تصدق بالله
انت غلطان انك استنيته ساعتين
عرض للطباعة
تصدق بالله
انت غلطان انك استنيته ساعتين
حضرتك طيب اوي ... كنت عايز تكسر الأزاز و تنزل الهاند و ترميله 100 جنيه
دا بعد ما تطلع عربيتك تولع له في عربيته
اشكال عايزة الحرق والله العظيم و ما تستاهلش تركب عربيات ... يا رب النعمة تزول منهم طالما معطلين الناس و واقفين حالهم
نفس الموقع حصلي
واحد محترم هو و مراته قفلوا عليا وفضلت واقفه لمدة ساعه
و كنت راكنه قدام سوبر ماركت اولاد رجب و قلت اكيد دول جوا السوبر ماركت و قلت للسايس ادخل و نادي عليهم و خلي موظف في السوبر ماركت ينادي عليهم
طبعا البيه المحترم هوا و مراته كانوا سامعين بس ماخرجوش الا لما خلصوا شرا حاجتهم
و لما خرجوا ولا حتي عبروني بكلمة اسفين و لا كانهم عملوا حاجه
لدرجة اني فضلت باصلهم مش مصدقه ان فيه ناس تنحه كده و ما عرفتش اقول لهم كلمة واحده
الموقف دة حصلي بالظبط و انا في الشغل راكنة عند سيتي ستارز صف اول ، و انا في الشغل عيني وجعتني جدا و احمرت و ورمت و بقيت تدمع بشكل فظيع فاستاذنت و مشيت عشان اروح للدكتور و انزل الاقي واحد منه لله بجيب شيروكي راكن صف تاني و شنطته في نص عربيتي و اكيد مش هادور عليه في سيتي ستارز
و الحتة دي مافيهاش ولا وابين ولا اي حد غير الامن بتوع سيتي ستارز و مين اصلا اللي هايزق جيب شيروكي يعني؟ لولا واحد سواق تاكسي ابن حلال كان قاعد في عربيته مستني حد و شافني بلف حوالين نفسي و عنيا عمالة تدمع جه يقولي حضرتك بتعيطي ليه قلتله مابعياطش انا عيني واجعاني و مش عارفة افتح اصلا في الشمس و الغبي دة قفل عليا فراح مشاور لسواق تاكسي كمان و نده لسايس كدة كان واقف بعيد و شالو عربيتي انا من ورا و اعدو يزحزحوها لحد ما ضهرها بقى طالع لبرة و بعدين السواق دة خد مني المفاتيح وقالي انا هاطلعهالك ماتقلقيش و اعد ياعيني ورا قدام ورا قدام يجي 10 مرات لحد ما طلعها بضهرها
و انا عمالة ادعي على بتاع الشيروكي
متهيألي إن الناس كلها مجتمعه على إن أهم حاجه....إن البني آدم اللي قفل عليك.لما ييجي وتلاقيه زوق...بتنسى الموقف تمااااما..و مش بيفرق معاك خاااالص..
إنما لما تلاقيه تنح..وبارد وسمج..بتحس بضيق شديد..إنك سبته يمشي من غير متقوله أي كلمتين كده ..يحرقوله دمه..
انا هنا في السعوديه و كان واحد راكن قافل على عربية الوالد بس كان محترم و كتب رقم موبايلوا على ورقه و حطها في المساحات يدوب والدي كلمه جاله جري و قعد يعتذر مده مع ان والدي مقالوش حاجة بصراحه انا قدرته على احترامه و ادبه
يا جماعة انك تنزل وتلاقي حد قافل عليك ده بأه العادي الأظرف من كده تنزل ما تلاقيش العربية خالص لأ والأظرف انك اصلا كنت راكن في الجراج
الريس ربنا يطولنا في عمره قرر يعدي من شارعنا فا البوليس جه الساعة 4 الفجر وشالوا العربيات من الجراج بالونش وارمي في اي حتة
قعدت من الساعة سبعة الصبح انا وواحد صحبي للساعة واحدة الضهر بندور عليها
لأ واللي كان هيشلني اني قعدت انا وصاحبي نزنق علي الونش لحد ما وقف نزلتلوا لقيت عقيد شرطة قولتله العربية بتاعتي كانت في الجراج والونش شالها ممكن بس حضرتك تساعدني اعرف هي في انهي حتة
راح ماسك اللاسلكي وبابتسامة عريضة علي وشه وقال باللفظ : نداء عام اخوة مواطنون يستفسرون عن أماكن سياراتهم برجاء الأفادة
واحد رد عليه وقالوه في المناطق المحيطة يا افندم
طبعا المناطق المحيطة ديه شوارع مدينة نصر كلها
صاحبي مسكني قبل ما انهور ونبقي مش بندور علي العربية بس وقالي اهده كده وبإذن الله هنلقيها
والحمد لله لقيتها بعد 6 ساعات تدوير
كنت قربت اتشل
معلش
الموقف رخم
حلها زي ما عملت
أو كنت دورت علي صاحب العربية اللي وراك أو قدامك يخرجك
من غير تريقة والله بس الموقف يفطس من الضحك خصوصا الرد اللي جه في اللاسلكي
في المنطقة المحيطة يا أفندم
المفروض كنت ترد وتقول ( في تيييييت يا إبن التييييييييت)
والله لن تقوم لنا قائمة
وحنفضل في قاع المقياس الحضاري دا إذا كان عندنا حضارة أصلا
والسلام ختام