الموضوع: توكيل سيات smg و صيانة ال10,000

مساء الفل عليكم كلكم وعلى أحلى قسم في أحلى منتدي,
أنا الناهردة عملت صيانة ال10,000 و حبيت احكيلكم تجربتي و تقيمي للتوكيل. نبتدي الحكاية
قلت أعمل الصيانة النهرده خصوصا إني لقيت العداد عمل 9,700 كم وانا عارف إني هكسر ال10,000 لو استنيت كمان اسبوع. قلت اروح الجمعة ديه لاتشغل اللي بعدها. طبعا مفيش حجز فأنا قمت من النجمة ورحتلهم الساعة 9 صباحا وبرده كان فيه عربيتين سابقني . المهم الإستقبال كالعادة قمة في الاحترام. استقبلني المهندس عادل وهو راجل ذوق جدا وحسسني إني عميل في بلد اوربي محترم أو بالبلدي كده كأني راكب بورش ( في أي بلد محترم أي عميل بيتعامل بإحترام بغض النظر عن نوع عربيته ). المهم قلتله على اللي مضايقني وهو زودلي كام حاجة وقاللي بالظبط على تفاصيل الصيانة وقاللي حتتكلف تقريبا كام. كل ده ولعربية بيتتكيس عشان تخش الصيانة

• أنا قلتله عندي مرية اليمين خدهالي واحد بتاع نص نقل بالصندوق بتاعه فـكسر المرية من جسم العربية عشان المريا بتقفل لفوق مش بتقفل لجوا وبترد ل برة بسوستة ( مش عملية بس شكلها حلو لما بتقفل ) قاللي مادام المرية سليمة وشغالة كويس يبقى هنربطها ونغير أي كلبس مكسور من جسم العربية
• قلتله عندي الدركسيون بعد ماوقعت في نقرة على مطلع الدائري ( كنت ماشي 120 في الضلمة ) مبقاش عدلته فالنص بالضبط بقيت لازم اكسروا شمال شوية, فقاللي هندخلها زويا
• وراح قاللي هنجيب غطا بلاستيك لمسمار المساحة اللي ورا عشان كان مكسور
• قلتله كمان إني ساعات باسمع تزيق من الأبواب مع المطبات بعد مغسلة العربية في بنزينة, قاللي ده عشان بيكون في شحم في المفصلة وهما غسلوه وطبعا مش بيشحمه تاني.
• وقاللي هنعمل صيانة ال10,000 وديه فيها عفشه وزيت وفلتر تكيف وبنزين وزيت ونتشك على الكهربا والفوانيس والفرامل ونحطها على الجهاز ونشوف لو فيه أي errors
• قاللي التكلفة المبدئية حوالي 1000 جنيه. أنا حسيت إنهم كتير بس مستخسرتش عشان شغلهم نضيف

كان معيا اللابتوب بتاعي وخطبتي عشان كانت عايزة تيجي معيا تشوف إيه التوكيل ده. دخلنا الاستراحة , أنا حافظها طبعا هي نضيفة و واسعة إلى حد ما. قعدنا وطلعت اللابتوب ودخلت على الWiFi وكان سريع الحق يتقال وطلبت من البوفيه مية وقهوة مظبوط. القاعدة جميلة والمكان مكيف وبعد شوية قلت احاسب ونروح نبص على العربية. الحساب كان 3 جنيه وراجل مرضاش ياخد بقي الخمسة, قلت اشمعنا ده اللي رخيص بس يلا متبقاش من كل نحية. وديه كانت آخر حاجة رخيصة في الموضوع. الصراحة لما اتفرجنا على المكان كانت حاجة تشرح. وكان فيه كام عربية بورش بتعمل صيانة اتفرجنا عليهم ( كلهم كايين ) وروحنا للسروجي نسأله لو كنت عايز أعمل فرش للعربية ونصحني اروح مكان وقاللي ناس محترمة جدا ومتقلقش منهم ( مش هاعمل عنه دعاية اللي عايز يعرفه يبعتلي عالخاص ). وبعد ما اطمنت على العربية رجعنا تاني الاستراحة. جالي مهندس عادل الساعة 12:30 وقاللي خلاص كله خلص وكان جايبلي الفاتورة ب1030 جنيه ( هاكتبها بالتفصيل تحت ). قلتله أنا بس كنت عيز اجيب جنط حديد عشان أنا عربيتي منزلتش بستبن ( كل الجديد بينزل فيه ) قاللي خلاص اجيبهولك هو هايكلفة 290 جنيه. أنا كنت سائل عليه بره بـ250 بس اندونيسي. قلتله ماشي هاته فـراح جابه وزودلي تمنه في الفاتورة . بقيت بعد الضرايب 1346 جنيه .
قلت أشوف بقي إيه الفاتورة بصوا معيا عشان أنا عرفت ليه بيقولوا الأروبي غالي

1. تربيط مرية يمين 48 جنيه ( لو كان سمكري كنت كرمشتله 10 جنيه )
2. تغير كفر مساحة خارجية 12 جنيه ( بتاعة بلاستيك أنا بحطها وباشيلها بإدي يعني لو كان الدهني في ادي كنت حطيتها في 2.5 ثانيا )
3. مصنعية سيرفيس 10,000 216 جنيه
4. تنظيف وحدة حقن 36 جنيه ( طب وال216 دول بتوع إيه )
5. ظبط زويا 120 جنيه ( البند ده فقع مرارتي وحاولت اضبطها بره التوكيل قاللي في البنزينة عايزة جهاز كمبيوتر عليه مقاسات العربية, احسنلك التوكيل )
6. حشو فلتر زيت 70 جنيه
7. غطاء مسمار المساحة الخلفية 17 جنيه
8. فلتر بنزين 170 جنيه
9. جنط عجل 287 جنيه
10. زيت محرك موبيل 1 227.52 جنيه
11. سبراي 18 جنيه
12. مياه بطارية 3 جنيه (تزويد مياه التبريد)

