عند نفس السعر تركب 1600 ولا 2000 سى سى
حبيت أطرح السؤال الغريب ده نظراً لوجود عربيات 2000 سى سى دلوقتى فى الفئة السعرية بتاعت 1600 ، زى الشيرى 620 والبريليانس جالينا والهيونداى سوناتا ، وبتمثل إغراء كبير إنك تقتنى موتور 2000 سى سى زيرو فى مصر
أنا وجهة نظرى إنك لما تلاقى عربية 2000 سى سى بسعر عربية 1600 سى سى فى مصر ، ماتفرحش بالموتور الأكبر ، إفتكر فرق الجمارك الرهيب بين الإتنين (40% و 135%) غير فرق رسم التنمية والضريبة ، هتلاقى فى الآخر إن إنت إشتريت عربية رخيصة برة تمنها حوالى نص تمن العربية التانية ال 1600 ومع ذلك إنت إخترتها وإشترتها ودفعت كل السعر ده للحكومة وما أخدتش بيه جودة منتج ولا حاجة ، إنما ال 1600 اللى بنفس السعر : إنت إشتريت جودة بجزء أكبر من فلوسك
مثال:
ممكن تدفع 117 الف فى لانسر مقابل شوية فلوس راحت للحكومة والتجار وبباقى الفلوس منتج جيد (ثمن العربية برة)
وممكن تدفع 117 الف فى شيرى 620 عبارة عن جزء كبير أوى للحكومة (شريحة 2000 سى سى) وجزء للتجار والباقى (جزء أقل من بتاع لانسر) إشتريت بيه منتج أقل جودة (ثمن العربية برة) !!
ونفس المثال بين الجالينا والميجان مثلا - والسوناتا والأوكتافيا أو الجيتا
رأيكم إيه ؟