الموضوع: تجربتى مع التيدا

قليل صح ؟ انا عارف والله ان الناس هتتريق عليا بس انا عاوز اشاركو في اللي في دماغي كولو
خصوصا ان في فرق رهيب بجد بين العربية القديمة بتاعتي الاوبل و بين التيدا طبعا الاوبل كنت بمشي مستريح علي طريق الساحل دا 200 و ماسك الدريكسيون بأيد واحدة و كولو تمام لكن التيدا ولا راضية تجيب ال 200 حتي و مكلبش في الدريكسيون

و غير كدة صحيح في صوت طقة في بدايتها من العجل يمين و شمال و انا بجيب اخر اللفة مش عارف دا من اية

حضرتك ماوضحتش في التقرير ولا في العنوان حضرتك بتكلم علي عربية ايه بظبط "وشكرا" لكن مجهود تشكر عليه

الف شكر علي المرور يا ابو حميد بس والله الموضوع مش مقارنة بين الاوبل و التيدا علشان اكيد المقارنة هتكون مش موضوعية ياعني بس انا بقولك علي الاحساس اللي حاسو انا فعلا علي طريق اسكندرية و الساحل بدون مبالغة كنت بريح ضهري في الاوبل و ماسك الدريكسيون بأيد واحدة و عايش 190 200 مفيش مشكلة و مش حاسس بحاجة التيدا طبعا الفرق دا كبير فيها اوي لكن تيجي التيدا للتكييف و استهلاك البنزين و كل دا اكيد احسن من الاوبل و في الاخر ربنا يسترها معانا و معاكو

المشاركة الأصلية كتبت بواسطة ahmed.tv

تسلم ايدك على التقرير وعلى المجهود , وان كنت شايف بردوا انك لسه ماخدتش على العرربية وحاطط فى دماغك العربية القديمة اللى كانت معاك والمقارنة بيها

بمعنى
مينفعش اكون راكب بولو واغيرها واركب عربية اكبر منها فى الحجم وامكانيات الماتور , واعمل تقييم , حيكون صعب جدا

نيجى بقا الى اولا

الصاج اقعد عليه وعلى ضمانتى ولو حصله حاجة اقولى وانا المتحمل , بس ما عدا الاكصدام الخلفى ساعتها معرفكش , لانه ضعيف زى حال اى عربية حديثة

نيجى الى ثانيا

متفق معاك تماما جدا , والقعدة فى العربية مريحة اوى سواء قدام او فى الخلف , وتحس ان مفيش حاجة كابتة على راسك وانت قاعد نظرا لارتفاع سقف العربية

نيجى الى ثالثا

العفشة مش نافشة اوى , متوسطة , وان كنت بتحس بالمطبات والنقر وانت ماسك الدريكسيون ممكن عشان القطمة اللى فى الدريكسيون من تحت ودى عاوزة تتشحم وكل الامور حتبقا تمام بعدها
واما عن عوجة الدريكسيون , انا مش فاهمها يمكن قصدك الطارة مش على عدلتها يعنى على الرسمة بتعتها , اذا كان كلامى صح , يبقا انت عاوز ظبط زوايا مش اكتر

نيجى الى رابعا

فعلا العربية استجابتها قوية جدااااااااا وبتتلكك على الكيك دون باقل لمسة , ولما بتديها كيك دون اكنك يا اخى مشغل تربو فيها سبحان الله
وبالنسبة الى استهلاك البنزين , اولا التيدا من احسن العربيات ال1600 فى استهلاك البنزين , ولكن متقدرش تحكم على الاداء الا بعد ال5000 كيلو الاولى ,والدنيا حتتظبط معاك بعدها , تانى حاجة ممكن تكون انت بتمشى فى زحمة دايما ومشغل التكيف , وبتقف كتير , فاكيد حيكون االاستهلاك عندك زيادة , والصفيحة حلو اوى لو عملت 200 بالتكيف فى الزحمة الرهيبة دى

