الحضرى نخ وجاى مصر بكره ... !!!!! رأيكوا ايه وتفتكروا الاهلى هايعمل ايه

دلوقتى على مودرن سبورت ... الحضرى جاى مصر بكره الساعه 7 بالليل ومعاه احمد سويلم
عصام قابل المحامى الالمانى بتاع حسنى عبد ربه وقالله انا مش هاعرف اعملك حاجه ووضع الاهلى القانونى قوى جداً ولازم تفاوض الاهلى وإداره سيون قالتله احنا مش عايزين نأذيك وحاول تتفاوض مع الاهلى واحمد سويلم قال انه ماخدش فلوس من سيون وانه فضل ينزل بمزاجه بدل ما ينزل غصب عنه

عصام طلع على الموبايل وبيقول انه اخطأ فى حق الاهلى وانه مستعد لتلقى اى عقوبات من الاهلى وانه مش هايحترف فى اى ناد الا بموافقه الاهلى وانه بيعتذر لكل جماهير الاهلى ولاداره الاهلى !!!!!!

لسة سامع دة دلوقتي، بس هو اللي جابة لنفسة ودخول الحمام مش زي خروجة
زمان كانت الناس كلها بتهتف لة بس دلوقتي خلاص صورتة اتشوهت تماماً، واكيد
الاهلي مش عيعديها على خير ،رغم احتياجة لة، انا شايف انة يتوقف لفترة وتوقع علية غرامة مالية كبيرة علشان يكون عبرة لاي لاعب تاني في اي نادي تاني!.

لاعبرة ولا حاجة، بين البايع و الشارى يفتح الله، اتنين بينهم عقد وواحد خالف البنود، يدفع شرط جزائى -عقوبة مالية و ايقاف فى حالة الحضرى- و ينفذ بقية عقده و بعد كده هو حر، ماينفعش نتعامل فى المسائل دى بمبدأ اضرب المربوط يخاف السايب و الأنتقام و الكلام ده، اللعيب مش عبد

لو فعلا صح إنه نازل بكرة يبقى كويس له لأنه كده كده صورته بقت نيله قدام الكل...
خير دليل على كده ماتش الأهلي وحرس الحدود اللي لسه خالص من شوية مالحقش والحمد لله كسبنا 2/0 بس لو حضراتكو ركزتو في كم الشتائم من الجماهير-ده طبعا سلوك غير لائق خصوصا من جماهير زي جماهير الأهلي- بس الناس كرهته..
بس في رأيي الأهلي لو حيرجعه يخليه يلعب بس بعد غرامه تقصم ظهرة بس بلاش العزل عن الملاعب عشان مستواه مايقلش وأنحنا محتاجنله... بس برضو الأهلي ياخود بالله إنه بعد كده يهتم بكل الحراس واللاعبين على حد السواء من غير مايخلي حارس مثلا زي الحضري كأن مافيش غيره وده بيقلل مستوى الحراس الأخرين ... صح وجهة نظري ولا إيه رأيكم؟؟

ومين اللي قال انة عبد دة كان ملك في الاهلي، ولو كل لاعب عاوز يسافر منة لنفسة كدة
مكانش هيبقى في لاعبين في مصر وكلة هيعمل زي عصام ومن قبلة ابراهيم سعيد.

انا اعتقد الحل الامثل ... غرامه ماليه محترمه ويقعد احتياطى لآخر السنه لأن أمير برضه لازم ياخد فرصته ... الراجل بقاله 5 سنين وللا حاجه ساكت مافتحش بقه

وممكن آخر السنه يإما يجيله عقد احتراف محترم او يكمل مع الاهلى

للأسف الاهلى دماغة هى هى ..هايفضل انة ممكن يخسر الدورى على انة يلعبة .

الاهلي مؤسسة ديموقراطية اعتقد انهم ح يعطوا الخيار للحضري !!
اما انهم يعلقوا رأسه علي باب النادي اللي عند الاوبرا ... أو يعلقوها علي الباب اللي عند الكورنيش
وهو اللي يختار

شكله حيترؤ لما يجي.. بس هو يجي...

