واجب و مستحب و مباح و مكروة و حرام" .. اللحية أقل قول فيها انها مستحب .. ده أقل قول .. يعنى ايه مستحب؟ يعنى ربنا سبحانه و تعالى اللى خلقك و أنعم عليك و رزقك و فى ناس كتير معندهمش عشر النعم اللى عندك بيحب كده .. ربنا سبحانه و تعالى بيحب شكلك كده .. لأن دى حاجه هو ميزك بيها عن النساء .. الله سبحانه و تعالى لا يستحق انك تعمل حاجة بيحبها؟ لو بنتك أو أمك أو زوجتك قالت لك ربى شنبك أو سكسوكة عشان بحب شكلك كده؟ مش هتعمل كدة؟

السبب التالت: تعال نبص للموضوع من الناحيه التانية .. لو كان ربنا أمرنا اننا نحلق دقننا كل يوم .. كنا هنقول ليه يارب بتشق علينا كده .. انما ربنا عايز ييسر علينا "يريد الله بكم اليسر ولا يريد بكم العسر" .. "لا يكلف الله نفسا الا وسعها" .. انما ربنا عايز ييسر علينا الامور .. وواضح جدا ان عدم حلق اللحية تيسير على الناس.

السبب الرابع: الرسول عليه الصلاة و السلام أمر بحاجات كتير و نهى عن حاجات كتير .. و كل شوية العلم بيثبت ان اوامر و نواهى الدين فيها خير ليك فى الدنيا قبل الاخره .. مثلا السواك .. الشرب على تلات مرات .. عدم شرب الخمر .. عدم أكل لحم الخنزير .. منع الربا و القمار و الميسر .. أكل عسل النحل .. أكل حبة البركة.. و كان فعل الصحابة انهم بيعملوا اللى الرسول عليه الصلاة و السلام بيأمرهم به من غير ما يعرفوا الفائده الدنيوية منه .. و مؤخرا الابحاث العلمية بتبين لنا فوائد القران أوامر و نواهى الرسول عليه الصلاة و السلام من فروض و سنن .. بالنسبة للحية هل هنستنى لما نعرف الفائده الطبية من اللحيه و بعدين نعملها؟ ولا يكون عندنا يقين ان دى حاجة كويسة و اعملها؟ لو بكرة العلم اثبت ان اللحية لها فوائد طبية هنقول اه كويس .. ده الدين بتاعنا بيدل على حاجات كويسة .. لسه هنستنى؟ ولا احنا من الاول متيقنين ان كل اوامر الدين فيهل فوائد دنيوية قبل الاخره.

فَمَنِ اتَّبَعَ هُدَايَ فَلَا يَضِلُّ وَلَا يَشْقَى* وَمَنْ أَعْرَضَ عَن ذِكْرِي فَإِنَّ لَهُ مَعِيشَةً ضَنكًا (123-124) سورة طـه

مَنْ عَمِلَ صَالِحًا مِنْ ذَكَرٍ أَوْ أُنْثَى وَهُوَ مُؤْمِنٌ فَلَنُحْيِيَنَّهُ حَيَاةً طَيِّبَةً وّلنجزينّهم أجرهم بأحسن ما كانوا يعملون .. سورة النحل

دى ثمرة الأعمال الصالحة فى الدنيا قبل الاخرة .. لازم نكون متيقنين ان أى عمل صالح بعمله هيعود عليه بالخير فى الدنيا قبل ما ربنا يجازينا عليه يوم القيامة و العكس صحيح طبعا

أًمْ حَسِبَ الَّذِينَ اجْتَرَحُوا السَّيِّئَاتِ أّن نَّجْعَلَهُمْ كَالَّذِينَ آمَنُوا وَعَمِلُوا الصَّالِحَاتِ سَوَاء مَّحْيَاهُم وَمَمَاتُهُمْ سَاء مَا يَحْكُمُون .. سورة الجاثية (الايه 21)

طبعا جزاء من يعمل السيئات بيشوفه فى الدنيا قبل الاخره .. وده أكيد شفناه كتير فى حياتنا.

دى كانت مجموعة خواطر منى و لو فيها خطأ فانا مسؤل عنه و والله أنا لا أقصد الاساءه لأحد ولا أنكر على أحد .. انما أنا حبيت أقول وجهة نظرى و ربنا يهدينا جميعا لما يحبه و يرضاه سبحانه و تعالى.