تجربتى فى شراء سيارة جديدة
السلام عليكم
الحمد لله اشتريت سيارة شيفرولية لانوس 2010 والاجمل انى انضمتلكم بجد يا اجدع ناس
المهم حبيت احكى عن تفاصيل رحلة شراء السيارة
1- بعد تحديد المبلغ المتاح والمقارنات بين العربيات اللى فى السعر ده استقريت على ال لانوس
2- بدات رحلة البحث عن معرض مناسب للشراء واستقريت على سمير ريان
3- نزلت قبل ما اشترى وسألت على السعر ودى نقطه مهمة لانهم قالولى سعر ولما جيت اشترى لاقيتهم بيقولولى سعر ازيد 500 جنية ( 66000 ثم 66500 ) المهم انهم كانوا ادونى ورقة تفصيلية بالسعر لانى الاول كنت بافكر اجيبها قسط وانا اشتريت كاش بعد كده
المفيد للى عايز يشترى عربية جديدة
1- اسال فى كذا معرض عن الاسعار قبل ماتشترى
2- خلى بالك من بتوع المبيعات اللى فى المعارض لان مش كل اللى شغالين كويسين يعنى سمير ريان معرض محترم بس الناس اللى عندو فيهم وفيهم يعنى انا حجزت مع واحد ربنا يهديه ولما روحت استلم دورت على حد تانى والحمد لله طلع كويس
عيب سمير ريان الوحيد انه من كتر الزحمة اللى عنده( ربنا يزيده) بتبقى الناس مش مركزه معاه
المهم استلمت العربية طبعا بعد اتباع نصائح وارشادات اخوانى فى المنتدى وبعد غسيل السيارة واستلام الورق طلبت من مسئول التسليم انى اطابق رقم الشاسية والموتور اللى فى الورق
المهم بعد استغراب المسئول لاقيت ان العربية اللى المفروض انى استلمها مش هى العربية اللى فى الورق:star1:
واكتشفت انهم عربيتين جنب بعض فادونى العربية الغلط
المهم استلمت العربية الصح بعد اعادة المعاينة ومشيت
ملحوظة : استلام ضمان العربية والكتالوج بيتم من فروع منصور بصورة الرخصة وصورة البطاقة
طبعا اول حاجة تعملها انك تحط بنزين فى العربية لانها بتكون فاضية
العربية كانت ماشية 13000 كم
سلمونى طقم دواسات وميدالية هدية
والحمد لله تمت على خير :B4_388:
اسف للاطالة