الموضوع: تقييم شامل للإلنترا بعد صيانة ال 10000 كيلومتر

كان نفسى اعمل التقييم ده بدرى شوية عند 5000 او كده يعنى بس للاسف ماكنتش فاضى خالص
عموما كلنا عارفين و حافظين الشكل الخارجى للعربية عشان كده هادخل فى التفاصيل على طول
العربية اللى معايا اول فئة اوتو

أولا : الصالون

العربية الحمدلله واسعة مقارنة بالعربيات اللى فى فئتها يعنى هى اوسع من اللانسر بومة شوية بس مش كتير و اوسع من الصنى بمراحل بس اكيد مش فى وسع الكارينز او الماتريكس خاصة فى الكنبية الخلفية
غير كده شكل التابلوه و اللون الازرق فيه مريح جدا للعين بعكس النور الاحمر اللى نازل فى العدادات الجديدة فى البوما اللى مقلق جدا و بجد بيخلى عين الواحد تزغلل بعد مايسوق العربية فترة ده غير انك ممكن تعلى او توطى نور التابلوه من زرار موجود على شمال الدركسيون فى التابلوه
امكانية التحكم فى الطارة و تغيير وضعها على حسب مانت عايز فى سواقتك
مسند اليد ده بقى حكاية .... مستواه مريح جدا وضع اليد عليه و مريح جدا فى السواقة على الطرق و المسافات الطويلة
اماكن التخزين بقى كتير .... درج التابلوه صغير مش كبير بس فيه مكانين تانيين صغيرين واحد فى التابلوه من فوق و واحد تحت الكاسيت
العربية فيها العدادات الجديدة من غير مؤشر حرارة (بقت لمبة ) و فيها مخرجين كهرباء واحد للولاعة و واحد زيادة
الكاسيت شغال معايا الحمدلله كويس هو اسطوانات و MP3 و ال usb تمام بس فى ناس كتير كان جايلهم الكاسيت بايظ او باظ بعد الاستعمال شوية بس الحمدلله الكاسيت معايا كويس قوى و الصوت معقول جدا من 4 سماعات فى الابواب هو مش نقى قوى بس نقدر نقول اكثر من جيد
الخامات فى التابلوه حلوة جدا معظمه جلد بعكس السيراتو اللى كله تقريبا بلاستيك فيها بس طبعا ده بيرجع لمواصفات العربيات اللى بنستوردها غير كده الخامات التانية فى الابواب و بقيت العربية احسن بس طبعا شكل تابلوه السيراتو احسن