انا اعتقد انه مش هيعرف ينزل من الطيارة المرة اللي فاتت الناس راحت تستقبلة بالورد

المراتي هيستقبلوه يطوب وشباشب

ومفروض انه يكون عبرة لغيره
1- يدفع مبلغ مالي كبير
2- يجلس لاخر الموسم احتياطي من غير لعب
3- يضيعوه عليه فرصة السفر والاحترا في اي نادي اجنبي
4- ينزل الاستاد وناس تستقبله بطوب علشان تفشي غلها

اقتباس:

---

المشاركة الأصلية كتبت بواسطة aif

الاهلي مؤسسة ديموقراطية اعتقد انهم ح يعطوا الخيار للحضري !!
اما انهم يعلقوا رأسه علي باب النادي اللي عند الاوبرا ... أو يعلقوها علي الباب اللي عند الكورنيش
وهو اللي يختار

---

هههههههههههه
وأنا معاك فى الرأى ده

صحيح الأهلى -غير الفرق الأخرى - بتهتم بالموقف وما وراء الموقف ، يعنى الأولوية مش هتكون للناحية المادية أبدا ..

يعنى هو أكيد هيتشمط ماديا ومعنويا

وتخيلوا لما ينزل فى أول ماتش الجماهير هتستقبله إزاى !!
دى كفاية (إذا كان يهمه الجماهير)

و الله لو عمل ايه .. خلاص الناس علمت عليه

انامفهمش في الكورة اوى على فكرة غير انى يظييييط لنا مصر بتكسب بس ليه تعليق بسيط على موضوع الحضري دة

الواحد لو شغال في شركة و ناجح اوى فيها مثلا شركة قطاع عام و مقدرينه اوى فيها و بيحترموووه و مرتبه كويس بس جاتله فرصه حلوة اوى في شركة multinational و هيسافر و يشوف بلاد تانية و يتعلم techniques مختلفة و حياة مختلفة و مرتب احسن ..فيها ايه انه يستغل الفرصة دى ؟؟؟؟؟؟؟؟؟

ساعة لما حسام و ابراهيم سابو الاهلى و لعبو للزمالك الدنيا قامت و قعدت و اتهموهم بالخيانة العظمى !!!!

و انا جالى ايميل يتهم عصام الحضرى بالكفر و العياذ بالله و معرفش صورة لمراته و هي من غير حجاب عشان قلعت الحجاب بقي لما راحت سويسرا و تحتها تعليقات سخيفة و منحطة

مش عارفة بس حاسة انه كل واحد ادرى بمصلحته و كل واحد حر في حياته و كل واحد يتحمل مسؤلية تصرفاته و اظن دي رغبته في الاحتراف بره و نفسه يعمل كدة فخلاص يا جماعة مش هعلقله المشانق

سيدتي onna هو ليه الحق إنه يحترف وغلطتة الأهلي إنهم عارضو ده بحجة إن العرض قليل على قيمة الحضري ... بس الغلط الأكبر اللي هو قام بيه وإنه تجاهل إرتباطه بالنادي الأهلي سعيا للماده ....وربنا يهدي ...

عذرا لجميع الأراء
و لكني كنت اتمنى ان يستطيع الحضري ان يكمل ما بدأه
يا جماعه القمع شيء وحش و اللي عمله الحضري كان غير محسوب
و يدل على الدافع القوي
و الدافع مش مادي بالدرجة الأولى لأنه كان مليونير هنا
يمكن فيه شعور بالقهر أو الغبن (لأن اللعيب بيعامل على انه سلعة)
الراجل غلط في حق نفسه اولا قبل اي احد أخر
فبلاش نكون جميعنا جلادين

مش حكاية جلادين هو طبعا من حقه يحترف ومن حقه على ناديه يديله فرصته .. بس الموضوع كله إننا مستائين إنه عمل كل حاجه بدماغه زي مايكون بيقول إخبطو راسكوا في الحيط ..

