الموضوع: يبقى انت اكيد فى مصر

هو الموضوع جميل قوي بس مش عارف انت قصدك تريقة ولا بجد اصل شوية احس انك بتتريق و شوية احس انك بتمدح
بس في النهاية مشكووووووووووووووووور علي الموضوع الجميل

المشاركة الأصلية كتبت بواسطة ghabbour

إنك ممكن تقفل الشارع بمزاجك من غير ما حد يعترض

ياباشا هى دى الحرية اللى بيحسدونا عليها بلاد بره
بيقولولى هنا عندكم ممكن تعمل اللى انتى عايزة اما هنا noway

فى حالة لو عندك فرح ممكن تقفل الشارع من غير ماتسيب ممر للناس تروَّح علشان مافيش حد أصلا هيروَّح قبل الفرح مايخلص.

قصدك مفيش حد هيروح قبل ما يدفع النقطة

مصر هيا البلد الوحيده اللى ممكن تلاقى فيها سواق تاكسى يركِّبَك ببلاش ( حدث بالفعل مع كاتب المقال منذ عدة سنوات ،نتيجة لظرف ما كان يقف مفلسا فى جسر السويس يحلم أن يصل إلى مقر عمله فى وسط المدينة ، استوقف سائق تاكسى و سأله لو ينفع يوصله و يكسب ثواب، فنظر له سائق التاكسى من أعلى إلى أسفل ثم قال له إطلع ، وفى الطريق صارحه السائق بأنه قبل أن يوصله مجانا لأنه كده كده نازل وسط البلد ولأنه استريح له..هكذا و ببساطة).

يا باشا السواق عمل بمبدء هنيالك يافاعل الخير ومن قدم شئ
بيداه التقاه وهنيالك يافاعل الخير

لو ركبت تاكسى و فى جيبك شريط بتحبه ممكن تديه للسواق يشغله (وممكن كمان..علّى يا اسطى)،و سيزيد حماس سائق التاكسى لتشغيل شريطك إذا كان كوكتيل شعبى حيث العنب و المولد وقوللووه ،أو إذا كان خطبة عن عذاب القبر.

ودا بقئ اكتر شئ مش فاهمه فى الشخصية المصرية يعنى ممكن
يسمع شريط عذاب القبر وبعد ما يخلص الشريط تلاقيه مشغل
وشربت حجرين على الشيشة

مصر هى الدولة الوحيدة التى تعرف فيها هتدفع كام قبل ما تركب التاكسى(فى أوربا والدول المتقدمه زى دبى مثلا فيه حاجة اسمها عداد)، هناك أشخاص يعتبرون سؤال سائق التاكسى (هتدفع كام) هو سؤال بجح، لكن وبشكل عقلانى هو سؤال يضمن (حقكوا انتوا الاتنين).

مش بقولك احنا سابقين الناس التانية بمراحل يعنى أنت بتحدد مع السواق هتدفع كام ودى شئ ايجابى فى القاهرة هتقولى ليه يا سابق
عصرك وأوانك ... هقولك علشان لو فى عداد وحظ حضرتك طلع مهبب ومعدى وزير ولا واقف فى الزحمة لاي سبب
هيفضل العداد يعد يا معلم وادفع انت بقى يا نجم انما فى الحالة الاولى انت محدد الاجرة ومش مهم عندك يقف يمشى يتنطط على
الحيط اللهم لو زهقت انت ودى مشكلتك

مش كل مرة تتقفش فيها مخالف هتتسحب منك الرخصه، وده أوبشن متاح فى مصر بس ، وعلشان رخصتك ماتتسحبش عندك كذا طريقة أشهرها أنت مش عارف أنت بتكلم مين لكنها مش دايما مضمونه وممكن تقلب بغم.

وأسهلها إستعطاف أمين الشرطة و تبرير خطأك كطفل أمه قفشته بيعاكس بنت الجيران مع التأكيد على إنك مش هتعمل كده تانى و الإكثار من معلش و نهارك ابيض يا باشا.

و هناك الطريقة الأكثر فعالية وهى إنك تحط بين رخصة العربية ورخصة السواقة ورقة بعشرين.

بالنسبة للرجالة الطريقة دى فعالة
للنساء عيطى شوية وانت هتاخدى الرخصة

معظم أصحاب السيارات الصيّع فى مصر معهم خريطة بها الاماكن (اللى ينفع تركن فيها صف تانى من غير ما تتكلبش، حيث أن الكلابشات ليست متوافرة فى كل الشوارع)

ودا يثبت ان احنا انتصرنا على شركة GPS لان مفيش عندهم
الاوبشن دا فى الدليل الصوتى

لدينا أيضا ميزة أن للكلبشة مواعيد عمل رسمية نعرفها جميعا و تجعلك تركن سيارتك صف تانى أمام سنترال التحرير فى الثالثة صباحا وانت متطمن.

