الموضوع: كاميرات اشارات المرور وهمية و غير مركبة بشكل صحيح

اعتقد ممكن يكون فيه كاميرتين لأن انا اتصورت صورتين, انا لسه مرخص العربيه من 10 ايام و رخصت 3 سنين و الحمدلله بعد ما طلع عينى فى المرور كالعادة, المهم و انا فى نيابة المرور و مستنى المخالفات و بعد انتظار ساعة و ربع نادى الراجل على اسمى روحت قالى 310, قولتلة ايوه هى ايه المخالفات؟, قالى هى مخالفة واحدة مصورينك رادار, قولتلة طاب فين الصورة, قالى مش المفروض اوريهالك, قولتلة ازاى اذا كنت انا متصور فعلا و الصورة متوثقه عندكم ابسط حاجة ان انا اشوف الصورة و بعدين انت مش خسران حاجة, وافق و هو قالب وشه و كان واضح انه كان مستنى انى اديله اى فلوس ومدتلوش حاجة, المهم الورقة عبار عن ورقة a4 عادية متنيه نصين و متدبسه, فك الدبوس و فتحها و هى فى ايده حاولت اخدها منه بعديها بس مرضيش بس كنت خلاص شفت كل الى فيها الو رقة متقسمة نصين النص الاولانى صورة داكنة السواد و فيها نقطة بيضا ومش باين اى حاجة طبعا, و تحتيها مكتوب صورة السائق! راح الراجل قالى حظك انك اتصورت بليل لو الصبح كنت هتبقى باين, النص التانى من الورقة او الصورة التانيه و ده الاهم, برده مربع داكن السواد و فى النص نمر عربيتى (لوحة الارقام) منوره ا كرر تانى منورة فى نص الصورة واضحة بما ليس فيه مجال للشك نمر عربيتى 100% وتحتيها مكتوب صورة السيارة, قولتلة طاب 300 دى متنزلش مش فى حد ادنى 150 (زى ما علطول بدفع لما حد يوقفنى رادار) قالى لأ هى اصلا كانت 900 و نزلتلك بقت الحد الدنى الى هو 300, انما 150 دى فى حالة التصالح الفورى بس و دى نص الحد الادنى و مكان المخالفة على الدائرى منطقة المعادى و دة تأكيد لموضوع زميلنا فى الرادارات الثابتة على الدائرى بس ما اسعفنيش الوقت انى ارد هناك, وانا علطول بعدى من هناك فبقيت علطول بركز فى ااحتة دى من ساعت مرخصت و من يومين و فى نفس الحته ماشى 60,70 طبعا اللى اتلسع من الشوربه ينفخ فى الزبادى, لقيت ميكروباص بيعدينى من يمينى وهوب لقيت فلاش واضح و الميكروباص اكيد اتصور, المكان بقه بالظبط اتجاه القادم من التجمع فى اتجاه الهرم قبل نزلة المعادى علطول و تحديدا تحت يافطة مدخل المعادى 200 متر, شفت قبل كدة برده ناس بتتصور و هى بتكسر الإشارة فى ميدان رمسيس, بس الله اعلم اذا كانت رادارات الدائرى زى رادارات الإشارات ولا لأ, الدروس المستفادة بقه:
1- برغم ان انا شفت الميكروباص قدامى بيتصور بفلاش بس انا مش فاكر ان اتخايلت بأى فلاش و انا عالدائرى + الصورة مفيش اى حاجة باينة غير النمر كله اسود فى اسود و لا حتى عواكس من فوانيس ولا اى حاجة فاعتقد ان انا اتصورت من غير فلاش
2- النمر الجديدة بالطريقة الفسفوريه العاكسة اللى مكتوبه بيها بتبان بشكل غير طبيعى حتى لو من غير فلاش لأن انا عندى و معظمكو اكيد عنده اللمبتين اللى فوق النمر و دول اكتر من كافيين ان النمر تبان فى الصورةز
3- الرادار زى ما زميلنا فى المنتدى قال, ثابت و فى المكان ده بس فى ملحوظة بسيطه تاريخ المخالفة كان شهر 12 سنة 2009 يعنى لو الرادار شغال من الفترة دى بما يرضى الله كان زمانى اتصورت على اقل تقدير 50 مرة على الاقل لأن ده طريقى علطول و كنت معتقد ان ما فيش رادار بليل فكنت بمشى براحتى فواضح انه بيشتغل مرة اه و 10 لأ ,
4- متدفعش فلوس لأى حد من موظفيين المرور و امورك وورقك هيمشى احسن و هقولقكو ازاى بس فى موضوع منفصل عشان مخرجش بره الموضوع ده لو مكنتش خرجت بالفعل .