انا ليا سؤال لكل اللى مؤيدين الحضرى و حقه فى الأحتراف
هو مش فيه حاجه اسمها احترام العقود ؟
دا مضى عقد لمده 3 سنين و نصف و قبض قيمه العقد و بعدين هرب ....... دا عادى و لا ايه النظام؟
عايز يلغي عقده يقف زى الرجاله و يعلن انه ماشي ماشي

الحضرى و معظم لاعبي الكره و الفنانين ما يستاهلوش كل الهاله الي معمولة حواليهم
احنا الى عملناهم و مكبرينهم قوي
الحضرى او غيره لا يستحقون كل هذا الكلام عنهم .... لكن انا اتخنقت من كل الى لا يعترف بأهميه احترام العهود والى بيقول يخترف علشان يأمن مستقبله .... 5 مليون جنيه في السنه ومش كفايه ؟؟؟؟؟

صباح الفل

اقتباس:

---

المشاركة الأصلية كتبت بواسطة achrafhendawy71

انا ليا سؤال لكل اللى مؤيدين الحضرى و حقه فى الأحتراف
هو مش فيه حاجه اسمها احترام العقود ؟
دا مضى عقد لمده 3 سنين و نصف و قبض قيمه العقد و بعدين هرب ....... دا عادى و لا ايه النظام؟
عايز يلغي عقده يقف زى الرجاله و يعلن انه ماشي ماشي

الحضرى و معظم لاعبي الكره و الفنانين ما يستاهلوش كل الهاله الي معمولة حواليهم
احنا الى عملناهم و مكبرينهم قوي
الحضرى او غيره لا يستحقون كل هذا الكلام عنهم .... لكن انا اتخنقت من كل الى لا يعترف بأهميه احترام العهود والى بيقول يخترف علشان يأمن مستقبله .... 5 مليون جنيه في السنه ومش كفايه ؟؟؟؟؟

صباح الفل

---

يا سيدي بشويش علينا بس :)

هوا هرب راح الواق الواق
العقد فيه شرك جزائي و تعويض و ده جزء من العقد
لأنه ليس ارتباط ابدي و هوا كان عايز يلحق الموسم هناك لأن الأهلي كان هايماطل لو عمل فيها راجل و أنا نفضها

و أنا على فكرة لا بحبه و لا مقتنع برضه بكل الهالة اللي حواليه دي
بس ده رأيي في الموضوع
صباح الفل و الورد :)

ياجماعة انا شايف إن الحضري معاه حق الراجل داخل عال 35 وعايز يوصل للعالمية بدل مايطلع ويدفن ومحدش سمع عنه بره
وهو لو مكانش الشعب المصري بيحبه مكنش عمل الضجة الكبيرة دي

اللى يركز مع الحضرى وهو بيتكلم يعرف اد ايه هو خاوى فكريا ومن هنا كان تصرفه الاحمق من البداية .. هو حارس مرمى جيد وبيرقص وسطه اىنعم لكن تفكيره ضحل وعلى قده حتى لما كش ملك كش بطريقة عبيطة لاتحفظ له ماء وجهه ومن المتوقع بعد الاحداث اللى حصلت انه يعيش فى حالة من انعدام الوزن والتوتر وعدم التركيز فى الملعب -لو حتى لعبوه-وده من الممكن يجبره على انه يبطل كورة

اقتباس:

---

المشاركة الأصلية كتبت بواسطة emadkamel

انا اعتقد الحل الامثل ... غرامه ماليه محترمه ويقعد احتياطى لآخر السنه لأن أمير برضه لازم ياخد فرصته ... الراجل بقاله 5 سنين وللا حاجه ساكت مافتحش بقه

---

انا معاك فى الراى دة

انا نفسى اكون فى المطار اشوف بس الناس هاتقابله ازاى

فيه اسلوبين فى الحياه

فيه اسلوب الفلاح المصرى بتاع إمشى سنة ولا تخطى قنا (ترعة)

