جديد بينكم ..واسفسار

السلام عليكم ورحمه الله




يمكن ده اول موضوع ليا معاكم




وحكايتي اني حجزت لوجان كامله فيراني من 3 ايام


عن طريق البنك بنظام المرابحه الاسلاميه


وطبعا الورق والمعاملات بياخد وقت والمفروض اني استنى لحد الاحد الجاي الاستلام باذن الله


وخلال اليومين دول قلت اخش عالنت اشوف ايه الكلام عن اللوجان


وبصراحه لقيت القسم الرائع ده واعضاؤه اللي فعلا عاملين مع بعض اسره واحده بشكل جميل وراقي جدا


فحبيت اني انضملكم....


وكان ليا استفسار لحضراتكم وهو ان انا من الاسماعيليه والناس قالولي في المعرض ان العربيه هتيجي من القاهره


سواقه مش محموله على عربيه لانها جايه بالطلب وانا كنت شفت في كلام احد الاعضاء ان مش كويس تاخد العربيه عامله اكتر من 15 كيلو مثلا


فبصراحه انا قلقت من الموضوع ....


مش عارف حضراتكم شايفين ايه؟؟...

أسألهم ان كان ينفع انك تنزل القاهرة تستلمها بنفسك من هناك و تسوقها انت للاسماعيلية براحتك

لان فعلا المندوبين دول مش حايخافوا على عربية زبون و عاوز يوصل بسرعه و يخلص حايجري بالعربية و يقرص و لا حايهمه

بارك الله لك فيها و رزقك خيرها ..........

واهلا بك مع اخوانك ....

الموضوع دة غريب نوع ما .... اسماعيلية فوق 120 ....

المهم ...

انا رايى ما دام انت جبتها من معرض ....

فتعامل معاها على كدة ... يعنى تستلمها على حالتها الكويسة وكل حاجة مضبوطة

موضوع العداد انا شايف انه مش مهم ... فى حالتك انت بس

المهم مايعديش مشوار القاهرة اسماعيلية ....

مش اللى يجيبها لك يكون اتفسح بها يعنى ....

وعلى كل حال لو فيها حاجة ما تستلمهاش

أولا مبروك مقدما
ثانيا منصحكش خالص تستلم العربية بعد محد يسوقها 120 كيلو انا مش هحكيلك بشوفهم بيعملوا إه فى العربيات متستلمش على كده اطلب انها تتنقل على ونش على حسابك احسن 100 مره من إن حد يسوقها وهوه جاى او انزل استلمها بنفسك احسن

المشكلة مش فى العداد المشكلة فى طريقة القيادة فرك ونحر للماتور للصبح وطبعا هى العربية مش حيحصل فيها حاجة لانها لسة جديدة
بس الاحسن تستلمها انت بعدد قليل من الكيلوات حتى لو حترفعها على ونش على حسابك او تستلمها من اقرب فرع للتوكيل
والف مبروك وربنا يباركلك فيها

شكرا للاخوه الكرام على سرعه تجاوبهم

وان شاء الله هحاول مع المعرض انو يجيبها ونش...


وكان ليا استفسار تاني ...




هوا في فرق بين اللون الفراني والبترولي


ولو فيه فرق ممكن اشوفلوهم صور؟


متشكر جدا لحضراتكم

الفراني بيبقى فضي غامق (رمادي ميتاليك) البترولي بيبقى اقرب للكحلي الميتاليك

الفيرانى بتاع اللوجان قريب من الاسود.البترولي درجة بين الازرق الغامق والرمادى,الفيراني بيدي فخامة اكتر للعربية .

ضروري جدا تروح تستلمها بنفسك لان السوائين اللي بيطلعوا بالعربيات ما عندهمش ضمير علي سبيل المثال انا شوفت اكتر من مرة سوائين بينقلوا عربيات زيرو من الاسكندرية الي القاهرة او العكس بيخشو الببنزينة اللي علي طريق القاهرة الاسكندرية الزراعي ويحطو فيها بنزين 80 ومايهمش ايه اللي يحصل في العربية المهم انه يكسب كام جنيه وعموما الف مبروك وربنا يبارك لك فيها

اقتباس:

---

المشاركة الأصلية كتبت بواسطة ringoo

المشكلة مش فى العداد المشكلة فى طريقة القيادة فرك ونحر للماتور للصبح وطبعا هى العربية مش حيحصل فيها حاجة لانها لسة جديدة
بس الاحسن تستلمها انت بعدد قليل من الكيلوات حتى لو حترفعها على ونش على حسابك او تستلمها من اقرب فرع للتوكيل
والف مبروك وربنا يباركلك فيها

---

1+1+1+1+1+1+1+1+1+1

ألف مبروك ربنا يباركلك فيها ويكفيك شرها لازم تنزل تستلمها انت من مصر ما حدش هايخاف على عربيتك زيك
ويا ريت تقول لنا تفصيلات الشراء بنظام التقسيط الاسلامي دفعت كام والباقي قد ايه والفائدة قد ايه وفيه حظر بيع ولا لا كل التفاصيل يعني :verygood::satelite:

بخصوص سؤالك علي الالوان هتلاقي صورة مرفوعة للبترولي زي ما هوه في الطبيعة في نفس القسم صفحة 14 تحت موضوع(االنبيتى ام البترولي)