تجربة أخرى مع تكنو وان - تقرير صيانة ال-٢٠,٠٠٠
السلام عليكم،
ازيكم يا رجالة كيدهم ، كلكو وحشني والله.. وأنا أسف لاختفائي الفترة إلي فاتت بس دا بسبب ظروف حد من عائلتي كان تعبان شوية إدعولو بالشفاء بقى ..
المهم نخش فالموضوع علطول.. انتو عارفين طبعاً موضوع صيانة الخليجي وأنا أنا كنت محتار بصراحة بين تكنو وان و بين مركز أمير و جوزيف بس فل أخر رسيت على تكنو وان
المهم أنا رحت أنا و واحد صديقي من المنتدى ، أنا بالسيراتو و هو بالجتا عشان نعمل الصيانة .. اتصلنا أبلها بيوم بالمهندس أحمد الشحات عشان نحجز و هو رحب بينا و قالنا تيجو في أي وقت
طلعنا رحلة الصيانة يوم الأربع ٢١/٧ إتحركنا من المعادي الساعة ١١ والسكة خدت حوالي ساعة أو ساعة إلى ربع (الدائري للأسف بقى مترشأ كاميرات سرعة في كل حتا ) .. إستلم مننا العربية مهندس لطيف جداً و ذوق فلمعاملة اسمو محمود .. خد مننا التعليقات عل عربية و قلنالو إن الزيت معانا.. أنا هتكلم على السيراتو طبعاً ..
التعليقات كانت كالأتي:
- التكيف ضعيف بطريقة ملحوظة
- الإزاز الادماني اليمين والشمال بيزيق و بيعملو صوت و هما بيترفعو لفوق
- الفانوس الشمال إرتفاع الإضاءة بتاعتو أقل من الفانوس اليمين
- مقبض الراكب اليمين جمب السواق إلي بيبقى موجود فوق الشباك دة بيعمل صفارة خفيفة مع السرعة بتضايقني لو طافي الكاست
- و طبعاً أخيراً اني عايز أعمل صيانة ال-20,٠٠٠ و قلتلو إن الزيت في شنطة العربية ..
بالنسبة للزيت، أنا جبت موبيل ١ من بنزينية موبيل، و دي صورتو :
http://shop4sport.net/zen/images/4litesp5w30.jpg
أنا جبت النوع دة بالذات لئن مكتوب فلكتالوج إن اللزوجة المنصوح بيها هي 5w-20 أو 5w-30 للبلد الحارة ، واللزوجة ده ملقيتهاش في ولا نوع زيت غير موبيل ١ النوع دا .. و تقريباً شل إلي بيحطوه فلتوكيل بيبقى 5W-40 بس أنا كبرت دماغي و قلت خليني أمشي مع الكتالوغ أحسن
و سألت اه إلي بيتغير في صيانة ال-20,٠٠٠ بردو، أنا إلي أعرفو من جدول التوكيل إن المفروض الحجات دي بتتغير:
- فلتر الزيت
-فلتر هوا
-فلتر بنزين
- بوجهات
فهو قالي إن هما بيعملو check على الحجات دي، و لو في حاجة عيزة تتغير بييجو يقولولي الأول أبل ما يغيروها قلتلو طيب تمام
خد مني المفتاح، و طلعنا الإستراحة.. و مخدش وقت طويل على ما العربية دخلت المركز.. إزاز الإستراحة موضح كل حاجة و دي صورة للعربية من إزاز الإستراحة (تعليقي عل إستراحة حقولو فل أخر):
http://img225.imageshack.us/img225/1561/image887.jpg
المهم إن ونا فوق حسيت إن إلي شغالين على العربية نسبة كبيرة منهم فنيين مش مهندسين ، فقلت أنزل أبقى جمبهم أحسن عشان أبقى مطمن .. فلأول في مهندس قالي معلش ممنوع حد يقف هنا ياريت تتفضل فلإستراحة فمشيت.. بعدن بعدها بشوية استغربت جداً لأني لقيت ناس وقفة جمب عربيتها و بتتكلم مع المهندسين عادي جداً !:_Alshmokh08[1]: أمت نزلت تاني و محدش قالي حاجة المرادي !
