الموضوع: طقطقة في العفشة

السلام عليكم طبعاً الكلام ده فى ال128 عايزك تبص خلف العجل اليمين و الشمال بعد ما تكسر الدريكسيون على الآخر عشان الرؤية توضح معاك هتلاقى فيه شروخات هى ديه ألى عامله معاك الأصوات . و أنا متابع معاك أن شاء الله و ياريت تقولنا وصلت لأيه. نسيت أقولك بالمرة خلى الميكانيكى يقرط بمفتاح 17 على القنطرة ممكن هى ألى تعمل الطقطقه ، و كمان هاقولك تعمل حاجة تقتح الباب نص فتحة بتاع السواق و تحاول ترفعه لأعلى كذا مرة متتاله و تراقب طارة الدريكسيون لو بتتحرك يبقى أنت عايز لحمات فى الشاسيه و هو ده سبب الصوت مش القنطرة و بالتوفيق إن شاء الله

المشاركة الأصلية كتبت بواسطة mmd3

الحمد لله تم اصلاح المشكلة

كان هذا موجز الانباء واليكم التفاصيل

توجهت السيارة اليوم في تمام الساعة الثانية ظهرا الي ورشة الحاج (محمد سوستة ) وفعلا هو حاج وراجل كبير في السن ودة بعد ما قالي واحد صاحبي علية وقالي دة عندة خبرة كبييرة في العفشة وبقالة كتيير اوي شغال فيها وخدنا لية النهاردة

طبعا انا شرحت لة علي العيبين 1- الطقطقة في المناطق المكسرة 2- صوت احتكاك في المطبات

الراجل ركب جنبي وقالي اطلع سمعني الاصوات دي

وبعد ما رجعنا للورشة تاني نزل تحت العربية وبص عليها وقالي العفشة عندك تمام وزي الفل
انا فضلت اضحك اضحك وهو قالي بتضحك علي اية قولت لة ان حوالي 3 او 4 قبل منك بصو عليها وقالو العفشة تمام راح قالي يبقي العيب عندك مش هنا روحت قايل لة عيش براحتك في العربية لغاية لما تكشف العيب فين

انا لقيتة بيبص في الحوض وعمال يهز ويرج العربية انا قولت في عقل بالي الراجل دة بيدور علي اية في الحوض هما نقلو مكان العفشة وانا معرفش ولا اية

المهم بعد حوالي 10 دقايق كدة قالي خش اكسر الطارة للاخر شمال وبعدين قالي اكسر يمين وفي الاثناء دي كان هو ماسك حاجة في ايدة معرفش بيعمل بيها اية

سكت شوية وراح قايلي روح اشتري بطاحات وتعالي ... انا قولت لية بس الاحتكاك و الطقطقة من تحت

قالي مفيش حاجة عندك تحت بايظة وعشان كدة كل اللي هيبص علي العربية مش هيعرف ان العيب من البطاحات لانهم بيبصو من تحت وبس وطبعا بيقولو العفشة زي الفل

انا طبعا حسيت انة راجل عارف هو بيقول اية وعشان كدة متاكد انة العيب من البطاحات

انا جريت اشتريت بطاحات ب 100 جنية الاتنين وجبتهم وفضل يجي ساعة او اكتر يفك ويركب الجداد ولما طلعهم قالي انت حظك حلو قولت لة لية قالي دة البلي فالت من جوة وطبعا فهمني البطاحات دي بتعمل اية ولية مهمة جدا في العربية ولازم يتكشف عليها باستمرار لانها تعتبر رابطة الجنب والمساعد والسوستة في العربية ولما تبوظ ممكن لا قدر الله يحصل حاجة

طبعا طلعنا نجرب العربية علي المطبات لقيتها زي الحلاوة في البقلاوة بالبسبوسة

قولت لة تسلم ايدك و فضل الصوت بتاع الطقطقة هو بس اللي موجود ودة رجعنا تاني الورشة وفضل يدور برضو في الحوض وانا مستغرب اوي مع ان الصوت من تحت

قولت لة الصوت جاي من تحت قالي من عارف بس انا بدور علي حاجة مش في العفشة لان العفشة اللي تحت عندك سليمة

وفعلا بعد برضو 10 دقائق نزل تحت العربية وقالي تعالي وحط ايدة علي عمود الكوبلن الشمال وفضل يهز فية لقيت الصوت بتاع الطقطقة ظهر تاني

قولت لة امسك يا جدع ... طلع العيب في مشرشر عمود الكوبلن من جوة الفتيس والحل اني اشتري عمود استيراد بالكوبلن بتاعة وطبعا اشتريتة وركبناة والحمد لله الطقطقة راحت

فهمني بقي حاجة جميلة اوي .......ان ممكن الصوت يكون واحد بس العيب مش واحد
بمعني ان انت ممكن تكون بتسمع نفس صوت الطقطقة اللي انا بسمعة
بس حل العيب في عربيتك ممكن يطلع غير الحل في عربيتي بالرغم من انة نفس الصوت

اتمني ان يكون حد استفاد من الموضوع دة وانا كتبت بالتفصبببييييييييل عشان تبقو عارفين كل حاجة

يا باشا الف مبروك ان انت توصلت لواحد يهاودك و يعوضك عن اللى طنشوا وماعرفوش....ويجعله عامر

مبروك يا باشا حل العيب
وفعلا انا استفدت من الموضوع والنقطة الاخرانية منه مهمه جداااااااااااا
"فهمني بقي حاجة جميلة اوي .......ان ممكن الصوت يكون واحد بس العيب مش واحد
بمعني ان انت ممكن تكون بتسمع نفس صوت الطقطقة اللي انا بسمعة
بس حل العيب في عربيتك ممكن يطلع غير الحل في عربيتي بالرغم من انة نفس الصوت "

مين بقى محمد سوسته ده
او اروحله ازاى ؟؟

المشاركة الأصلية كتبت بواسطة khaled_sabry

مين بقى محمد سوسته ده
او اروحله ازاى ؟؟