الموضوع: موضوع مخصص عن المدن والتجمعات السكنية الجديدة من تجارب الأعضاء.

فين الفيوم الجديده دى يامزاجنجى بالظبط؟
واللى بيسال عن بيت المصريه ده رد لواحد فى احد المنتديات فاتح موضوع زى ده وياخوفى ليطلع بياع تبعهم

المشاركة الأصلية كتبت بواسطة chab mado

http://www.youtube.com/watch?v=x1e-maitelu

اسم المشروع : بيت المصريه
الشركه المالكه : المصريه للتجاره والمقاولات
المقر : مدينه نصر
بجوار السلاب مكرم عبيد


انا واحد من الناس لا انا شغال فى شركه عقارات ولا ليه اى مصلحه فى اللى انا بكتبه

انا واحد بشتغل فى مجال الانترنت يعنى ماليش علاقه بالعقارات لا من بعيد ولا من قريب

بصراجه
مش غاوى منتديات اوى بس بحب اعمل سيرش واقراء لكن مش بكتب ولا بشارك

بس والله لقيت ناس محترمه كتير وعاوزين يساعدو بعض وموقفهم ذى وقفى وحلمهم هوه نفس حلمى

فققررت اشارك وحقول راى بصراحه


انا طبعا دورت ولفيت هناك كتير وروحت 90% من الشركات اللى بتتكلمو عليها دى كلها

طبعا المنطقه دى مستقبلها عظيم سواء اقامه وسكن او استثمار مع انى نفسى يكون سكن عشان تعمر بسرعه واسكن فيها

عاجبنى جدا ان معظم الناس تقريبا مستوى اجتماعى مرموق
يعنى جوة المنتدى دكتور ومهندس و ناس محترمه يعنى تضمن ان جارك حيكون شبهك

تانى حاجه انه مافيش عشوائيات - انا بتكلم عن المشروع بصفه عامه

عاجبنى جدا تقسيم حدائق اكتوبر و الطرق الرئيسيه والمحاور ونظام الكومباوند هناك والمساحات الخضراء ونظام المبانى وارتفاعتها ده غير مركز مبارك الاوليمبى والمترو و مطار اكتوبر ونادى الزمالك اللى مش عاوزين يكسبو ماتش ويمكن يكون وشنا حلو عليهم لما نروح باذن الله
بس الموضوع محتاج شويه وقت والوقت محتاج شويه صبر

انا مش مقتنع بالبحيرات الصناعيه وشقتك ع البحر وحضر المايو وكلام فاضى ممكن تكون نافوره وشويه زرع فى الاخر

بس برده مش وحش

الشركات كلها شبهه بعضها ومافيش فروق كبيره

مواعيد تسليمهم النهائيه ان شاء الله 11-2011 يعنى ماحدش يقول انه حيستلم قبل كده

ولو حصل يبقى شغل دعايا و لعب بالالفاظ يعنى استلام مبدئى و استلام نصفى يعنى
من الاخر ممكن تروح انت تشطب شقتك لكن مش معنى كده انك تاخد هدومك وتروح لانك ممكن ماترجعش :-)


المهم ان شاء الله كله حيكون جاهز بالمرافق و الخدمات فى 11-2011 لان ده عقد الشركات الخاصه مع وزاره الاسكان ومربوط بفتره رئاسه السيد الرئيس واللى يطمن اكتر ان جهاز مدينه 6 اكتوبر مشرف على كافه المشاريع بمنطقه حدائق اكتوبر

والخبر الحلو ان الدعم فعلا زاد - احب اوضح ان فى لعبه بتلعبها معظم الشركات فى موضوع الدعم لان فى ناس فاكره انها حتاخده تحطه فى جيبها او تشطب بيه

لا خالص لانهم بيمضوك على شيك ان اخدت الدعم وانت لسه مخدتش حاجه ويقولوا لك ده من ثمن الشقه ومن الاخر مش حتفهم حاجه
وقصه ملعبكه ويقولك ثمن الشقه شامل الدعم وانت مش فاهم اى حاجه

بس المضطر يركب الصعب ومهما حاولت تعمل مفتح انت مش حتكون اصيع من الشركات دى فامتتعبش نفسك وقول حاضر

بالنسبه للفرق بين اسكان الشباب بتاع زمان ابو 5 الاف جنيه و اسكان الشباب حدائق اكتوبر