المهم غيرو الزيت والفلتر، و ظبتولي فرامل اليد و نضفو فلتر التكييف و ربطو عفشة، و تقريباً بصو على التيل بس محدش قالي عليه أي تعليق فقلت يبقى إن شاء الله لسة كويس (مع اني حسو ضعف).. و جه مهندس محمود قالي إن البوجهات عايزة تتغير قلتلو ماشي غير ، تمنهم كم دول ؟ قالي ١٦٠ .. قلتلو طيب اصليين ؟ قالي اه ممكن تبص عل علبة بنفسك لو عايز قلتلو يا ريت.. و دي صورة العلبة :
http://img30.imageshack.us/img30/8386/image890.jpg
و دي صورة الفني و هو بيغير البوجهات :
http://img441.imageshack.us/img441/2313/image891.jpg
إلي لابس كحلي ورا فلصورة دا المهندس زكريا، شخصية محترمة جداً..
و دي صورة للبوجهات الأديمة إلي اتغيرت:
http://img440.imageshack.us/img440/2323/image889.jpg
البوجهات إلي ركبوها نفس شكلها بالظبط طبعاً..
المهم اني لقيتهم عايزين يقفلو العربية على كدة و خلاص، قلتلهم طيب و بقية الحاجات ؟ :majd(4): قالولي إلي هي اه ؟ قلتلهم التكييف والإزاز والصفارة والفانوس ( للأسف محدش عبر التعليقات إلي قلتها فلأول )..
قالولي الصفارة إلي فلمقبض دي صعب نعملها، ياما هنفك السقف عشان نشوفو قلتلو لأ شكراً خلي الصفارة موجودة أحسن :ma: .. بالنسبة للتكييف، قالولي احنا ندفن فلتر التكييف قلتلهم لأ أكيد مش موضوع فلتر لأنو ضعيف أوي مش موضوع فلتر ، والإزاز اللي حنبص عليه..
جه فني اسمو محسن بتاع كهربا .. جرب التكييف و لأه ضعيف فعلاً، فشيك على الفريون قالي إنو ناقص 20 جرام ! قلتلو و هو كلو على بعض كام ؟ قالي 60 !!! قالي إن إلي شحنهولي أخر مرة (التوكيل) شحنو ناقص قلتلو يعني أكيد مش بيسرب ؟ قالي لو كان بيسرب كان فضي من زمان .. (ياريت إلي عندو تعليق على الموضوع دة يفدني بيه )
المهم شحن الفريون و فعلاً فرق السؤعية بقى فرء السما والأرض
بالنسبة للإزاز، فك مكنت الإزاز و شحمها والصوت راح الحمدلله (كان شحم ناقص )
بالنسبة للفانوس، زبط حاجة اسمها الرجلاش والإرتفاع بقى مظبوط الحمدلله
أخر حاجة سألت المهندس على فلتر الهوا، قالي لأ بصينا عليه و لسة كويس .. قمت رايح فتحت علبة الفلتر أبوس عليها، لقيت الفلتر بترابو ذي ماهو يعني محدش فتح العلبة أصلاً ! قمت قلت للمهندس زكريا، فجاب الفني و تقريباً زعألو عشان مبصش عليه، و قالي إن الفلتر فعلاً عايز يتغير !!!!! (يعني أنا لو مكنتش بصيت بنفسي مكنتش هعرف).. قلتلو طيب بكم دة ؟ قالي ٩٠ جنيه قلتلو طيب غيرو.. و علبتو عملة ذي علبة البوجهات بالظبط بس مكتوب عليها أير فلتر
و أخيراً طلبت غسيل الفوم عملوه ب-٢٥ جنيه
كدا يبقى إجمالي الحساب بعد الخصم هو ١٦٠ + ٩٠ + ٢٥ + ٢٠٠ (مصنعية) = ٤٧٥ جنيه
والزيت كان ب-٢٥٠, يعني الصيانة كلها على بعض وقفت عليا ب-٧٢٥ جنيه
بالنسبة بقى لرأي فل- إستراحة، فهي مش حلوة أوي فعلاً.. يعني بتفتقر النضافه مثلاً، ونا قاعد كنت شايف أعقاب السجاير مرمية عل أرض .. والإزاز فعلاً مكنش نضيف.. بس أنا محستش إن الموضوع دة همني في حاجة ، ونا كدا كدا معظم الوقت كنت واقف تحت مع المهندسين ..
بالنسبة للمركز إجمالياً، دا رأيي فيه :
الايجابيات:
- المعاملة مع الناس كويسة جداً.. طريقة الكلام كويسة مع كل المهندسين، كلهم متفاعلين لطلباتك و محدش بيكشر في وشك ذي فلتوكيل كدة..
