الموضوع: صدأ المياة الخضراء

المشاركة الأصلية كتبت بواسطة ehab3ma

طيب ياباشاياريت الطريقة لان انا بثق فى كلامك

ربنا يباركلك ياريس

هو الموضوع بمنتهى البساطه بيكون كالأتى :-

- العربيه بتكون دايره و بحرارتها العاديه وطبعا مفيش مراوح شغاله ولا اي حاجه , يعني حراره معتدله
- القربه فيها خرطومين يمين وشمال (وانت في مواجهه الكبوت) , هتفك الخرطوم اليمين , اللي هو جاي من الريدياتير للقربه
- تبدأ تزود ميا من القربه عادي , وطبعا الميا دي هتنزل من القربه تروح للريدياتير , وهي في مرحله الرجوع بتنزل على الارض من الخرطوم المفكوك
- لما تلاقي الميا لونها بقه صافي ورايقه , تركب الخرطوم مكانه , ونبدأ المرحله الجديده من التنضيف
- حط كوبايه خل أو اقل في القربه , وخلي مستوى الميا عند المستوي الطبيعي , وسيب العربيه شغاله 10 دقايق مثلا , و وظيفه الخل هو انه بيفوور الاملاح والصدأ (البسيط) الموجود في دائره التبريد , وطبعا اثناء المرحله دي انت بتكون قافل غطاء القربه وبتزود بنزين شويه عشان تدفق الميا في دوره التبريد يكون قوي , ويساعد الميا والخل على اذابه الاملاح
- بعدها افتح الغطاء بالراحه , بس خلي بالك اوعى تكون المراوح شغاله !!!!
- فك نفس الخرطوم تانى واعمل نفس اللي عملناه في البدايه خالص وزود ميا , لانك هتلاقيها منزله شوائب ولون تاني
- لما الميا توصل لمرحله الشفافيه تاني , خلي الخرطوم مفكوك زي ما هو وإبدا بتزويد ميا خضرا من النوع الاسباني اللي كنا قولنا عليه ,, iada جيركن 5 لتر بـ 25 جنيه , وانا بقولك خلي الخرطوم مفكوك لانك في البدايه هتلاقي لسا في رواسب ميا عاديه بتنزل لانها كانت متحوشه في البلوكات
- اول ما تلاقي الميا اللي نازله من الخرطوم لونها هيبدأ يبقا اخضر , ركب الخرطوم تاني , وزود ميا خضرا لغايه لما توصل للمستوى الطبيعي بتاعها
- بعدها بإذن الله هتلاقي دوره التبريد على نفس اللون لمده مش اقل من شهر او شهر ونص

انا دايما بنضف الريدياتير بالطريقه دي والحمد لله النتيجه مرضيه , وفي جزء من كلامي انا عامله باللون الازرق عشان اقولك انك ممكن تركب الخرطوم وتزود ميا خضرا على طول والطريقه دي هتاخد حوالى 4 لتر ميا خضرا , ولو سبت الخرطوم عشان تطرد الميا في البلوكات هتاخد منك ميا خضرا اكتر من الـ 5 لتر تقريبا

اهم حاجه تراعي انك متفتحش غطاء القربه ابدا والمراوح شغاله , ومتطفيش العربيه ابدا طول ما انت بتزود ميا

وممكن تستخدم مع الخل مذيبات الاملاح والصدأ الجاهزه , بس نصيحه بلاش لانها شديده على مواسير الريدياتير

اتمنى اكون قدرت اوضحلك الموضوع بشكل مبسط :-) وعلى فكره الحكايه كلها مش بتاخد غير نص ساعه او اقل :-)