وفيه الأسلوب الأمريكى بتاع no risk no fun

الأسلوب الأول انجازاته قليلة وبطيئة لكن شبه مضمونة

الأسلوب التانى لما بنجز انجاز واحد بيرفع صاحبه فى السماء وبرضه لما بيفشل بيجيب صاحبه الأرض

والحضرى من الأول قبل على نفسه انه ياخد المخاطرة، قد يكون بفضل تفكيره هو الشخصى وقد يكون بفضا تأثير سمسار اللاعبين

وللأسف المخاطرة فشلت والحضرى راجع وربنا يستر على اللى هيحصل له

انا بس كل تعليقى على الموضوع انه خد مخاطرة بالكثير من مستقبله من أجل عرض ما يستاهلش، لا اسم النادى ولا المقابل المادى يتساوى مع تاريخ واسم الحضرى وتاريخ واسم النادى اللى الحضرى خارج منه

اقتباس:

---

المشاركة الأصلية كتبت بواسطة DODY

اللى يركز مع الحضرى وهو بيتكلم يعرف اد ايه هو خاوى فكريا ومن هنا كان تصرفه الاحمق من البداية .. هو حارس مرمى جيد وبيرقص وسطه اىنعم لكن تفكيره ضحل وعلى قده حتى لما كش ملك كش بطريقة عبيطة لاتحفظ له ماء وجهه ومن المتوقع بعد الاحداث اللى حصلت انه يعيش فى حالة من انعدام الوزن والتوتر وعدم التركيز فى الملعب -لو حتى لعبوه-وده من الممكن يجبره على انه يبطل كورة

---

i agree with point

عصام الحضري

تلقى النادي الأهلي يوم السبت خطابا من الاتحاد الدولي لكرة القدم (فيفا) يطالبه فيه بإرسال البطاقة الدولية الخاصة بعصام الحضري إلى نادي سيون السويسري.

وأعلن الأهلي أن الاتحاد الدولي طالبه بتوضيح أسباب رفض إرسال البطاقة الدولية إذا ما لم يوافق النادي على إرسالها.

وقال النادي إن خطاب الفيفا كان مرفقا به صورة من تعاقد الحضري مع سيون وطلب من حارس المنتخب المصري باللعب للفريق السويسري، إضافة لتفاصيل المبالغ المالية التي تقاضاها عقب انتقاله.

وتعقد لجنة الكرة اجتماعا طارئا لمناقشة كيفية الرد على خطاب الفيفا، خاصة بعد عودة الحضري إلى مصر يوم الجمعة.

وكان الحضري قد سافر سرا إلى سويسرا من أجل الانضمام لسيون، معتمدا على البند الذي يتيح لمن تخطى الـ28 من العمر وانقضى أكثر من موسمين على آخر عقد وقع عليه أن يدفع ما يوازي ما تبقى منه ليفسخ ارتباطه وينتقل لأي ناد من دون موافقة ناديه الأصلي.

ومن جانبه، أشار مصدر مسؤول في النادي الأحمر إلى أن خطاب الفيفا والورقة التي يطالب فيها الحضري باللعب لسيون يؤكدان تلاعب حارس مصر بالأهلي مجددا، إذ تتعارض المستجدات مع اعتذاره في وسائل الإعلام وندمه على السفر من دون علم الإدارة.

وسبب سيون عبر موقعه الرسمي نبأ عودة الحضري إلى مصر بأنه ينهي إجراءات انتقاله للنادي السويسري، في حين أكد الحضري عقب وصوله على أنه أغلق صفحة الاحتراف في حال رفض الأهلي للعرض الذي تقدم به النادي السويسري.

وقال الحضري: "أبلغت سيون أن من يريدني عليه الدخول من باب الأهلي، لأن القرار الأول والأخير فيما يتعلق بمستقبلي سيكون لهم فقط".
----------------------------------------------------------

الحكاية ايه؟