- سرعة العمل.. يعني العربية مقعدتش كتير على مدخلت، و مع اني قعدت كتير معاهم هناك، بس مفيش وقت كانت العربية وقفة لوحدها من غير مايكون حد شغال عليها
- الناس شكلها فهما .. بالرغم إن في نسبة كبيرة أوي منهم شكلهم فنيين مش مهندسين، بس واضح إن اديهم ماشية كتير و متعودين.. يعني إلي غيرلي البوجهات دا كان ولد شكلو أقل من ٢٠ سنة بس كان ايدو سريعة أوي ..
- واضح إن نايل موتورز هناك ليه وضعو، أنا حسيت إن الإهتمام زاد جداً لما عرفو اني عضو في نيل موتورز و لقوني باخد صور و كدة .. بس دي ميزة و عيب في نفس الوقت من رأيي
السلبيات:
- عدم الإهتمام بالتعليقات المذكورة فلأول .. يعني لو أنا مش مركز كان ممكن ببساطة أحاسب ومشي و مفيش ولا حاجة ملي قلتها اتعملت
- عدم الإهتمام باجراءت الصيانة كاملة.. يعني موضوع فلتر الهوا إلي محدش بص عليه دة ضايقني جداً، لأن دا من المفروض من الحاجات إلي بتتغير في صيانة العشرين ألف يعني المفروض من الاجراءت المحفوظة
- إلي بيشتغلو عايزين حد واقف فوق دماغهم عشان يعملو إلي انتا عايزو.. يعني مثلاً الإزاز لما الفني جربو قالي أهو سليم و مفيش صوت.. بس دا كان عشان في دوشة، ونا خليتو يقرب ودنو مل باب فسمع الزنة و عملها.. حاجات كدة يعني
- التراب هناك بشع .. العربية بعد ممشيت كانت كأنها مستحمية تراب .. و مش بيهتمو أوي بنضافة العربية.. الفني إلي كان شغال عل إزاز وسخلي العربية من جوا شوية..
ملخصاً يعني، من رأيي المركز في فرق كبير بينو و بين التوكيل، بس أنا حسو بديل كويس.. و بالذات فلحاجات البسيطة ذي الصيانة و كدة مش هتحس بفرق، ما عدا موضوع انك لازم تبقى مركز معاهم كويس دة.. يعني مل أخر لازم تبقى رايح مذاكر كويس :ma: بس غير كدة مفيش أي حاجة ضايقتني أوي، و الحمدلله تقريباً كل إلي كنت عيزو يتعمل اتعمل .. بغض النظر عن بعض العيوب البسيطة إلي ممكن تتحل لو ادوها إهتمام أكتر
بالنسبة بقى لأداء السنيورة بعد الصيانة:
- السحب زاد عن الأول، أنا حاسس بفرق ملحوظ (أظن بسبب البوجهات ول فلتر )
- طبعاً العفشة المترابطة مفيش أحلى من إحساسها
- التكييف كنت حاسس بفرق جامد أوي عن الأول في أول كام يوم، بس للأسف حسو بدأ يضعف تاني و مش عارف دا بجد ولا وسوسة، و محتاج نصيحة منكم فل موضوع دا ..
- إستهلاك البنزين زاد بطريقة ملحوظة جداً !!! ول موضوع دا مديقني جداً ! قبل الصيانة كان متوسط الإستهلاك حوالي ٩ لتر لكل ١٠٠ كم، دلوقتي بقى علطول فوق ال-١٠ لتر ! ياريت تدوني رايكو فلموضوع دة
- في مشكلة ظهرت بس هعمل عليها موضوع تاني أحسن، في صوت تكة ظهر مع الفرامل، والتكة دي محسوسة فلفتيس لو انتا ماسكو.. ربنا يستر
بس كدة.. و أخر حاجة إن المهندس أحمد الشحات كان مسافر فمجتليش فرصة اني أسلم عليه..
ونا أسف جداً عل إطالة بس أنا كنت بحاول على أد مقدر أؤل كل حاجة بتفاصيلها عشان مايبقاش فيه أي حاجة ناقصة.. فمعلش الموضوع مش منظم أوي بردو
و أسف بردو على الغلطات الإملائية عشان باستخدم yamli إلي خلاص جبلي شلل :majd(4):
و مستني ارائكم