الموضوع: حد فيكم جرب يعمل ساعة للسواقة والاسترخاء؟

أنا ابتديت العادة دي لما كانت سجايري تخلص وابقى عايز سيجارة(ربنا يتوب علينا) وانا بطبعي مابنامش قبل 4-5.

مفيش حد تحت البيت من بتوع السجاير بيعد 24 ساعة.

فـكنت بأنزل أول مالشمس تطلع اخد العربية واطلع بيها على سوبرماركت كبير في الدقي واجيب واروح.

مع الوقت الموضوع ده بقى شبه عادة فيَّ حتى لو مش محتاج حاجة بستنى أول مالدنيا تنور بأنزل اروح على هناك وفعلا بقيت مدمن الموضوع ده.

أقول لكم إيه بقى الميزة.

إنت نازل مفيش حد فالشارع تقريبا غير قهوة عليها كام واحد..تاخد عربيتك وتنك بتلف في البلد..قمة في الاسترخاء للاعصاب..جو جميل بالرغم من الحر بأبقى ماشي من غير تكييف والشباك مفتوح ومبسوط...نفس الشوارع اللي الواحد مش بيبقى طايقها في معاد شغله (قصر العيني - مراد - كبري الجامعة - ميدان المساحة بنسبالي ) فاضية وإنت ماشي مشغل مزيكا لو ليك فيه أو قران. بتحس إنك ماشي في بلد تانية نظيفة والناس اللي سايقة غيرك - اللي بتشوفهم كل فين وفين ومعظمهم تكس وأتوبيسات كله ماشي بمزاجه عالآخر. متسمعش كلاكس وإنت ماشي ولا حد يمشي وراك ويلعبلك نور...فعلا بتحس إن البلد بتاعتك لوحدك.

لولا كام كومة زبالة والشوارع المكسرة كنت قلت إني ماشي في دولة غربية محترمة أو حتى جنة الله في الأرض..

العيب الوحيد هي كلها ساعة ولا حاجة وإخوانا البعده بتوع الميكروباصات يصحوا ويقرفوك في عيشتك وتقوم مروح.

أكتر حاجة أحب انصح بيها للي عايز يجرب الموضوع ده اللي فعلا حيعجبه..بلاش تمشي تحرق أو تعمل اصوات مزعجة وكلاكسات وكده عشان الناس نايمة وده عيب قوي.

البونس عالموضوع ده بقى إني غير تغيير الجو المشي بمزاج لما بارجع بلاقي ركنتي لسة موجودة الحمدلله عشان محدش صحي لسة..عشان موضوع الركنة عندي في المنطقة يعتبر كابوس.