اقتباس:
المشاركة الأصلية كتبت بواسطة emadkamel
1- كلنا متفقين ان حياه الانسان اهم من اى حاجه فى الدنيا، لم آخذ تساؤلاتكم عن رأيى بهذا الصدد على محمل الجد وافهم انها تساؤلات استنكاريه، واعتقد برضه انكوا اكيد عارفين ان رأيى هايكون ان الانسان وسلامته اهم.
لا خلاف على ذلك
اقتباس:
2- لما نيجى ندرس حلول لمشاكل اى صناعه، بنحاول نتجه للحل من خلال منطلق واحد هو حتميه وجود تلك الصناعه، يعنى ايه ... كلنا بنسمع عن مخاطر الموبايل وتأثير اشعاعاته والكلام ده ... هل حد ممكن يقول اننا نلغى وجود الموبايل خالص؟؟؟ ولا الافضل نوعى بخطورته وبالاسلوب او الوقت الامثل لاستخدامه ونعمل لوائح لتنظيم الترددات ونزود فى البحث العلمى لغايه ما نوصل لموبايل آمن؟؟
الموبايل بيضر من يستعملة فقط... مسمعناش عن واحد موت 7 او 8 عشان جاتلة missed call... المقارنة متنفعش خالص... بل بالعكس... الغير متضرر الوحيد من حوادث المقطورة هو سائق المقطورة و المتضرر الحقيقى هم الناس اصحاب الحظ العثر اللى شاء القدر انهم يكونوا امام المقطورة
اقتباس:
3- عدد العربيات الملاكى اللى بتعمل حوادث "مسجله" فى الاقسام اضخم بكتير جداً من التريللات غير الحوادث الغير مسجله ... حتى لو عملنا نسبه وتناسب بين عدد الملاكى وحوادثها وعدد التريللات وحوادثها هانلاقى الملاكى أكتر .. فالأفضل فى رأيكوا نلغى الملاكى ... ولا نشدد القوانين بتاعة الترخيص والسير وخلافه مما ذكره باقى الاعضاء الافاضل فى هذا الموضوع؟ نفس الموضوع ينطبق على الميكروباصات والأتوبيس الاخضر وخلافه
نسبة الوفيات فى حوادث المقطورة لا تقارن بحوادث السيارات الملاكى... معتقدش فيه حادثة مقطورة بتنتهى باصابات طفيفة... اما حالات حرجة او وفاه نتيجة الحمولة الكبيرة للمقطورة و غياب السيطرة تماما عليها فى حال انفصالها عن العربية النقل
اقتباس:
4- هاتقولوا ماحنا بنقول نلغى التريللا فقط مش الصناعه كلها وهنا اوضح الجزء الاقتصادى لأن زى برضوا ماحضراتكوا عارفين البلد كلها بتصرخ من الغلاء فلو احنا مثلا قلنا ان الـ 10 طن طماطم بتتنقل على تريللتين فى مره واحده بـ 1000 جنيه هانلاقى انهم هايتنقلوا على تريللتين فى مرتين بـ 1700 جنيه (على الاقل) لان حضراتكوا عارفين ان فيه تكاليف ثابته وخلافه وطبعا حضراتكوا عارفين ان كل حاجه بتتباع وتشترى داخل فى تمنها سعر النقل وده اللى مخوفنا مثلا من زياده سعر السولار... فمن رأيكوا واحنا بصدد حل مشكله ما، هل الأفضل نبص على التبعيات الاقتصاديه للحل واللى هاتأثر على المجتمع ونحاول نوصل لحل يغطى طرفى المعادله وللا الأفضل نجرى ورا حل يعمللى مصيبه على الشعب بعد كده؟ ابقى قفلت باب وفتحت باب ..
احنا بنقول الغاء المقطورة مش التريللا... و فعلا فى كل دول الخليج عندهم تريللات بالعبيط لكن محدش عندة مقطورة غير بلدنا الحبيب
اذا لم كان فيه سبب يجعل التريللا بديل غير مناسب للمقطورة يبقى نقطة التكلفة غير منطقية
اقتباس:
5- ده طبعا غير الاثر الاقتصادى على المصانع والعاملين بها وعلى قطاع النقل والعاملين به.
اللى بيصنع مقطورة ممكن يصنع تريللا... هل الفرق بينهم كبير للدرجة ان اللى شغال فى المقطورة ميقدرش يشتغل فى التريللا؟؟
اقتباس:
6- بالنسبه لمنع التريللات فى كل دول العالم ماعدا مصر وسوريا واللى مكتوب فى مقاله الأخبار فأنا بصراحه اول مره اسمع حاجه زى كده ... انما اقدر اقول بضمير مرتاح ان التريللات موجوده فى مصر وسوريا والسعوديه والامارات والجزائر واوغندا والسودان وانجلترا وكوبا وجنوب افريقيا ... دى الدول اللى يإما اعرف شركات فيها او لينا فيها مصانع او اشتغلت فيها بنفسى وبالنسبه لباقى العالم ممكن بسهوله نتفرج على اى فيلم امريكى (وكتير اوى من افلام الاكشن بتبقى فى الموانى) واحنا نلاقى التريللات بتزغرط فى الشاشه وممكن كمان احط اللينك دى
http://www.hankstruckpictures.com/morton1.htm ودى
http://www.swstruckbodiesandtrailers.com/ فيهم بعض الموديلات وواضح من الصور انها فى امريكا واوروبا وكندا وده بعد بحث بسيط على الجوجل
احنا بنتكلم على المقطورة مش التريللا
اقتباس:
7- وعلى ذكر الاعلام ومن خلال خبره شخصيه .. كتير قوى من الصحفيين غير متخصصين فى مجالات كتاباتهم ولا يدققوا فى صحه المعلومه ... يعنى فى نفس المقال مكتوب ان العربيه ذات الحموله 20 طن تقوم شركات النقل بتحميلها 60 طن !!!! وهنا اعمال العقل واجب ... حد يشرحلى اى شركه لتصنيع التريللات صممت عربيه حموله 20 طن وهى مش عارفه انها بتشيل 60 ... انهى شاسيه ده اللى هايكون مصمم لـ 20 وهايستحمل 60 طن ... ده انا عندى العربيات حمولتها 70 طن باحمل 65 وساعات 60 علشان وعوره الطرق وعلشان شاسيه مايتكسرش وهو صناعه المانى ومن سبيكه مرنه !!!!
انا معاك بس فداحة الحوادث واقع لا يقبل التغيير... كتلة وزنها 8 الى 10 طن ماشية بسرعة 60 كيلو فى طريق سريع بدون اى سيطرة... تفتكر ايه اللى ممكن يحصل؟... اكيد كارثة
جربت تبقى راكب عربية صغيرة و تبقى جنبك مقطورة و لما يبقى فيه مطبات تلاقى المقطورة بتروح يمين و شمال؟ دى لوحدها تنشف دم اى سواق و ممكن يرتبك و يعمل حادثة
اقتباس:
8- فى الآخر مافيش مانع من Disclaimer صغير حيث ارجو أن أكون قد وفقت فى توضيح وجهة نظرى وأؤكد انى اسعى لتوضيحها فقط وليس لإقناعكم بها حتى تكون ردودكم مبنيه على اساس فهم واضح لكلامى واحترم وجهة نظركم وماشربش الشاى اشرب قازوزه :) :)
الاختلاف فى الرائى لا يفسد للود قضية... و بالتالى انا عايز فانتا تفاح :D
MMamdouh