ودا لانك بتابع الاخبار اللى بتهمك وبس كمصرى
يعنى يقوللك ازمه عالمية بالتقلية تقولهم ولا يهمنا احنا اللى
أثرنا فى الازمة

المشاركة الأصلية كتبت بواسطة ghabbour

الجزء الثانى

لدينا ميزة إنك ممكن تفتح الإشارة بالضغط على أمين الشرطة عن طريق الكلاكسات، فى الواقع لدينا ميزة أخرى أهم تدل على أننا نعيش أجواء ديمقراطية وهى أن الواقفون فى الإشارة لديهم الحق فى تحديد الوقت المقبول للوقوف فى الإشارة وعندما يتم تجاوز هذا الوقت تبدأ زفة الكلاكسات.

هنا امين الشرطة بيلبى مطالب الجماهير العريضة مش معقول يعنى يستحمل الصداع بتاع الكلاكسات
هيفتح الاشارة ويدعلى عليكى الهى تولعوا يا بعدا وبالمرة ياخدوا نمرتين مخالفة اسمه عمل شغل برضة

لدينا ميزة اخرى وهى إنك ممكن تشترى سارينة إسعاف و تركبها فى عربيتك، و ستساعدك كثيرا فى إختراق الزحام، لإن الناس يفسحون الطريق تلقائيا عند سماع السارينة (حتى لو ماشافوش فى المراية اى عربية إسعاف ).

لدينا أيضا ميزة الإلتصاق بسيارة إسعاف حقيقية (لو ماعندكش سارينة)، الإلتصاق بسيارة الإسعاف سيجعلك تصل أسرع ، احيانا تحدث مناوشات بين سائقى السيارات حول من يستحق أن يلتصق بالإسعاف، وهناك نوع من السائقين فى منتهى خفة الدم (بيعملوا نفسهم قرايب المريض اللى فى عربية الإسعاف).

لدينا ميزة لا نراها هى فى حد ذاتها ولكن نرى آثارها فى الشوارع بسهولة، ميزة الميكانيكية المهرة الذين يسمحون لسيارات عمرها الإفتراضى إنتهى منذ سنوات بعيدة أن تستمر على قيد الحياة وتنافس سيارات الألفية الجديدة فى شوارع القاهرة(يعنى فيه ميكانيكية ممكن يخلوا عربيتك تعيش خمسين سنه على الأقل)، القاهرة هى العاصمة الوحيدة التى سترى في شوارعها سيارات موديل أوائل الستينيات ((r 1100، وأوائل السبعينيات (فيات 124)،و نهاية السبعينيات (فيات 132)، وبداية الثمانينيات (الفيورا طبعا).، ناهيك –حلوه ناهيك دى- عن السيارات ابنة فترة الاربعينيات والتى أصبحت قطع تاريخية نراها على فترات فى شوارع الزمالك والمهندسين.

ياباشا من فات قديمه تاه ... يعنى معقول ارمى عربتى اللى ورثتها من المرحوم ابويا اللى ورثها من المرحوم جدى دا حتى رحيتهم فيها
دا انا حتى ابقى قليل الاصل وبعدين الناس بتفضل القديم خوفا من العين ودا برده ميخليناش ننسى
المكانيكية اللى ايدهم تتلف فى حرير


ممكن الناس تركب فى شنطة العربية الملاكى لو العربية مليانة ، وهو مشهد له وقع طريف على من يراه، وهناك من يركب إلى جوار سائق الميكروباص (على شمال السواق)،و هناك المقعد الامامى الذى يتسع احيانا لثلاثة اشخاص(اتنين جنب بعض وواحد على رجلهم شويه وعلى التابلوه شويه)،وهناك المجانين الذين يجلسون فوق شنطة السيارة وهى مسرعة،وهناك الموتوسيكل الذى يحمل اسرة كاملة، لدينا ميزة الناس اللى بتشيل بعض فى (الزنقة).

