ام بتعلم بنتها قلة الادب و البجاحة ... هي الدنيا جرى فيها ايه؟؟

**Donzi** · 31-07-2010 05:55 AM

موقف مستفز جدا حصل مع والدتي و لما حكتهولي حسيت ان خلاص الاخلاق و القيم و الاحترام كلها حاجات اصبحت نادرة و في انحدار مستمر في مصر للاسف من سيء الى اسواء

كنا في احد النوادي الرياضية و والدتي دخلت الحمام عشان تتضوا و كان في ست كبيرة اوي في السن واقفة هي كمان بتتضوا تقريبا 70 سنة او اكتر ( لابسة عباية و طرحة كبيرة اوي و شكلها طيب و محترم جدا جدا ) و جت بني عندها 15 سنة وقفت جنبهم بتغسل ايديها و كانت لابسة بلوزة طويلة و عليها حزام على الوسط و فكت الحزام عشان تظبطه على وسطها كويس

فا الست الكبيرة دي قالتلها بكل هدوء و رقة : طب و لازمته ايه الحزام يا حبيبتي دة انت ما شاء الله محجبة و شكلك محترم و الحزام مالوش لازمة والله من غيرو البلوزة واسعة و شكلها محترم اكتر و المسلمات المفروض تكون ملابسهم فضفاضة ، ربنا يهيكي يا حبيبتي
البنت خلصت اللي كانت بتعمله و لبست الحزام عادي جدا و خرجت جري و دقيقة واحدة و جت مامتها و من على باب الحمام و بصوت عالي جدا و اسلوب اقل ما يقال عنو انو زبالة

محدش ليه دعوة ببنتييييي انا بنتي ليها اهل مش جاية من الشارع و تلبس اللي هي عاوزاه ، مين هنا اللي بيكلمها ولا بيقولها تعمل ايه و ماتعملش اييييييه
فاردت الست الكبيرة دي و قالتلها برضو بكل هدوء : ايه يا بنتي بس فيه ايه انتي زاعلانة ليه انا اللي كنت بكلمها بقولها نصيحة لوجه الله دة انا زي جدتها يعني

الرد بنفس الاسلوب الوقح:
و انتي مالك بيها اصلا ما تخليكي في حالك هي كانت بنتك انتي ولا من بقية عيلتك انا بنتي محدش يكلمها و محدش يعدل عليها و محدش ليه دعوة بيها ان شاالله تلبس مايوه انتو مالكووووووو و خدت بنتها و مشيت وهي بتبرطم

والدتي قالت للست الكبيرة معلش يا حاجة متزعليش نفسك دي واحدة ماتستهلش النصيحة حتى ولا ينفع يترد عليها من اصلو اذا كانت الكبيرة مش متربية الصغبرة هاتجيب الاخلاق منين ؟؟

هو حالنا وصل للدرجة دي ، الست بتعلم بنتها البجاحة و قلة الذوق و عدم احترام الاكبر سنا و الصوت العالي و... و... و.... و اللي يغيظ ان مامة البنت دي محجبة !!!!!!!!!!!!!!!!!!!!!!!!!!

.

**yahiahelaly** · 31-07-2010 06:19 AM

للأسف معدتش الحجاب يدل على الالتزام والتدين بقى مظهر او مجرد طلب بيطلبة الاهل والبنت بتنفزوه

**SkyBird** · 31-07-2010 06:20 AM

من تدخل فيما لايعنيه سمع ما لا يرضيه

**mahamedaraby** · 31-07-2010 06:36 AM

نعيب الزمان وما للزمان عيب سوانا

ولا تضايق نفسك الست نصحت البنت ومتقبلتش النصحيه

هما تفكيرهم كده شايفت ان الست لما نصحت بنتها قللت منها لا سمح الله

فيه ناس شايفه كده ان الحجاب مجرد قطعه قماشه تغطى الراس بس
مش مهم الاخلاق مش مهم اللبس ضيق او مسقطه البنطلون او بادى ضيق مش مهم اى حاجه تانيه

مستنى من دول ايه

الرسول لما كان بينصح اهل قريش كان بيتقابل بالسوء وصبر

**M.Radwan** · 31-07-2010 06:37 AM

المشاركة الأصلية كتبت بواسطة skybird

من تدخل فيما لايعنيه سمع ما لا يرضيه

هو ده اللى جايبنا ورا
الأمر بالمعروف والنهي عن المنكر فرض عين على المسلمين جميعا،

**elfashn** · 31-07-2010 06:45 AM

المشاركة الأصلية كتبت بواسطة skybird

من تدخل فيما لايعنيه سمع ما لا يرضيه

من رأى منكم منكرا....

**Donzi** · 31-07-2010 07:09 AM

المشاركة الأصلية كتبت بواسطة skybird

من تدخل فيما لايعنيه سمع ما لا يرضيه

حضرتك شايف ان توجيه نصيه بسيطة زي دي من ست عمرها 70 سنة لوحدة 15 سنة يعني حفيدتها تقريبا يعتبر تدخل فيما لا يعنيها !!!! دة على اساس اييه

على اساس ان هي كانت بتحاسبها ولا بتبهدلها ولا بتوبخها ؟؟؟ دي مجرد نصيحة يا تاخد بيها البنت يا ماتخدش

والله موقف مشابه حصل مع اختي في احد المساجد واحدة نصحتها بالنقاب و فوائده و... و.... و ما كان من اختي الا انها سمعت الكلام للاخر و قالت للست جزاك الله خيرا على النصيحة و هافكر فيها ان شاء الله و شكرا جدا

لكن ماقلتش بقى دي بتدخل فيما لا يعنيها ووقفت تشرشح لواحدة في سن والدتها عشان بتنصحها لوجه الله