اخر الاخبار فى الاسعار اللى بقت نار

**badblood** · 03-03-2008 02:12 AM

والفاجأة ان العيش هيبقى على بطاقه التموين
ربنا يخليك لينا يالي في بالي ويحرسك لينا

**حماده عزو** · 03-03-2008 09:15 AM

ألموضوع اكبر من كده
ألخطوه الجايه ألغاء فئه معدومى الدخل من حسابات الحكومه
يعنى مشكفايه أن الناس عايشه على حد الكفاف لأ وكمان مش موجودين
فى حسابات الحكومه

..................... رايحه على فين يا بلد ................

**ehabradwan** · 03-03-2008 09:51 AM

يا جماعة والله فلوس دلوقتي مالهاش قيمة 500 او 600 جنيه في اي سوبر ماركت عشان حاجات تكفيك كام يوم بالعافية

**Mido80** · 03-03-2008 10:12 AM

بصراحة يا جماعة الموضوع بقي صعب جدا خاصة الاوضاع المادية والاقتصادية اللي الناس بتمر بيها. انا رايي بالنسبة لزيادة سعر حديد البناء واللي وصل سعرة ل 5500 جنية " ومش عارف لية" ان الناس اللي عمالة تبني عمال علي بطال ليل ونهار تخف شوية ونشوف هل السعر هاينزل ولا لا.

بالنسبة للطعام والشراب، انا من رايي الناس تعمل رجيم قاسي عشان من ناحية انة مفيد جدا والواحد كدة يبقي شكلة رشيق وحلو ومن ناحية تانية يحافظوا علي صحتهم. ما تشوفوا الاوروبيين ولا الفرنساويين ناس بتاكل علي القد لمن احنا ما شاء الله مابنرحمش.

سامحوني لو كان رايي دايق حد فيكم.. انا كمان محروق دي بس مش عارف اعمل اية.

حسبنا الله ونعم الوكيل

**DODY** · 03-03-2008 10:21 AM

احنا فى البيت كنا بنغير الزيت بعد كل قليتين وكنت بتهكم على الزيت اللى باشوفه فى محلات الفول والطعمية لكن دلوقت باقول للمدام اشتغلى بالزيت لغاية مايتبخر .. اشمعنى احنا منا شامم ريحة بخار الزيت جاى من المناور من عند الجيران

**Karim_Monir** · 03-03-2008 11:25 AM

لسه راجع من المحمل امبارح في زيارة اول الشهر
المدام : ناقص كذا وكذا وكذا
العبد لله : خدي المرتب كله وحاولي تكفي البيت اكل وشرب بس
المدام : والحل
العبد لله : اتصرفي بقي ان شا الله ناكل طوب
المدام : هو انت معرفتش ان توكيل الطوب خده عز وتوكيل الزلط خدة ابن ال ....
العبد لله : طب والتراب
المدام : بقم بيخلطوه في العيش عشان يكفي وبرضه الناس مش مكفيها
العبد لله : اروح الحق مدافن العيلة بقي احسن تتصادر مننا هيا كمان

سيناريو محتمل حاسس انه هايحصل قريب قوي قوي
الا لسه ماحدش عارف البلد رايحة على فين

**GoldenManEye** · 03-03-2008 03:02 PM

البلد رايحة تجيب أومو !

**ashour100** · 03-03-2008 04:04 PM

حتى هنا في السعودية الاسعار زادت جداً، كما تم زيادة الرواتب ب 5% "بدل غلاء المعيشة " للعاملين في الحكومة وتخفيض قيمة بعض المعاملات الحكومية.

ولكن يبقى الفرق في الدخل، وهل يتحمل غلاء المعيشة ام لا؟

أمثلة على الاسعار

5ك رز سابقا: من 10 :11 ريال--- حالياً من 15 : 16 ريال
2ك زيت ذرة 12 :13 ريال ---- حالياً من 16 : 17 ريال

والملابس وخلافه ....

جهة عملي في مصر عايزني ارجع فوراً وبترفض باستمرار تجديد الاجازة " أفلام ومسلسلات "

وكل ما افكر هرجع اعمل ايه ، اقول يا رب ، والحمد لله على كل حال.