اللى احنا فيه ده ارقى بكتير من حيث شكل العمارات والخدمات والرقى والمرافق
لان احنا اللى بيبنى شركات خاصه وبتهتم بالواجهات والدعايه والخدمات الترفيهيه
بعكس ابو 5 الاف جنيه بتاع زمان ونظام القرعه و تشطيب الجهاز والبلاط بالظبط اللى عامل ذى المساكن الشعبيه

الحاجه الوحيده المشتركه المساحات الصغيره طبعا و المساحات الخضراء لان ده نظام مدينه اكتوبر كلها

معلش انا ذى ما قلت انا مش بحب اشارك فى المنتديات بس لما اشارك واقرر انى اكتب معنديش يا امه ارحمينى
لازم اقول كل حاجه اعرفها للأمانه

نخش فى الموضوع

انا اسمى محمد عبد الجواد

ضورت وطلع عينى ولفيت على كل الشركات وروحت الموقع اكتر ما كنت بروح شغلى شويه مع نفسى وشويه باتوبيسات الشركات الريحانه ودجله والسالميه والايطالى ولو كان فى هندى كنت روحت

المهم
مكنتش بضور على بحيره صناعيه ولا نافوره قدام باب الشقه
معلش انا راجل عملى شويه

كان كل همى مساحه اكبر واكيد سعر مناسب عشان كده كنت بضور على شقه تكون فيها متر زياده لانى شفت ال 63 ولا حتى 67 متر مستقبلا حتكون ضيقه مهما استغليت مساحتها وطلعت قوضه النوم ع السلم


خلينا نكون واقعيين اكيد كلنا ربنا حيوفقنا ونتجوز وربنا يرزقنا بالذريه الصالحه باذن الله فبالتالى حتكون مخنوقه حبتين

انا مش بكره الناس فيها والله وعلى راى واحد قال البركه مهمه وممكن تعيش فيها كانك فى قصر
والعفش ال customized اكيد حيفرق

المهم لقيت شركتين بس همه الى زياده حجره وحمام

الاولى (باراديس) والتانيه (بيت المصريه)
وبعد رحله طويله من البحث لقيت (بيت المصريه) وسعرها حلو جدا مش عالى بالنسبه للمساحه

ريسبشن يشيل قطعتين مستريح جدا وحمام

الشقه مستويين

تطلع سلمتين تلاقى مطبخ تمشى شويه تلاقى 3 حجرات و حمام تانى كبير

وباراديس نفس الموضوع بالظبط

طيب اشمعنا بيت المصريه ؟؟؟؟

باراديس المشروع كله 12 عماره ومافيهوش فعلا غير 12 عماره وبس

انما
بيت المصريه عباره عن 3 مراحل الاجمالى 63 عماره بأسانسير + ملعب خماسى + نادى اجتماعى + سور محيط الكومباوند + مول تجارى اسمه المصريه مول

فحسيت انه اوقع وكده فعلا اسمه كومباوند كامل الخدمات

توكلت على الله واشتريت

طبعا السعر اللى اشتريت بيه معتقدش انه ممكن يكون موجود دلوقتى

الحمد لله الحمدلله اشتريت فى وقت حلو مع انه مش من زمان قوى

بس فى حاجه مهمه جدا عاوز قولهالكم

باراديس وبيت المصريه كان عندهم مشاكل مع جهاز المدينه 6 اكتوبر

بس مشاكل ملهاش علاقه بالتمويل ولا فى الارض ولا الكلام اللى فى ناس قالته فى المشاركات اللى قريتها ع المنتدى

وللتاكيد انا معايا صوره من رخصه الارض ورخصه المبانى وحصلت عليهم طبعا بصعوبه بس مكنتش حشترى الا لما اشوف واتاكد من كل فتفوته واللى ساعدنى شويه ان والدى محامى ففصصنا كل حاجه ؟

وكانت علامه استفهام بالنسبه لى ؟؟؟ اشمعنا دول 3 حجرات و2 حمام و الباقى كله حجرتين بس ؟؟؟ اشمعنا الباقى 80 متر صافى 63 ودول 110 متر صافى 85

طيب ايه طبيعه المشكله اللى عندهم وكانو مختفيين فين وورقهم كله سليم ؟؟؟

المشكله ان الشركتن دول حبوا يعملوا ناصحين وخالفو شروط الوزاره وبنوا مساحات اكبر بسعر اعلى لكن اثناء المعاينه الاوليه جهاز المدينه عاقبهم
وكانت العقوبه عدم عمل اى دعايه او بيع اى وحدات الا بعد الشركات اللى التزمت بالمساحات الاصليه ما تخلص المرحله الاولى وتبيع وفى نفس الوقت ان يتم البيع بسعر ال 63 متر وفعلا فى العقد اللى معايا مكتوب 63 متر عشان قانون اسكان الشباب

