معلش لازم اعلق
يا ربى نسخة من مصر بالمللى!!!!
اقتباس:
ثانيا: الناس في المانيا ملتزمين بشكل ممل بقواعد المرور وان كان بيتقال ان اهل برلين اقل التزاما من باقي الألمان بقواعد المرور ( انا مش شايف كدة )، هنا الالتزام بالاشارات والحارة المرورية مقدس وكمان الأسهم المرسومة على الأرض، يعنى لو انت ماشي في حارة السهم اللي فيها حاود يمين او شمال يبقى اجباري تحود يمين او شمال والا حتبقى كارثة انك مثلا تمشى طوالي لأن عدم الالتزام بالحارة او الأسهم اللي على الأرض فيها تخييشة وتحمل مسئولية كمان مالية ويمكن توصل لجنائية لو اتسببت في حادثة اتصاب فيها ناس، لكن لو انت في الحارة بطريق الخطأ وحبيت تغير لحارة تانية لازم تدي اشارة وتستنى واحد مؤدب يخليك تنقل للحارة المطلوبة .
هنا فى مصر لو حضرتك التزمت بالاسهم المرسومة على الارض يبقى رحت فى داهية لان كتير جدا الطريق بيطوروه زى طريق السويس فى اوله قبل الرحاب و بعد الرحاب قبل مدينتى و الشروق كمثال الشارع كان بيلف للشمال بس هما وسعوه و خلوه يكمل علطول و الاسهم القديمة متمسحتش طبعا يعنى لو ماشى على السهم هتلاقى السهم بيلف و تلاقى نفسك لبست فى الحيطة (السور) علطول و طبعا الطريق بيبقى ضلمة بليل و السهم اللى بيلبس فى الحيطة أبيض و باين اوى.
اما الانتقال بين الحارات فمينفعش اساسا لان مفيش فى مصر حارات , الشارع بيبقى حارتين و تلاقى 3 عربيات ماشيين جنب بعض اكن الخطوط اللى فى الارض دى منظر جمالى مثلا ملهاش لزمة.
اقتباس:
ثالثا : اشارات المرور كلها مزودة بكاميرات أي كسر للاشارة او تجاوز سرعة في الشوارع العادية حتلاقي نفسك بتتصور وفلاشات قوية جدا بتنور فضيحة يعني ، في الميادين الكبيرة والشوارع اللي فيها تقاطعات لو انت بتلف شمال بعد ما تفتح الاشارة بتاعتك ما ينفعش تكمل على طول والا حتعمل حادثة مع العربيات اللي جاية في وشك لازم تستنى لحد ما تفتح اشارة تانية في الناحية المقابلة على شكل سهم اخضر وساعتها تكمل اللفة بتاعتك، ولو اشارتك من الأول على شكل سهم يبقى تكمل على طول وماتستناش الاشارة التانية.
لا الحمد لله من النحيادى فى مصر اطمن لان 90% على الاقل من اشارات المرور لا تعمل ماعدا كام اشارة يتعدوا على الصوابع اللى شغالين و كانوا حاطين فى 4 منهم كاميرات بس الكاميرات مش شغالة دلوقتى مش عارف ليه.
اقتباس:
رابعا: السرعة داخل المدينة 50 كلم وفي الشوارع الجانبية السكنية الهادئة 30 كلم فقط واي تجاوز ممكن تدفع غرامة فوري، اما على الهاي واي أوالأوتو بان بالألماني فالسرعة في معظمها مفتوحة بدون حد اقصى يعني لو عربيتك تجيب 300 كلم في الساعة مافيهاش مشكلة.
محدش عارف اساسا فى مصر السرعة كام داخل المدينة , كل واحد على مزاجة و كدا كدا من الزحمة السرعة هتبقى قليلة.
اما الطرق السريعة السرعة 100 علشان الناس تتفسح و هى مسافرة متوصلش بسرعة لان الوصول بسرعة ممل طبعا اما دلوقتى بقى عندا طريق حر (القاهرة - العين السخنة ) و قريبا (القاهرة - اسكندرية) و طبعا واضح من الاسم ان السرعة هتبقى رهيييبة و غير محدودة ( مع مراعاة الاستخدام العادل Fair usage policy و هو 120 كيلو فى الساعة ) , اصل هنا فى مصر كل حاجة بقت غير محدودة (unlimited) سواء internet او مكالمات التليفون و حاجات كتير بس يكتبلك مع مراعاة الاستخدام العادل و يديك عدد قليل و يقولك اكتر منه يبقى تدفع!! امال بيقولوا unlimited ليه متعرفش
اقتباس:
خامسا: كل العربيات لازم تعمل تأمين اجباري على الأقل تأمين لتعويض الآخرين في حالة التسبب في ضرر ليهم ، وهنا ما فيش هزار لو حسست على عربية حتلاقي نفسك في سيم وجيم وتحقيقات بوليس وشركة التأمين بتاعتك تعوضه وترفع عليك القسط الدوبل عشان كدة كله بيبقى عينه في وسط راسه لأن في ناس كتير بتحاول تستفيد من الموضوع ده وتلبس غيرها في حوادث( مافيا تأمينات) يعني ما تلزقش قوي في اللي قدامك لأنه ممكن يقف فجأه تلاقي نفسك ريحت عليه وتخش في المشاكل اللي انا شرحتها دي، وبيقولو ان أهم حاجتين للألماني حيوانه الأليف وسيارته الخاصة ، العناية بعربياتهم فائقة
كان نفسى التامين يبقى اجبارى فى مصر كان هيحل مشاكل كتير بس احنا عندنا نظام متطور اكتر , حضرتك تنزل تزعق و اللى قدامك يزعق و اللى صوته اعلى يكسب و بعدين عندنا فى مصر اى عربية مدهونة و حتى لو لاسباب عادية يعنى العربية مخدوشة مثلا فدهنت الاكصدام مثلا بسبب كثرة الخدوش و لا الشمس اثرت على الدهان فدهنت القطعة دى تيجى تبيع العربية يقولك دى مرشوشة يعنى معيوبة و تنزل فى تمنها!!!