ما هى مقترحاتك لتحسين الأداء المروري في مصر؟؟

**okky222** · 11-04-2008 08:31 PM

اعتقد انه يجب استغلال فراغ الشوارع اثناء الليل و ان تقوم المصالح الحكومية بالعمل 24 ساعة زى المصانع .وبهذا اللى بيكون صاحى بالليل فقط بينام بالنهار يستطع ان يقضى مصالحه مع مثلا السجل المدنى و الشهر العقارى و التراخيص ده كفاية بس موضوع التراخيص و تجديد الرخصة و الفحص و اليوم الذى لا ينسى فى حياة صاحب كل سيارة . يعنى مثلا اللى يقف فى طابور العيش الظهر هايشتكى من الزحمة زى اللى هايقف الفجر . و يجعله عامر

**volkeswagin** · 12-04-2008 06:36 AM

المشاركة الأصلية كتبت بواسطة sherif80

دى بعض الحلول اللى من وجهة نظرى ممكن تساعد فى تخفيف الازمة

1- اجبار اصحاب العمارات على فتح الجراجات المغلقة و الغاء تراخيص اى محال او معارض تستخدم هذه الجراجات
2- انشاء جراجات متعددة الطوابق فى الشوارع التجارية مع تشديد العقوبة على الركن صف ثانى
3- الغاء تراخيص السيارات اللى فات عليها 30 سنة وتعويض اصحابها
4- منع المشاه من عبور الطرق السريعة و انشاء كبارى للمشاه مع انشاء اسوار فى الجزيرة الوسطى لمنعهم من عبور الطريق
5- زيادة السرعة القانونية على المحاور مثل الدائرى الى حد اقصى 120-110 كم\ساعة حسب حالة الطريق مع منع التريلات من السير نهارا و زيادة عدد الرادارات و تشديد العقوبة للمخالفين
6- استخدام المطبات الصناعية ذات الاتجاه الواحد لمنع السير فى الاتجاه العكسى
7- الاهتمام و بشكل شامل بجميع الطرق و صيانتها و ازالة الفخاخ منها-وطبعا اللى ساكن فى مدينة نصر اكيد فاهم كلامى:d
8- منع التوك توك وعربات الكارو تماما من السير فى الشوارع العمومية
9- نقل جميع الوزارات و الهيئات و المصالح الحكومية الى خارج القاهرة مع الاخذ فى الاعتبار ان تستوعب الطرق المؤدية الى القاهرة كثافة السيارات فى وقت الذروة

زود عليهم السفارات اقترح ان لو السفارات اللى فى القاهره كلها اتلمت فى حته واحده زى القاهره الجديده والجيزه فى اكتوبر مثلا هيبقى اسهل امنيا السيطره والحمايه
شوف كل سفاره هتوفر كام شارع وكام ركنه

السفاره الامريكيه لوحدها قافله نص شوارع جاردن ستى
السفاره الاسرائليه والسعوديه فى الجيزه مشاء الله عليهم قفلين شارع مراد والشارع اللى بعد الكبرى
شفاره فرنسا اللى ادام حديقه الحيوان قافله شارعين
لو كل سفاره قفلت لها شارعين +شارعين لركنه العربيات اللى كل فراش فيهم بيجى بعربيه مش السفير غير الحراسات غير اللى بيترددوا على السفاره
المهندسيين 90% منها مقفول سفارات
تخيلوا لو السفارات دى اتلمت فى مربع واحد فى الصحراء هما اكتر ناس مش محتاجين وسط البلد لانهم كلهم معاهم عربيات فارهه بجد
ولو اتلموا فى حته واحده نعمل مواصلات نضيفه ليهم لحد اول مربع السفارات وهيبقى مسيطر امنيا

بس ابقى قابلنى لو ده حصل لان البلد بلد الغرب مش بلدنا

**adidas_vip2** · 25-04-2008 07:00 AM

ممكن لو يبقى حارة مخصصه للاجر يعنى التاكسى والميكروبصات والاوتوبيسات وكدة وطبعا تصليح الشوارع لانك ممكن تبقى ماشى فى امان الله تلاقى واحد عدالك من على الكبوت وبيقولك اصلى كنت بفادى حفرة هو ممكن بس محتاجه شغل بجد واعتقد انا شايف فى محاولة ظبط مرورى اليومين دول انا ملاحظها ولا انا بيتهيألى لا محتاجه شغل يا جماعه بس ياريت يكون فى حد يسمع الكلام دة ويبدأ ينفذ

**transporter1000** · 26-05-2008 05:43 PM

الحل بسيط جدا وهو ممنوع سير كل من هو مريض بمرض الكلاكس والسير عكس الاتجاه والمرور من الحارة اقصى اليمين والتوقف فى منتصف الطريق وعلى فجاءة وسير السيارات النقل فى الحارة الشمال والركن صف تالت ورابع وسيكولوجية انا الاول يعنى محدش بيدى فرصة لحد انه يعدى حتى لو التانى ذوق معاه وايه وايه ويه ..........
ياسيدى الفاضل علشان الازمة دى تتحل لازم تشرب الناس بالليل اقراص الادب والذوق والفضيلة
ولفكرة العيب مش فى الحكومة بس العيب فينا احنا احنا اللى بنعمل كده

**okky222** · 27-05-2008 12:34 PM

زى ما تفضلت و قولت ان لينا دور فى الحل . اسأل سيادتك سؤال . كام مرة تصادف عسكرى مرور او ضابط مرور ما عدا فى وسط البلد ؟

**MoToRiZeR** · 27-05-2008 12:46 PM

المشاركة الأصلية كتبت بواسطة Mohamed_ElNaggar

لو انت مسئول عن استخراج قانون جديد شامل لتحسين اداء المرور في مصر فما هى اقتراحاتك ؟؟؟

إعدام الشعب المصري بالكامل !

المشكلة لا في القانون ولا في اللي بيطبقه المشكلة في الناس نفسها .. الشعب المصري امراضه النفسية كلها بتظهر اول ما يقعد ادام دركسيون و يسوق عربية

و متعود انه عشان يمشي صح لازم واحد يبقي واقفله بالخرازانة زي العيال الصغيرة .. انما يمشي كويس من نفسه لأ .. متعودش عالذوق و التحضر

**okky222** · 27-05-2008 04:25 PM

هانفترض ان الكلام ده مظبوط . بروضه فين الرجالة اللى بالخرزان ؟( رجال المرور ) مادام ده الحل ؟

**transporter1000** · 27-05-2008 04:54 PM

زى ما تفضلت و قولت ان لينا دور فى الحل . اسأل سيادتك سؤال . كام مرة تصادف عسكرى مرور او ضابط مرور ما عدا فى وسط البلد ؟

فى الدول المحترمة مفيش اساسا عسكرى مرور لان كل واحد بيحترم نفسة الاول
علشان كده بيحترموا اشارات المرور

**MoToRiZeR** · 27-05-2008 06:43 PM

بالضبط ماهو عشان كدة مفيش حل .. الشعب رافض يغير ثقافته رغم انحداره الي القاع خلاص

المرور مش هيتحسن في مصر ولا اي حاجة الا اما يسود في المجتمع حالة من التحضر في التعامل بين الافراد .. و ده مش موجود