رحت دفعت وطلعت استلم العربية لقيتها لسة هتتغسل. استنيت الغسيل, الصراحة غسلة تمام بره وجوه وخدت باللي إنهم مرشوش مية على المفصلات من جوه مجرد مية والعربية مقفولة. نشفوها كويس , بسيط على العربية لقيت الجنط محطوط في الكنبة اللي ورا وطلع الماني فا انبسطت, أنا كنت خدت على معاملة البهوات فـبسيط بقرف فـواحد من اللي بيغسلوا العربية جالي و اتاسف وقاللي تحب احطه في الشنطة قلتله يا ريت قام نقله علي طول. وبعدين قلت اطلع اجرب العربية. وهنا المفاجأة, العربية كل حاجة فيها كأنها فبريكة والمراية المكسورة ولا حتى كان فيها هذة وكأنها كانت جية كده زي ماجت من المصنع بس ياخسارة الحلو بقي مايكملش. الدركسيون بدل ماكنت لازم اكسرو شمال بقيت لازم اكسرو يمين. رجعت تاني ومهندس عادل طلع معيا أسطي صبحي اللي ماسك العفشه والزوايا والشاسيه. قلت نلحق نجرب قبل ميعاد صلاة الضهر. الطريق اللي بره التوكيل مبهدل وانا اقتنعت إني كان بيتهيألي وقلتله لأ خلاص ديه مظبوطة. رجعت تاني ومهندس عادل قاللي بص اهم حاجة إنك تكون مبسوط, امشي بيها ولو حسيت باي حاجة ارجعلي تاني أو تعالي بكرة بس بكرة نص يوم. رغم إن الزوايا معليهاش ضمان بس اهم حاجة راحتك. شكرته جدا وطلعت. رحت كام مشوار وحسيت بالموضوع جدا في شارع السودان وجامعة الدول. رجعت تاني واستقبلني بقمة الباششه وقلتله على اد إيه لازم أكون كاسر الدركسيون فـجاب أسطي صبحي تاني وظبطها (تاريط على مسمار في البارات) وقال لي اطلع جرب وماترجعهوش إلا وإنت مبسوط المهم حتى أسطي صبحي عصر اطلع معاه لغاية شارع السودان وجربت والدنيا كانت مظبوطة المرة دي زي الساعة. رجعنا وشكرتهم.

انطباعي عن التوكيل,
الشغل كان قمة في الحرفية. أسطي صبحي كان بيدرس كمبيوتر وبياخد ICDL فـناس كلها على مستوى علي سواء مهندسين أو صنايعية. الناس كلهم قمة في الاخلاق.
المصنعية غالية وقطع الغير غالية بس الشغل نضيف وحتى التزيق اللي كنت باسمعه اختفي والعربية رجعت زيرو ( هي اصلا مكنش فيها حاجة تذكر بس أنا حسيت إنها كأنها لسة طالعة من المصنع تاني )
لو هتجرب زوايا أو حاجة معتمدة على طريق نضيف اطلع لحد شارع السودان. الطريق اللي قدام التوكيل مبهدل ويتجرب فيه دبدبت مطبات أو تزيق مش زوايا.

أرجو التعليق من الاعضاء على الفاتورة وإيه اللي أنتم شايفنو مبالغ فيه عشان رايكم يهمني جدا.
بس أنا أكتر حاجة بسطتني هي خدمة العملاء و رضاءهم العربية كانت بتبرق بعد الصيانة ومتأخرتش في الصيانة خالص بس كانت على حساب السعر .

أنا آسف على الاطالة بس أنا حبيت أشارك معاكم تجربتي. وقريب هاعمل تقيم للعربية بعد ال10,000 كم
تقبلوا تحياتي



شكرا للعضو على نقلة لتجربة الصيانة ونرجوا من باقى الملاك عمل تقرير مشابة حتى تعم الفائدة
تم التثبية للاهمية 15 ب

استاذ جون

الف مبروك على الصيانة وعقبال 100 الف ان شاء الله

على فكرة انا ناوى يوم الثلاثاء القادم 10/8/2010 اروح اعمل صيانة ال 10000 باذن الله

على فكرة انا شايف ان اسعار الصيانه تعتبر معقولة ومقبولة الى حد كبير خصوصاً وانك عملت حاجات زيادة عن الصيانة الدورية
(تربيط المرايا وتركيب كفر للمساحات و ضبط زوايا وغطاء مسمار المساحة و جنط عجل ....) يعنى شوية حاجات زيادة بحوالى 505 جنية

وعلى فكرة انا حسبت الصيانة لوحدها وطلعت تقريباً حوالى 720 جنية قبل الضرائب يعنى حوالى 800 جنية بعد الضريبة
(سرفيس 10000 -216 و تنظيف وحدة حقن -36 وفلتر زيت 70 وفلتر بنزين 170 وزيت 227.5)

بس انا كان عندى سؤال نفسى اعرف الرد عليهم من سيادتك
ياريت توضحلى البند رقم 11 (الاسبراى دة بتاع اية) ورقم 12 مياة البطارية واية علاقتها بمياة التبريد؟

وكان لية تعليق واحد واسف للاطالة عليك
بالنسبة لموضوع الزوايا مفيش حاجة اسمها ضمان بس فى حاجة اسمها انى استلم الشغل مضبوط وتمام و 100100 يعنى انت ما طلبتش حاجة اكتر من حقك وهما ما عملوش اكتر من الى عليهم

بس ارجع واقول ان التوكيل محترم وبيتعملوا مع العملاء باسلوب متحضر ومحترم

اسف للاطالة