الموضوع: انا سوقت سيريون

باركولي
مش عشان اشتريت سيريون ولا حاجة
هو مشروع مؤجل شوية على الأقل سنة لو كتب لنا العمر
امبارح كان لي تجربة مع السيريون
شفتها
ولمستها
وسوقتها كماااااان :)
تجربة جميلة أوي
الأول لازم تعرفوا الباكجرواند بتاعتي
اولاً انا متعلم السواقة مبقاليش 8 شهور
وعربيتي الحالية هي نصر 128 ومبقالهاش معايا غير 8 شهور برضة
يعني باعتبر نفسي لسة باتعلم السواقة
كوني معايا 128 بيفسر طبعاً أد إيه انا منبهر بالسيريون
يمكن لو كان معايا عربية حديثة شوية مكانتش هاكون في نفس درجة الانبهار
المهم احد الزملاء انا عارف معاه السيريون من فترة وكنت كل ما أحاول أستجمع شجاعتي وأطلب منه إني أشوفها اتحرج منه
لغاية ما كان امبارح كلمته واتفقنا إننا ننزل بعد الشغل نشوفه
وقد كان
نزلت وشفتها من برة
عربيته 1300 اوتوماتيك فول أوبشن
الدنيا كانت ضلمة شوية فمفرقتش لونها ميتاليك ذهبي ولا فضي (معالش أصلي نسيت نضارتي في المكتب :) )
وانشكحت أكتر لما صاحبي صمم إنه يخليني أخد بيها لفة :)
العربية واخدة "بوسة" بسيطة كدة على حد تعبيره من ورا :)
واحد ابن حلال خبطه وطلع يجري كمان يعني حتى موقفش يعتذر
مش قادر أتكلم على الاتساع الداخلي اللي كله هنا وأولهم أبو عبد الله اتكلم عنه وكلهم دعوا الناس انها تشوف الأول وبعدين تحكم
فعلاً العربية انا شفتها متسعة جداً جداً على عكس شكلها الخارجي خالص
كرسي القيادة مريح جداً وكسائق 128 طبعاً انبهرت ازاي بيطلع الكرسي لقدام عشان أخوكم قوزعة شوية :)
ادينا الفتيس على D وانطلقنا على بركة الله
ماشاء الله على ثباتها ونعومتها ويا سلام على سلاسة الدركسيون - مش تمانية وعشريناوي يا جماعة باقوللكم :)
ولا العربية في المطبات (أصل عندنا في القرية الذكية الأسفلت طالع ونازل عاملين لنا ملاهي )
وفي المنحنيات
حاجة هايلة ماشاء الله
وأخيراً كان نفسي أشوف الشنطة اللي سمعت فيها انتقادات كتير أوي لصغر حجمها كما قيل
أكيد الناس كانت بتقارنها بشنط السيدان (وطبعاً دي مقارنة لا تجوز إلا بين الهاتش باك)
أظن إنها أكبر شنطة هاتش باك شفتها (إن لم أكن مخطئ)
وبصراحة بالنسبة لاحتياجاتي هي سعتها مناسبة جداً
بجد تجربة جميلة جداً شوقتني اكتر للسيريون وخلتني أعد الأيام والليالي عشان ربنا يجمعنا على بعض :)
مش قادر أقول غير ما شاء الله لا قوة إلا بالله ربنا يبارك لصاحبي ده ويبارك لكل اللي معاه السيريون فيها ويكتب له خيرها ويكفيه شرها
على فكرة انا دعيت صاحبي للتسجيل في المنتدى وكلمته كتير عن الأعضاء والسيريون خصوصاً وأبو عبد الله تحديداً :)