ثانيا : الاداء

العربية ماشاء الله ناعمة جدا جدا جدا جدا
الباور الكهرباء حكاية لواحده .... سمعت عنه كلام كتير عشان كده جربت العربية كذا مرة قبل ماشتريها و اتأكدت بنفسى ان كل ده كلام فاضى و لخلاصة فى الموضوع ده .... الباور ناعم جدا و العربية واقفة و كل مابتمشى و تزيد سرعتك كل مايتقل معاك لحد اما تعدى 70 كيلو/ساعة بتلقيه تقريبا شبه محجر و لو بتاخحد ملف او حاجة بيبقى عايز يرد لوضعه الاصلى بسرعة
العربية ماشاء الله اداءها جميل على الطريق ... و انا من هواة الجرى طالما الطريق فاضى بس مابتهورش يعنى لما باجى اعدى حد بنزل بسرعتى و لو فيه ملف جامد شوية بنزل بالسرعة برده ل 90 و عمرها ماكسفتنى فى موقف على الطريق او حاجة ..... افتكر انى كلت بيها مطب مرة على طريق دمياط الزراعى (طريق زبالة زبالة يعنى ) و العربية بعد ماعملت الصيانة مالقتش فيها اى حاجة
العربية سحبها ممتااااااااز .... طلعت بيها من سيراتو و بوما و اوبترا و كورولا و فانتزيا و كلهم عربيات جديدة بس ماجربتش مع السيفيك ,,, بس اللى سدت معايا فعلا الفيرنا بس كانت ظروف الطريق مش مساعدة لينا نجرى براحتنا عشان كده المفروض هانشد مع بعض تانى بس لما تيجى مناسبة و هابقى اقولكوا ايه اللى حصل
نيجى بقى للمطبات .... العربية عالية عن الارض و انا راكب لواحدى او حتى معايا حد جنبى و واحد ورا انما مع التحميل فى الكنبة بتوطى بشكل رهيب من وراء بمكن ده عشان عفشتها ناعمة قوى و ده طبعا عامل مشكلة كبيرة جدا فى المطبات
الفتيس الاوتو جميل و نقلاته ناعمة جدا و تكاد تكون ماتحسش بيها و الكيك داون رهيب فعلا ..... بتحس ان العربية بتطير منك ....
تسارع العربية من 0 لحد 120 ممتاز و بعد ال 120 يبدأ يقل شوية بس مش قوى لحد 170 كده و بعدين يقل كتير شوية لو بتزيد عن كده
التكييف جميل و فعلا تلاجة .... اول اما جبت العربية كان مش عاجبنى بس بعد 5 او 6 الاف كيلو بدأ يبقى ساقع جدا لدرجة انى بقيت بشغله لو راكبين 5 فى عز الحر على 2 بس و بالليل بشغله على 1 و ببقى مقلل قوة التبريد لأنى بسقع منه فعلا .... طبعا التكييف بيأثر على سحب العربية بس ده بيبان قوى للى مركز معاها او اللى غاوز جرى لانه مش بيأثر على الحسب قوى الا فى الرعات العالية بالذات .... انما لو سواقتك هادية عمرك ماهتحس بالفرق ده
اعلى رعة جبتها بالعربية كانت 195 و كانت على الطريق الدورى فى الوصلة من كفر الشخ لجمصة عشان الاسفلت هناك كان حلو قوى .... و الطريق كان واسع و فاضى بس مش عارف ليه مارضتش تزيد عن كده برغم ان كان لسه فيها كتير اعتقد
صوت الموتور هادى جدا و مش مسموع لحد RPM 2.5 و لما بتزيد عن كده بيبقى ناعم و واطى قوى لحد 4 و بعد كده يبدأ صوته يعلى معاك بس برده بيبقى صوته جميل .... بس العزل ممتاز و لو قافل الزجاج بتبقى فى جو تانى خالص مش حاسس بأى حاجة بره العربية و دى من احسن الحاجات فى العربية
تفصيلة العربية حلوة قوى بس متأخرة شوية بتبقى عند 6.5 RPM
استهلاك البنزين حاسس انه عالى شوية بس يمكن عشان انا بجرى ... عموما هى تقريبا بتاخد 10 لتر لكل 120 كيلو عالطريق مع التكييف .... هاحسبها بالظبط و ابقى اقولكوا عليها كام

عفشة العربية ناعمة جدا و مريحة جدا بالذات للى قاعدين ورا عشان هى multi link مش زى السيراتو النيو اسكنت مثلا ... انا بتبهدل لما بقعد فى العربيات دى ورا
الفرامل جميلة و بتستجيب لاقل لمسة و لو دست فرامل و انت سايب الركسيون عمر العربية ماتحدف منك لا يمين ولا شمال بس اكيد لو كان فى ABS كانت هاتبقى احسن
العربية مافيهاش اى حاجة من وسائل الامان زى ال ABS و ال EBD و ال Airbags و تكاد تكون متنفضة من اى اوبشن فيها
العربية مافيهاش وحدة رفع للزجاج بعكس موديل 2009 كان فيها بس هانقول ايه لغبور
الشنطة ملعب ... واسعة جدا بس ارضيتها من فوق الشكمان بتدفى شوية
و دى درجات هاحطها للعربية و ده رأى شخصى ليا

الشكل الخارجى -------------- 8
الصالون -----------------------8.5
الموتور و السحب --------------9
الكماليات ----------------------7
العفشة -----------------------8
الثبات على الطريق ----------8
استهلاك البنزين -------------7.5
متعة القيادة -----------------9
سعر و توافر قطع الغيار ----9.5

المشاركة الأصلية كتبت بواسطة mohamedassy

ولا اى موديل النترا كان فية وحدة رفع نزلت غبور قبل كدة ولا انت تقصد الخليجى

لا انا اصحابى معاهم موديلات 2008 و 2009 و العربيتين غبور و نازلين بوحدة رفع
ماعرفش بقى 2007 كان نظامها ايه