المشاركة الأصلية كتبت بواسطة محمد الشامي
لو أمنت في شركه تأمين كويسه بيتاخد منك قسط سنوي حوالى 4.5 % من تمن العربيه
و لاقدر الله لو حصل خطر معين فـ انت عليك واجب بردو لازم تعمله عشان تضمن ان الشركه تصرفلك التعويض اللازم
اولا ومن البدايه خالص لازم لما تيجي تأمن على عربيتك تكون فعلا سليمه تماماً لانها هتتصور ديجيتال والصور هتتحط في ملف خاص بيك في الشركه
ثانيا عند وقوع الخطر لازم تتبع الأصول في التعامل عشان تضمن وصول التعويض ليك بشكل سليم وهي :-
- لو حصلت حادثه او خطر جسيم لازم محضر شرطه واثبات واقعه في مسرح الحادث
- تبليغ الشركه المؤمنه فوراً بالحادث مرفق معاه صوره من المحضر وبيانات كل الإجراءات اللي عملتها
- بعدها بيطلع معاك معاين من الشركه لمعاينه الخسائر والأضرار اللي حصلت عندك
- بعد المعاينه بيتم تحديد حجم الخساره من قبل المعاين
- بعدها بيكون عندك اختيار من اتنين : الاول هو انك تصلح العربيه على حسابك في اي مركز صيانه وبعدها تجيب لشركه التأمين الفواتير المعتمده بقيمه الإصلاح وهي بتصرف القيمه المطلوبه ..... التاني انك تسيب العربيه للشركه وهي بتوديها الورش التابعه ليها وبتقوم بتصليحها وترجعها ليك زي ماكانت عند المعاينه في بدء التأمين عليها
لكن مع مراعاه , ان عند تقييم الخطر لو كانت التكلفه ازيد من 5 الاف جنيه مصري فإنت فعلا محتاج محضر شرطه واثبات حاله و و و ,,,,,, لكن لو كانت التكلفه اقل فإنت مش محتاج غير معاينه السياره من معاين الشركه وبس
ولا قدر الله في حاله الهلاك الكلي للعربيه فالشركه مسئوله مسئوليه كامله عن تعويضك بعربيه تانيه زيها بالظبط , لكن دي بتكون اجراءتها طويييييييييله شويه
وفي حاجه غلط جدا بيعملها صاحب العربيه وهو بيأمن , وهي انه ساعات بيطلب انه يأمن على العربيه بسعر اغلى من التمن الحقيقي لها (يعني هي بـ 100 الف وهو عايز يامن بـ 150 الف) وطبعا بيكون القسط اعلى , ولكن عند وقوع خطر الهلاك الكلي للعربيه فبيتم تعويضك عنها بسعر السوق مش بسعر التأمين عليها , وانا شايف ان دي اكبر غلطه بيرتكبها المؤمن عند عمل وثيقه تأمين
ونقطه اخيره عشان مكونش طولت اوي عليك
في شروط في اي وثيقه تأمين بتحرمك من الإستفاده بالتعويض
ومن ضمن الحاجات دي
اخفاء معلومات او بيانات معينه عن العربيه كنوع من مخادعه الشركه , يعني مثلا يكون في عيب كارثى وهيؤدي في القريب العاجل لتلف العربيه بشكل او بأخر
تعمد تعريض العربيه لخطر معين من قبل صاحبها للحصول على التعويض النقدي او تعويض بعربيه تانيه
في حاجه مهمه جدا ومش كل الناس عارفاها , وهي ان لو مش صاحب العربيه هو اللي كان ماشي بيها وقت وقوع الخطر فالشركه غير مسئوله إطلاقاً عن اي ضرر حصل
اتمنى اكون وضحتلك شويه الفكره عامله ازاي , وعلى فكره التأمين في اي شركه في الدنيا ملهوش اي علاقه بقطع الغيار , التأمين يشمل الحاله العامه للسياره والشكل الخارجي