في رمضان .. لا للإسراف في الإضاءة

**تامر.محمد** · 08-08-2010 01:32 PM

السلام عليكم و رحمة الله و بركاته

كل سنة و انتم طيبين اولا ....
دلوقت احنا بحمد الله في ايام مفترجة ربنا يعطينا خيرها و بركتها و يقينا فيها شر شياطين الجن و شياطين الانس ان شاء الله

الحكاية ايه ؟
دلوقت كلنا اتعودنا كل سنة اننا بنشوف في الشهر الكريم زينة و أنوار و أضواء في الشوارع , و في البلكونات
كل الحاجات دي معمولة بالجهود الذاتية طبعا

بجد هي حاجة جميلة و اظن كلنا بنحب منظر الشوارع و البلكونات في رمضان
لكن السنة دي السيناريو اتغير !!!!

باختصار كده
السيناريو اللي هايحصل , ان كل منطقة بتزيد الأحمال فيها ... هاتتسبب ان منطقة تانية تتقطع عنها الكهربا خالص , و على الأرجح هاتبقى منطقة شعبية او منطقة فقيرة لأن طبعا زي ما هو واضح ان النظرية نظرية يا عيني على الفقير يا ولداه
يعني عشان ننور و نزين شوارعنا و بلكوناتنا , هانكون سبب ان ناس تانيين يقعدوا في الضلمة من غير كهربا

أظن مش عدل ... صح ؟
هاييجي

هاييجي حد يقول لي انه عايش في منطقة شعبية و هايحط اضاءة
سوري ...
نفس النظرية
يا عيني على الفقير يا ولداه
لو التحميل في منطقته زاد
هايفصلوا الكهربا عنها و يبقى ضر نفسه
و لو ما فصلوهوش ؟
يبقى فصلوها على غيرها و بكده يبقى رجعنا لأنه مش عدل

كل سنة و انتم طيبين

**زينة الله** · 08-08-2010 01:40 PM

معاك حق يا باشمهندس و لو مافصلوهاش بإرادتهم ممكن المحطات الرئيسية تخرج كلها و تعتم على الكل
فاكر مرة فى رمضان من زمان و أحنا أطفال فصلت الكهرباء عن الجمهورية كلها بعد الفطار نتيجة زيادة الأحمال عن طاقة المحطات الموجودة وقتها حد فاكرها

**تامر.محمد** · 08-08-2010 02:06 PM

المشاركة الأصلية كتبت بواسطة ahmed4000

+111111111111111111111111111111111
احيييك على ايجابيتك
حاجة غريبة اوى بتحصل فى رمضان انوار فى كل حتة وبطريقة مبالغ فيها وحتى على الجوامعه
ومين اللى بيدفع كله ده؟ وادفعه ليه؟
ونفسي الناس متدخلش تهاجم وتقولك البلد المفروض تبنى محطات زيادة علشان انوار رمضان!!!
اصلى قريت تحقيق فى الجرنال على الموضوع ده والناس بتقولك احنا بنفرح بالموضوع ده وانتوا عايزين تحرمونا من الفرحة
"افرح على حسابك"

موضوع على حسابي ولا حسابهم
اقتناعي الشخصي انه ولا حتى على حسابي
لأن في الحالتين هو استهلاك ممكن للأسف يتسبب ان واحد تاني الكهربا تتقطع عليه

بص هاقول لك حاجتين
هو مفروض البلد تعمل محطات فعلا
لكن ادي الله و ادي حكمته , مافيش اختيار قدامنا حاليا اسمه محطات
و انا لما احط نور زيادة الكهربا مش هاتتقطع على البلد لكن على واحد تاني زيي مالوش اي ذنب غير انه - زيي برده - عايش في البلد
و في الأول و في الآخر , اي منظمة محترمة - او مش محترمة - في الدنيا بتقيس استهلاكها و انتاجها و من القياسات دي بتقدر تتوقع امتى الانتاج هايتخطى الاستهلاك , و طبيعي قبلها تتخذ اجرائات للتعامل مع ده , لكن ده كالعادة مش في الدماغ

المشاركة الأصلية كتبت بواسطة tifana2010

معاك حق يا باشمهندس و لو مافصلوهاش بإرادتهم ممكن المحطات الرئيسية تخرج كلها و تعتم على الكل
فاكر مرة فى رمضان من زمان و أحنا أطفال فصلت الكهرباء عن الجمهورية كلها بعد الفطار نتيجة زيادة الأحمال عن طاقة المحطات الموجودة وقتها حد فاكرها

انا مش فاكر بصراحة , بس بصفة عامة هو شيء ممكن طبعا , و اكيد اختيار فصل الكهربا ارحم من ان محطة تضرب
ربنا يلطف بينا

**mostafabakry** · 08-08-2010 02:24 PM

و الله كلامك كله صح و انا متفق معاك

يا ريت يا جماعة نبقي مسؤولين و نقدر الأمور عشان نعرف نعيش

مش معقولة يكون حياتنا كلها مببينية علي غلط في غلط
تبذير و اسراف و استنزاف كل مواردنا بطريقة بشعة و غير معقولة

يا ريت كل واحد فينا يراعي ضميرة في كل تحركاته
احنا بنمر بمشكلة عويصة الصيف الحالي بسبب زيادة الأحمال في البلد و للأسف الكهربا بتقطع اوقات كتيرة
يعني لو الواحد عنده اكتر من جهاز تكييف في البيت يا ريت يحاول بقدر الإمكان انه يشغل واحد و لا اتنين في اوقات الذروة بحيث اننا بالببلدي نشيل بعض
يعني بدل ما واحد يبقي عنده 3-4 تكييفات شغالين بدون لازمة و اضاءة و غسالات و مش عارف ايه وواحد تاني مش لاقي لمبة تنور الضلمة اللي عايش فيها و لا مروحة تهوي عليه و علي ولاده

يا اجماعة لازم نحس ببعضنا و لازم نحس بالفقير اللي معندوش تكييف و لا ديب فرير و يدوبك عايش بمروحة سقف

يا نرحم بعضنا عشان ربنا يرحمنا