المشاركة الأصلية كتبت بواسطة shnory
بصوا يا جماعه
احنا بنتعامل كاننا اخوات ومتكبروش الموضوع
اللي عاوز يروح يروح
احنا مش حنقول للناس يصرفوا فلوسهم ازاي
دي راحتهم وحريتهم
وانا مقتنع تمام الاقتناع ان اللي رايح يدفع حتي لو 7000 جنيه في حفله نص ساعه
دي راحته ودي فلوسه
هو مش واخد فلوس من ايتام ولا زكاه مال ورايح يصرفها
احنا وجه اعتراضنا انكم اخواتنا الصغيرين او الكبار علي حسب اعماركم
وانكم قدوه لناس تانيين
ممكن حد من مدعي الروشنه ومدمنيها يروح يسرق مثلا علشان يروح الحفله دي
لانه عاوز يبقي في مستوي الناس اللي رايحين ويبقي روش ومش اقل من اصحابه
-ممكن يكون في الحفله حاجات مجتمعنا مش بيقبلها زي خمور او اختلاط بشكل غير اخلاقي
ومن خوفنا عليكم بنحاول نقولكم متروحوش
بمناسبه التشبيه بالليله في فندق
اللي بيدفع كتير في الفندق فهو واحد معتود علي مستوي معين في عيشته وفي الرفاهيه وميقدرش ينزل عنه
انما مش حيروح يسمع دي جي ويدفع مبلغ كبير فيه
لان ده العادي بتاعه كل ما بيروح فندق
انما مش ده العادي بتاعنا كل ما نسمع دي جي او مغني او ايا كان نوع المزيكا
كل واحد حر في حياته طالما مش بيضر حد
بس برضه يشوف ويحاول يفكر ان كان اللي بيعمله صح ولا غلط
وفي الاخر لو صح فهو لنفسه مش لينا
ولو غلط فبرضه لنفسه مش لينا
اتمني ان الناس تهدي شويه وتفكر
وكل سنه وانتم طيبين رمضان علي الابواب