لمبة البطارية منورة على طول

**ahmedyehia515** · 03-08-2010 10:46 PM

مساء الخير،

الموضوع بكل بساطة انى كنت خارج بالعربية باللبل ( العربية كنت لسه بيها الصبح و عامل مشاوير كتيرة) المهم بدور لقيتها مخنوقة أوى بدأت أزود بنزبن العربية فاقت بس لمبة البطارية فضلت منورة ، مشيت بيها شوية و قرصت عليها قلت ممكن الدينامو مش بيشحن بس برده فضلت موجودة، المشكلة انو نور التابلوه بس هوا اللى شغال بس العالى و الواطى لأه، طبعاً الوقت كان اتأخر و مفيش كهربائية فاتحين فقلت خلاص الصباح رباح

البطارية بقالها سنة معايا و مركب عليها زينون بكتاوت و الدينامو لسه كاشف عليه من حوالى 3 شهور و كان كويس، و المفروض انى كنت حعمل صيانة ال60,000 أخر الاسبوع .

أنا شخصياً شايف انو المشكلة فى شحن البطارية، يعنى يا الدينامو فى مشكلة ، يا سير الدينامو فيه مشكلة

ممكن حد يقولى لو فيه احتمالات تانى عشان مبحبش أروح للصنايعى وأنا مش فاهم الموضوع

و شكراً

**samirayad** · 05-08-2010 11:36 PM

غالبا كده فى مشكله فى كتاوت الدينامو

**ahmedyehia515** · 06-08-2010 02:38 AM

المشاركة الأصلية كتبت بواسطة samirayad

غالبا كده فى مشكله فى كتاوت الدينامو

aشكراً على رد حضرتك بس حتعبك معايا فى سؤال أخير.

هل تنصحنى أوديها للتوكيل ولا لورشة كهربا بره عشان أنا خايف انو التوكيل يقوللى الدينامو كله عايز يتغير عشان عادة صنايعية التوكيل مبيحبوش يشتغلوا فى الحاجت الصغيرة ؟؟؟

**samirayad** · 07-08-2010 06:07 PM

أى كهربائى شاطر

حيطلعلك العيب بسهوله

ولا داعى من الذهاب للتوكيلات

وممكن تلاقى العيب حاجه بسيطه ومش مستاهله

زى حتتين شربون عاوزين يتغيروا فقط

**ahmedyehia515** · 07-08-2010 08:44 PM

المشاركة الأصلية كتبت بواسطة samirayad

أى كهربائى شاطر

حيطلعلك العيب بسهوله

ولا داعى من الذهاب للتوكيلات

وممكن تلاقى العيب حاجه بسيطه ومش مستاهله

زى حتتين شربون عاوزين يتغيروا فقط

و الله لو كنت شفت النصيحة ده بدرى شوية ماكونتش روحت. أسوأ يوم فى حياتى و فى الآخر معرفوش يصلحوها و وديتها لكربائى فى الحرفيين طلعت المشكلة علبة الفيوزات اللى فوق البطارية و غيرتها بـ40 ج و 15 ج مصنعية

انما التوكيل ، بجد حسبى الله و نعم الوكيل ، لما أقف أعرف مهندس الاستفبال إيه يعنى لمبة البطارية منورة و لما العربية تفصل و أزوقها لحد جوه و مفيش حد ييجى يساعدنى و لما رئيس الصيانة ميعرفش اذا كانت العربية مسقطة موتور ولا لأه يبقى ده توكيل ارتوك. ان شاء الله حعمل موضوع منفصل عشان انا قعدت فى التوكيل من 8ص لحد 3:30م عشان أغير البطارية. بجد حسبى الله و نعم الوكيل

**ahmedyehia515** · 08-08-2010 05:58 PM

يعنى عشان انا شايف انو كل واحد طرح مشكلة للمناقشة فى المنتدى و عرق حلها لازم يقول فى نفس المكان إيه كان الحل عشان يفيد الناس زى ما فادته و عشان لو حد فى المستقبل حصله حاجة زى كده يبقى عنده فكرة بأغلب الاحتمالات.

المشكلة كانت انه لمبة البطارية منورة على طوول و النور مش بيشتغلو مع الوقت ابتدى الباور يفصل و بعدين فصلت العربية خالص.

الحل: فى علبة فيوزات فوق البطارية و جه غير العلبة اللى جوه العربية، العلبة ده فيها 3 فيوزات شبه الله جوه العربية و حواله 5 -6 فيوزات على شكل شريط طوله حوالى 8 سم و عرضه 1 سم و سمكه 1 مم . المشكلة انو كان فى واحد من الفيوزات العادية محروق و 3 من الشرايط محروقين و لما دورت عليهم عرفت ان الفيوزات العادية بتتباع بس اللى على شكل شرائط بتييجى مع العلبة الجديدة. جبت علبة جديدة استيراد بـ40 ج و ركبتها و المشكله اختفت. الغلطة اللى كنت عملتها قبل كده انم لما الفيوز اللى علك شكل شريط اتحرق الكهربائى قاللى انو هيغيره بسلك شعره يقوم بنفس الوظيفة و ده كان غلط لأنو الفيوز مظبوط على حاجة معينة و أكيد الشعره ده مش هتكون مظبوطة و هتسبب أضرار أكتر مما هتنفع. و يا ريت لو حد يعرف الفيوزات اللى على شكل شرائط بتتباع فين عشان أكيد مش كل مره واحد يتحرق هجيب علبة البطارية كلها.

التوكيل فشل انو يعمل كده و اللى حل الموضوع كان كهربائى فى الحرفيين ، المحل اسمه كهربائى عبد العال و الصنايعى اسمه محمد بس الحق يقال انا محستش انو شاطر بس هوا بيسمع الكلام، يعنى قولتله قيس شحن الدينامو و نشوف البطارية و وانا بشيل علبة الفيوزات شفت الفيوز المحروق و هوا اللى خد باله من الفيوزات اللى على شكل شرائط اللى محروقة. خد مصنعيىة 15 ج بس رغم انو قعد وقت فى العربية بس انا ايدته أفروول بتاع شركة كنت بدرب فيها فيعنى ممكن نعتبر انو كان بيرد الجميل

**al_ostaz74** · 09-08-2010 02:21 PM

السلام عليكم
على فكرة نفس المشكلة كنت بعاني منها. الحمد لله روحت لكهربائي جنب البيت شاب صغير بس ما شاء الله مجتهد ، و بعد ما طلعت عينيه في معرفة المشكلة اكتشف ان قاعدة الدينامو غير سليمة و غيرها. انصحك تروح لكهربائي كويس بدل التوكيل و مصاريفه الكتير. انا كلفني تغيير القاعدة بالمصنعية 100 ج فقط ، بس من ساعتها و الحمد لله مافيش مشاكل. و خللي بالك غالبا الدينامو بسبب المشكلة دي موش بيشحن اثناء وضع تشغيل السيارة و هي واقفة ، عشان كدة ممكن البطارية تنام منك بسهولة. و ربنا معاك