الموضوع: أسوأ يوم في حياتي في أسوأ توكيل في العالم... المقطم

المشاركة الأصلية كتبت بواسطة josephedward

أولا أنا محروق دمي فا هابعبع بكلام كتير أرجو ماتزهقوش...
يوم الأحد اللي فات كلمت المهندس حسام مصطفى(توكيل رينو المقطم - مهندس الاستقبال) وقلتله انا عايز اعمل صيانة ال 10.000 أجي إمتى عشان جيت قبل كده وانا حاجز واتلطعت في الطابور زيي زي أي حد... قاللي بكره 8 الصبح
وقد كان... وصلت 8 صباحا بالدقيقة...
الصورة: 3 سيارات أمامي... فلوانس الأولى ثم لوجان ثم كليو سايقاها واحدة ثم أنا...
نزلت من عربيتي ورحت للأستاذ حسام سلمت عليه وقاللي هي فين قلتله نمرة 4 دي قاللي كويس جدا...
رجعت عربيتي تاني... تحرك الطابور بسرعة بسبيا... المهم جه دوري ... بص عليها ودار الحوار التالي:

انا: هو ايه اللي هايتم بالضبط
هو: تغيير زيت وفلتر زيت
انا: طب ينفع اظبط زوايا كمان؟
هو: الاسبوع ده كله مافيش زوايا عشان بنجدد الورشة... بس هاحاول أعملهالك
انا: تمام... يا ريت... هايتكلف كام كل ده
هو: 450 كله على بعضه
انا: هاتخلص امتى ؟
هو: (بص في الساعة لقاها 8:30 ) بالكتير 12 الظهر
انا: ماشي

دخلت الصالة المكيفة... كان فيه 4-5 بني أدمين غيري...

شويه والتليفزيون اشتغل و كان فيه فيلم غريب مالوش ملامح على MBC2
المهم، شوية لعب في الموبايل لغاية مابقى Battery Low... بدأ فيلم عن قصة حياة بروس لي... والضرب اشتغل من هنا والناس كلها اتسمرت قدام التليفزيون... شوية اعجاب بالأكشن وشوية سخرية من انه ازاي كان الحاجات دي زمان بتعجبنا ...
المهم تجاذبت أطراف الحديث مع راجل حنبي... من شبرا ومعاه لوجان نبيتي فول (مش بتاعته) وصاحبها خبط بطن العربية والغيارات بتدقر... وهو جايبهاله التوكيل...
المهم حكينا شوية والفيلم خلص وهو قام يستلم عربيته وانا قاعد !!!!
الساعة الآن : 11:15

خرجت من التكييف على عيني!!! رحت لغاية بوابة الورشة لقيت عربيتي مرفوعة في السما ! قلت كويس شغالين فيها... جه واحد ببرميل مربع فوقه قمه مربع ووقف تحتها.. فتح الطبه وفي ثواني الزيت نزل... ربط ... نزل ... حط الزيت الجديد... تمام.

الساعة الآن : 11:20 !!!!!!!!!

رجعت الصالة لأن الجو ولعة وقلت كلها دقايق ويندهوا عليا ... (لكن هيهات !!!!!)

الساعة الآن: 2:00

خرجت أدور على الأستاذ حسام... لقيت موتوسيكل فضي مرعب... والتوكيل كله واقف بيتفرج عليه وماحدش بيشتغل... ماقاطعهمش غير واحد معاه فلونس ملطوع ومحدش معبره ودار أمامي الحوار التالي:

صاحب الفلونس: انا بقالي ساعة ملطوع ومحدش معبرني... مش هانخلص النهاردة ؟؟ دي كلها صيانة 5000
الأستاذ (راجل طوييييل وأبيضاني وحالق زيرو ومحترم جدا) : يافندم ماتزعلش نفسك دفيفة وكله يكون عندك
صاحب الفلونس: كل ماكلم حد يقولي ثواني باشوف الموتوسيكل ؟؟؟ انا ممكن أكلم رينو واخربلكوا الدنيا وييجوا يقلبولكوا التوكيل ده ويعملوه من الأول وجديد
- - هنا بدأالجميع في التوتر وسابوا الموتوسيكل وبدأوا في التوجه للفلونس، مع الاحتفاظ بخطى هادئة عشان برضه مايفتكرش انه خوفهم !!! --
الاستقبال: فيها ايه ؟
صاحب الفلونس: فيها قيب الفلوانس اللي أعلنتوا عنه... دواسة البنزين مابتسعفنيش... ممكن أكبس مرة واحدة ماتسحبش...
الاستقبال: احنا ما أعلنناش عن أي عيوب
صاحب الفلونس: بس الناس كلها قايلة كدة
الاستقبال: (كلام كتير مجمله ان انت مابتعرفش تسوق)
صاحب الفلونس: انا باسوق رينو من 1970 ومابركبش غيرها... !!!! مش هاتعرفني العربيات عامله ازاي !
تدخل الأستاذ الطويل المحترم... وهنا انا زهقت ودخلت للتكييف تاني...

الساعة الآن : 2:30

خرجت أشوف الموضوع إيه... لقيت الأستاذ حسام قلتله إيه النظام ؟ قاللي اتقل بس باحاول أخلصلك موضوع الزوايا ده

سكتت

الساعة الآن 3:00

مش طايق نفسي لكن لسة ماتعصبتش (انا صعب جدا اتنرفز بسهولة)
ايه يا باشمهندس (وقد بدأت أشك في كونه باشمهندس أصلا)
هو: أسل وهم بيجربوها لقيوا فيه تقل في الغيارات...
انا : تقل إيه ؟ مافيش أي تقل عندي في الغيارات ...
هو : بس هايشوفوها وهاقوللك على طول...

