رأي رااااااااااائعأنا عندي وجه نظر مختلفة شوية في الموضوع ده بعيدة عن الامريكي عشان معرفوش. أنا شايف إن السوق مفتوح ولو فيه شركة بتقدم منتج بينافس علي نفس جودة منتج تاني بس بسعر ارخص اكيد الارخص هيكتسح السوق. والتنافس دلوقتي علي ودنه في الجودة وخدمة مابعد البيع وطبعا اقدم كل ده بسعر منافس. ومحدش بيعتمد في تسعير حاجته دلوقتي على السمعة. المستهلك مبقاش ياكل من موضوع Made in X كله بيدور علي منتج كويس بسعر منافس.
العربيات الأروبي بتنفس بعض جامد ومفيش شركة فيهم مبالغة في اسعارها وإلا اخواتها هاتاكل منها السوق. بس هي مش قادرة تنزل السعر عن كده عشان العربية الأروبي مصروف عليها أو مخدومة زي مابيقولوا. يعني مدفوع عليها سنين بحث وتطوير في جودة مواتير ونظام تعليق وناقل حركة والشسيه والأمان ولازم تستخدم خامات معينة عشان هيئة الأمان والسلامة بتاعتهم والمستهلكين اللي مابيعجبهمش العجب وعايزين مستوى معين من العزل والتقفيل ( رغم إن Proton هنا مستوردة بالكامل حد سمع عن Gen 2 بره الMulti-Function بتاعها بيعلق ). فـالعربية الأروبي مش عارفة تبقي ارخص من كده. وهي مبسوطة كده وليها زبونها اللي عايز الجودة ديه والتكنولوجيا ديه ومستعد يدفع السعر ده مقابل الحاجات ديه ( مش اسم والسلام ).
الياباني زمان عمل زي الصين دلوقتي حاول يقدم حاجة بجودة أي كلام بسعر منافس جدا. اتفقس بسرعة وطلع عليه سمعة زبالة. فـاضطروا يقدموا جودة كويسة بسعر رخيص ويخسروا عشان السمعة ودلوقتي الياباني سعره بقي زي الأروبي لما حب يوصل لنفس مستوى الجودة.
الكوري بقي لعب على نقطة أنا في الأول مش هطور حاجة أنا هاشتري من اليابان تكنولوجيا الجيل السابق ,اجمعها بخامات مقبولة وأنزل بسعر منافس لو حاولوا يوصلوا لنفس دقة وتكنولوجيا اليابان هيوصلوا لنفس سعرهم. السوق مفتوح. والموضوع فعلا مش حكر على حد بس فيه شركة بتصرف على عربيتها وده هيتضاف علي سعرها وشركات مش بتصرف زيها.
والفرق باين ل اللي بيركب ده وده وبيقدر الحاجات ديه. اللي مش فارق معاه مثلا تكنولوجيا نظام التعليق ( دايما بيمشي هادي ) أو جودة التقفيل أو العزل ( مش لازم العربية تكون مقفولة 100% يعني مفيش مانع التغاضي عن سرسوب هوا مش هتحس بيه) ولا هيفرق مثلا موتور معين ولا فتيس CVT مثلا ( ماله الاوتوماتيك العادي مش بينقل يعني زي اخواته ), مدي إن قطعة الغيار متحملة ( هي اصلا رخيصة لما تبوظ اغيرها تلات مرات بتمن مرة من الالماني أحسن ), ولا إن العربية نسبة اعتمدتها عالية ( مركز الصيانة والميكانيكية اللي فاهمين ماليين البلد لما يحصل حاجة ألف مين ينجدني ) اللي مش فارق معاه الحاجات ديه يبقي الكوري بالنسباله أحسن حل واللي ممكن ياتغضي سِنة كمان ممكن يجيب صيني. العربيات ديه جودتها مش ضايعة ( العلم التقدم خلاص ) بس هي جودتها على قد فلوسها إلا بقي لو لقوا حاجة اليابان ولا أروبا معرفتهاش بعد سنين البحث والتطوير ( وده مش عيب كلنا بشر ) تقدم نفس الجودة أو اعلي بسعر رخيص وده لو حصل احتمالاته بتكون قليله.
النقطة بس إن فرق الاجتهاد وسنين البحث لا يمكن ننساها. فرق السعر ( اللي مش عشان اسم والسلام اصل اللي بيعمل كده محدش بيشتريه ) برده مينفعش ننساه. السؤال بقي اللي ممكن نتكلم فيه هو الفرق مستاهل؟ وده اعتقد بيتم الاجابة عليه في قسم المقارنات بكل حيادية في حالات محددة. انما في العموم أنا وجهة نظري إن الصناعة الأروبية سبقت الياباني وفرقت في الجودة والتكنولوجيا وليها كل احترام وتقدير ومستمرة في الحفاظ علي مركزها وسايبة فارق (لحد دلوقتي هما ناس مجتهدة ومناموش علي اللي عملوه اجدادهم زي اللي عمالين يقولوا احنا سبع تلاف سنة بتنجان). والياباني بدوره متقدم علي الكوري. والكوري متقدم علي الصيني والصيني متقدم علي اللي مابتداش اصلا.
المفضلات