الشركتين دول وجدوا نفسهم فى مأزق
بس فكروا صح
استمروا فى البناء واول مره رحت لقيت 3 عمارات فقط وبصراحه قلقت وكنت حكبر دماغى لكن انا مثابر جدا وفضلت متابع من بعيد

روحت بعد كده لقيتهم وصلوا ل 22 عماره من اجماالى 63 عماره

يعنى الناس شغاله
ولقيتهم فعلا من حوالى 7 شهور ينزلوا اعلانات فى الوسيط

اجمالى الوحده اللى انا واخدها 111000 كاش بس انا واخدها قسط على 5 سنين وصل تمنها 132000

انا شايف انه سعر جميل وهايل بالنسبه للمساحه ومقارنه بالشركات التانيه

عشان اكون صريح وواضح - انسو السعر ده للى بيفكر

لان واحد زميلى كلمهم من قريب وسمع سعر تانى خالص وكلام تانى بعكس انا لما روحت كانو لسه بيقولوا يا هادى فى عمليه البيع

دلوقتى تسمع اختلاف من حيث الواجهه والناصيه وادوار متكرره والدور الخامس وخلفى وامامى وجراج وحوارات كتيره

مع ان العماره اللى انا فيها مش دافع جراج اصلا

بس للأمانه اخر مره رحت لقيت المشروع ابتدى يكون ليه معالم عرفت فين مكان المول وواضح السور المحيط وتم تحديد الملعب الخماسى واالرؤيه ابتدت توضح وده عجبنى اكتر و كمان شغالين فى الشقق من جوة (المحاره) و شغالين فى الوجهات وعلى فكره شيك جدا والمداخل والبوبات العمارات عجبانى والوان راقيه

الوضع مختلف لشركه باراديس وبالمناسبه مقرها فى 131 ش التحرير الدقى

اسعاهرها هيه هيه ومش بتزيد لان مافيش اقبال غالبا ومعندهمش غير 12 عماره ومافيش اى خدمات ولا ملاعب ولا مول تجارى
عندهم مساحه اكبر وبس

والناس كلها معجبه بالنافوره والبحيرات الصتاعيه اللى انا ماعتقدش ان حد حيشوفهم اصلا
عشان بس نكون واقعيين
اصل احنا فى مصر ومعرفين بالكلام المعسول و اسلوب جر الرجل ومعندناش الفينش الاخير

عندى صور كتير بس مش عارف اوريهملكم ازاى

يارب اكون افدتكم ودى تجربتى وده كل اللى اعرفه

معلش مش حقدر احط رقم موبيلى

بس اللى اقدر اعمله اديكم رقم الشركه للى يحب يسال


22724624

او رقم مسئوله المبيعات الانسه سالى
0106364693

ونصيحه من أخ

اللى جادى وعاوز فعلا وجادى يروح ومايكتفيش بالتليفون
لان اللى بيسال فى التليفون همه كلمتين حافظينهم وبيسمعوا واقلب وخلاص والاسعار عماله تزيد يوم بعد يوم

لكن لو روحت اسال على أستاذ محمد رياض ده راجل محترم جدا

ولو حتتعاقد اسال على استاذ ممتاز ده الرجل الاول والاخير فى اداره المبيعات وممكن تتفاوض معاه

وعشان اكون قلت كل حاجه ممكن تلاقى اعلانات لبيت المصريه فى الوسيط او اهرام الجمعه وعنوانهم فى الجيزة

والكلام ده مش مظبوط

اللى فى الجيزة دى عباره عن شركة دعايه وتسويق عقارى وبتبيع باسعار اعلى لان ليها نسبه اكبد

فالافضل انك تكلم الشركه المالكه علطول

والله على ما اقول شهيد وانا والله العظيم ماليش اى مصلحه على الاطلاق غير انى نفسى افتح عنيه واغمض الاقى

بيت المصريه وتاون فيو والريحانه والسالميه وبيتنا جاردنز و العبير جاردنز ومعمار المرشدى وكل الشركات دى خلصت والناس سكنت عشان نفسى اروح شقتى

والله الموفق

اخوكم
محمد عبد الجواد