زقردة و(الطريق الي الساحل)
كنت مسافر الساحل الشمالي من اسبوع كدة و كنت رايح قرية (جامعة الدل العربية) الكيلو 67 طريق اسكندرية مطروح
قولت انا لازم اروح بالشيفروليه السبارك اللي انا مسميها (زقردة) :ma:...........المهم انا كنت عايز اجربها علي الطريق و اجري بيها و اشوف موضوع الثبات ده ايه..... اصل هي كانت يا دوبك عاملة 1100 كم تقريبا و مجريتش بيها قبل كدة :star1: فقولت لازم اروح بيها بدل الفيرنا
المهم بدأت الرحلة و روحت مفول (زقردة) في بنزينة (مصر امارات) اللي عند البوابات (التانك عندي 35 لتر)
الساعة كانت ساعتها 6:30 الصبح فكان الجو حلو و مكنتش محتاجة تكييف بصراحة
بدأت الطريق و كنت ماشي طول الطريق علي سرعة 120 -130 كم/الساعة منزلتش عن السرعة ديه ولا عديتها بصراحة ((احنا كنا 4 في العربية و كان معانا شوية شنط)).........و النتيجة كنا علي السرعة ديه ماشيين كأننا راكبين مرسيدس.....(طبعا ببالغ شوية :shine[1]:) بس فعلا الثبات كان رائع و الله
المهم دخلت طريق العلمين و كان الجو بدأ يحرر كانت الساعة حوالي 7:30 او 8 فشغلت التكيف .....طبعا حسيت ان العربية تقلت تحت رجليا ...بس بردو كملت علي سرعة 130 كم/الساعة
كل ده و انا موقفتش في استراحات لأني محستش بالطريق بصراحة
و وصلت قرية (جامعة الدول العربية) علي الساعة9:00 تقريبا ........يعني الطريق اخد حوالي ساعتيين و نص
و كنت مشيت ساعتها 270 كم (و عداد البنزين كان بعد النص بشوية) يعني متهيألي هي استهلكت 15 لتر مثلا
المهم ان اللي كان فاضل في البنزين كفاني طول ما كنت هناك ((روحت بيهم اسكندرية (حوالي 140 كم رايح جاي) و روحت مارينا (حوالي 20 كم رايح جاي ) و كان كل ده بالتكييف و كمان و انا مروح مولت اول طريق العلمين يعني مشييت كمان حوالي 60 كم))
لو حسبناها حتلاقي ان انا في التفويلة مشيت (270+140+20+10+60=500كم) يعني 35 لتر عملوا 500 كم نصهم بالتكييف.......يا تري ده معدل استهلاك كويس علي (زقردة) مع العلم هي 1000cc بس
و انا راجع بقي كان طريق مصر اسكندرية كان عبارة عن غابة من التريلات و عربيات النقل و كانت الساعة 8 بلييل (يعني ضلمة)...بس عيون (زقردة) كانت قوية بصراحة و كانت منورة الطريق حلو اوي ماشاء الله
الرحلة ديه كلها (زقردة) مشييت فيها حوالي 800 كم
تقييمي بقي بعد الرحلة ديه
1-الثبات علي السرعات العالية : لو العربية مليانة اخرها 140كم/الساعة.......و لو فاضية يعني انت لوحدك متهيألي متعديش ال 120كم/الساعة
2-استهلاك البنزين متهيألي ان هي معقولة بالرغم ان هي مفرقتش جامد عن الفيرنا (الفيرنا 1600cc)
3-السحب بجد ممتاز جدا جدا ماشاء الله يعني لو عايزها تجيب 180 عمرها ما حتقول لأ بس المشكلة في الثبات(بس بيتأثر جامد بالتكييف بس مش لدرجة ان هي تضايقك)
4-التكيف بجد تلاجة (انا كنت بقلله عشان ايديا بتقف و انا سايق) و في حاجة انا لاحظتها انه بيسقع اكتر كل اما سرعة العربية بتزييد :majd(4):
في النهاية معلش طولت عليكوا........ ارجوا اني اكون قولت كل حاجة و يا ريت المعلومات ديه تفيد اي حد
و اي اسفسار عن (زقردة) انا تحت امركم :satelite:
د. احمد فوزي