نيجى بقا الى خامسا

تكيفها انا بتفق معاك قوى جدا جدا جدا

نيجى بقا الى الجرى

انا اخر سرعة جبتها 180 كيلو , ومردتش اشد اكتر من كدا , بس كنت عادى ومفيش خوف لانه اتعودت على العربية وكنت وسط وحوش فى الطريق زى المرسيدس [gdwl]والافيو[/gdwl], بس مردتش اشد اكتر من كدا
بس اكيد نظرا لارتفاع العربية مع السرعات العالية الجنونية , محتاجة الى جنوط زى ما انت قولت, بس عشان اجرى على سرعة 180 او 195 امتى وفين وازاى
وكمان حتى العربيات اللى مركبة جنوط 17 بيكونوا ماشين فى قلق نظرا الى السرعة الجنونية ,وليس للعربية , وده طبيعى انك تخاف وحتى لو كنت راكب اى عربية
الا بقا البى ام او المرسيدس , وربنا يوعدنا ونجيبها لان العربيات دى ما ما بتجرى بتكلبش فى الارض

وبالنسبة الى الماتور اللى صوت بيعلى مرة واحدة

هو صوته عالى بعد ال120 ولكن مش عالى بازعاج
واذا كنت وانت ماشى على سرعة قليلة وبتسمعه يمكن عشان بتحرق على الغيار وانت مش واخد بالك , بيكون حسب دوست رجلك على دواسة البنزين

تسلم ايدك على التقييم , ومستنينك تاخد اكتر واكتر على العربية وربنا يكيفك شر الطريق ويحفظك وتتمتع بخيرها

واى شكوى فى العربية سجلها عشان لما تروح تعمل صيانة ال5000 باذن الله تقولهم عليها
وتقبل تحياتى

تقيم محترم من شحص محترم بجد حلو اوى بس لوسمحت ليا تعقيب على حضرتك فى حجتين اولا حضرتك بتقول انك مزوتش على الطريق عن 180 و ذكرت انك كان جمبك وحوش مرسيديس على راسى انما افيو اية حضرتك اللى بتتكلم عنها دى هو حضرتك بتقارن تسارع و ثبات التيدا او الصنى على سبيل المثال مع الافيو انا زعلان و الله

تانى حاجة حضرتك كاتب ان المرسيديس و البى ام دبليو كل ما تجرى تكلبش فى الارض ماشى انا معاك بس مش زى ما حضرتك فاكر انا صحبى بعد الشر علينا جميعا فى المنتدى الكريم مات فى BMW 318i 2002 ربنا يرحمة .... و اسف على الاطالة

اولاً الصاج: طبعاً الصاج خفيف مافهاش جدال ماعدا الكبوت لكن الابواب والرفارف خفاف بس ده اعتقد انو مش مشكلة لإن الاساس هيه الدعامات والشاسيهات اللى محاوطة العربية دى الاهم لعوامل الامان وكمان العفشة راسية على الارض ومدية تقل للعربية

الصالون : مريح بطريقة رهيبة وسع مفيش كلام حتى فرش الابواب متبطن ويريح ايدك اما تسند عليه

العفشة : قوة ومرونة ( وثبات تعويضاً على خفة الصاج ) والميزة ان فى المطبات والشوارع المكسرة متحسش بهبد فى ظهرك

الموتور : حدث ولا حرج قوة سحب العربية دة فظيع جداً وسرعة استجابة رائعة وتمللى بترفع راسى مع اى حد اشد معاه

التكييف : تلاجة مش هقول غير كده

علو العربية لى عيب وميزة ( العيب طبعاً فى الثبات ) والميزة اللى طبعاً بعتبرها الافضل لبلدنا العزيزة ( الحك فى المطبات)

بصراحة كان ممكن اشترى السيفيك بس اهم سبب خلانى اصرف نظر انها واطية جداً على الارض وانا متعقد من الموضوع ده لإن كان معايا مازدا قبل كده ومفيش مطب إلا اما تحك فيه

مجملاً العربية دى صفقة رابحة لمالكها بكل المقاييس
وشعارى دايماً ( التيدا تخلى حياتك سعيدة )

معظم النقاط معنديش اختلاف فيها او الاعضاء شرحوها كتر خيرهم

انا هكلم فى نقطه الثبات هى التيدا عريبه عاليه عن الارض فالواحد ميتوقعش منها ثبات خرافى بس والله الباور الكهرباء والفرامل القويه اللى معاك بتجرى ويبقى عندك ثقه فى العربيه يعنى انا طلعت اسكندريه الصيف ده والله كانت 180 ومكنتش اللى هو مكلبش فى الدركسيون كان عادى يعنى
انا العربيه ال 2007 اللى معايا نازله يجنوط 15