الساعة : 3:30

خير يا باشمهندس ؟؟؟

روح استلم...
رحت الساحة بعد ما دفعت واخدت الإيصال... لقيتها منورة من التراب... مش مشكله هاغسلها... ركبت ، دورت، جبت أولاني ..... بارفع دبرياج.... مابتطلعش... أرفع تاني ... مابتطلعش... رفعت نص الدواسة بدأت تتحرك !!!!! نعم ؟؟؟؟ إيه ده .؟؟؟؟؟؟؟؟؟؟؟؟؟؟؟؟؟

ندهت الواد اللي بيسلم العربيات قلتله هم لعبوا في واير الدبرياج ليه ؟؟؟ قاللي وريني أمر الشغل ... بص فيه ... قاللي : آآآآآآآه العربية دي عايزة جير بوكس ! قلتله نعم ؟ جير بوكس بعد 10.000 ؟؟؟ ليه ان شاء الله ؟؟؟ انا أصلا ماشتكيتش من أى حاجة في الغيارات هم يلعبوا في واير الدبرياج ليه ؟؟؟ قاللي طب ثواني.... وراح ناحية الورشة وسقت وراه....
رحت كان دخل وماشفتوش... 10 دقايق طلع واداني الورقة وقاللي : لأ لأ دي عربية تانية خالص !!!
ندهت الأستاذ حسام...
هو : فيه حاجة ؟
انا : ارتفاع الدبرياج ده مش بتاعي... مش دي اللي متعود عليها !
هو : محدش جه جنب الدبرياج
انا : اركب وسوق...
هو : (ركب وطلع قدام ووقف) ماهو كويس أهو... ماله
انا : كويس ليك . انت أول مرة تسوقها... لكن دي مش بتاعتي... مش ارتفاع دبرياجي ده !!!
هو : بس على فكرة ده الصح
انا : صح ولا غلط.. لعبوا فيه ليه
هو: على فكرة ماحدش لعب في الدبرياج.... اللوجان بالذات فيها نظام ان لو لعبت في الدبراج العصاية دي (وبيشاور على الفيتيس) تقف خالص وماتشتغلش...
انا : ده اللي هو ليه يعني ؟؟؟ من كتر التكنولوجيا اللي فيها ؟ دي حتى هاف أوبشن وموتور بقاله 100 سنة (نرفزني لدرجة اني أعيب في عربيتي)
هو : بس كدة الغيارات أخف والمارشيدير كان بيعض ودلوقتي مابيعضش...
انا : (منتصرا) طب جربه كده !
هو: (خخخخخخك) (خخخك) (خخك) <بعد رابع مرة دخل من غير مايعض >
انا : هاه ؟؟؟ ايه رأيك ؟؟؟
هو: ماهو مابيعضش أهو...
انا : يعني وانا باركن أجيب قدام وأجيب ورا أربع مرات ب 3 عشات عشان الرابعة ماتعضش ؟؟؟ (وهنا كانت القشة اللتي قصمت ظهر البعير)

انا : انا اصلا طلبت ظبط زوايا في صيانة ال5000 واشتغلتني وظبطتها أي كلام وعديتها.... قلتلي في ال5000 هاعمللك عضة المارشيدير وانا أصلا ماشتكيتش منها عشان انا عارف حلها وقلنا ماشي و ماظبتهاش وعديتها... جاي النهارده تلطعني 7 ساعات وانا مش من القاهرة وورايا 100 حاجة عاى حس انك هاتعمللي الزوايا اللي انت أصلا عاملهالي أي كلام المرة اللي فاتت وفي الآخر ماتعملتش برضه رغم انك قلتلي عملتها... وكمان اللطعه بسسب واحد أهبل افتكر ان عضة الدبرياج سببها الواير قام لاعب فيه الناصح ... ماكانش حد غلب... يعني كل الناس مابتدوسش دبرياج كويس ؟؟؟ وفي الآخر جاي تشتغلني وتستعماني وتقوللي قال إيه الواير لو اتلعب فيه الفيتيس مايشتغلش ؟؟؟

هو : طب سيبهالي...

بعد 10 دقايق ...

خرج بالعريبة... وقاللي جربها.. ركبت جربتها... لقيت الدبرياش رجع زي ماكان... قلتله يعني اللي لعب فيها رجعها !!! كان لزومه إيه ال*)&^&^ من الأول في حاجة انا أصلا ماشتكيتش منها !!؟؟

وأخدت العربية ومشيت من غير سلام ولا كلام... وانا مكتئب على الآخر وباسب والعن اليوم اللي جيت فيه توكيل المقطم... وقررت بعد كده أروح العبور وهي أصلا كدة كدة أقربلي بس انا عملت حساب للمهندس اللي تأكدت الآن انه مش مهندس...
ودي أول خطوه اني ابلغكم باللي حصل... الخطوة اللي جاية حماية النستهلك وبعدين ربنو فرنسا !!!
يا يانتوا يا مصريين لغاية ماتبطلوا تفتوا وتتعلموا تقولوا معرفش !

كان الله فى عونك من الفتايين...و بالمناسبة كل اللى فى الإستقبال مش مهندسيين و لا يمتوا للهندسة بصلة.....