فى رأى المتواضع هوا دا مفهوم الاشتراكية رغم ان احنا دولة بتطبق الرأسمالية ... يعنى مشتركين مع بعض
فى كل حاجة الناس بتركب مع بعض لو مش معاك فلوس تحاسب نتيجة انك اتسرقت او بتستهبل ومش عايز تتدفع
هتلاقى الناس بتلملك وتدفعلك ... شوفتو اكتر من كدا اشتراكية
لما الحكومة تمد ايدها فى جيبك وتاخد منه شوية وانت مش قادر تتكلم .... دى كمان اشتراكية ... مشارك الجكومة بفلوسك فى مشاريعها الناجحة

لدينا ميزة روح التعاطف المختلطة بالأمومة، يعنى لو ماشى بعربيتك و كاوتش عربيتك نايم شويه او نص نايم او حتى مهوّى،هتلاقى كل العربيات اللى بتعدى عليك بتهدى جنبك وكل اللى فيها بيشاورولك على الكاوتش ، وهناك من هم متأججى المشاعر الذين يطاردونك حتى يلحقون بك (و بيكسروا عليك علشان يلفتوا نظرك ....الفرده اللى ورا عايزه تتزود).
النقطه السابقه نفسها تتكرر لو كنت ماشى بعربيتك وفيه باب من ابواب العربية مش مقفول كويس.
النقطة السابقة نفسها تتكرر لو ماشى وغطا تنك البنزين مفتوح.

قلبنا على بعض

تابع لروح التعاطف والأمومة ،إذا كنت على كورنيش المعادى او الأتوستراد او الطريق الصحراوى ، ولاحظت أن السيارات القادمة فى الإتجاه المقابل كلها بدون استثناء (عمّاله تقلّب لك نور) ، ستعرف فورا (إنه فيه رادار أو لجنة رادار على الطريق) و أن تقليب النور ماهو إلا تحذير أمهاتى إنه (خُد بالك يا بنى و على مهلك).

ما قولتك قلبنا على بعض انت لية مش مصدقنى

من اجمل ما فى الشارع المصرى تلك الجمل التى نراها مكتوبة على السيارات بكافة الأنواع،وهى مليئة بالحكمة احيانا ( السعادة فى الرضا)، وبالوقاحة احيانا (صغير بس يحيّر)،و بخفة الدم احيانا (المجروحين يمسكوا يمين)،و بالطيبة احيانا (يا بركة دعاكى يا أمى)، و بالمياصة أحيانا(من حق الكبير يتدلع)،و بالغموض أحيانا (للكبار فقط).

طيب مش بذمتك بتقعد تضحك والضحكة طالعة من قلبك يعنى الناس فى كل دول العالم بتقبى متعصبة وهيا سايقة وانت عمال بتشوف كلام بيضحك والله
انتوا شعب بيكره النعمة


من اجمل ما فى الشارع المصرى روح التعاون ، وتتجلى هذة الروح فى (ورطة الزق)، فعندما تعطل سيارتك وتطلب من أقرب مجموعة أشخاص أن (يزقوك) سيستجيب لك الجميع فورا..ولكن لأى مدى؟، لأبعد مما تخيل، فالشخص الذى تورط فى أن يزقك لن يتخلى عنك حتى تدور سيارتك وتنطلق مسرعا ملوحا له بالشكر من شباك سيارتك، لكن من الوارد أن تستمر عملية الزق لمسافة طويلة تجعلك تشعر بالإحراج ،ومن الوارد أن تتوقف العربية مرة أخرى فتنزل من سيارتك وعلى وجهك ابتسامة بلهاء فتجد الأشخاص الذين قصدتهم من قليل يعودون إليك مرة اخرى و يواصلون عملية الزق لدرجة تجعلهم يبتعدون عن المكان الذى كانوا يقفون فيه بمسافة تحتاج لمواصلتين علشان يرجعوا لها ...بس الجميل فى مصر إنه مش مهم الناس دى مشيت معاك لحد فين المهم عربيتك تدور وتمشى وترحمهم من الورطه اللى حطوا نفسهم فيها.


دى بقى اقترح ان يتعمل عليها رياضة وتتدرج ضمن الاوليمبياد واوكدلك
ياسيدى ان احنا هنفوز فيها الاول بلا منافس

المشاركة الأصلية كتبت بواسطة ghabbour

الجزء الرابع

البلد لا تنام وتعمل 24 ساعة ، وهى واحدة من اهم مميزات الشارع المصرى ، فأنت تستطيع ان تشترى اى شىء فى أى وقت بداية من الدواء نهاية بالحشيش (اللى هو دواء برضه)،وأضف إلى القائمة خدمات علاجيه ومحلات السوبر ماركت و مطاعم ومحطات بنزين وبائعى صحف و عربيات فول و محلات عصير ومقاهى و اقسام شرطة و كباريهات لو عايز.

دى بقى اتكلم فيها بجد فعلا الحاجة الوحيدة اللى بتوحشنى فى مصر فعلا لو جعان باليلل او عايز تتمشى هتعملها فى اى وقت لكن هنا فى روما صعب اوى ومش بس روما فى دول اروبية كتير بعد 10 باليل مفيش حد كل واحد فى بيتة
يا نايم يا بياكل علشان عندة شغل تانى يوم