هبطل السجاير و اكون انسان جديد
كل سنه و حضراتكم طيبين
تجربتى مع تبطيل السجاير كانت 3 مرات اتر مره فيهم كانت سنه و نصف ، اكبر خطأ وقعت فيه انى كل مره كنت بوهم نفسى انى لو شربت حجر شيشه فى المناسبات ديه مش مشكله ، و بعدين الحجر بيبقى يومى ، و بعد كده مرتين فى اليوم ، و بعد كده الاقى انى بصرف على الشيشه اكتر مبصرف على السجاير فاقول لنفسى طيب ما اشرب سيجاره فى اليوم و احاول مكترش عن كده و السيجاره تبقى اتنين و ثلاثه لغاية مرجعت اشرب اكتر من الاول ، كل مره فى المرات الثلاثه كان نفس النظام و مبتعلمش .
رمضان فرصه ذهبيه لتبطيل السجاير لان 3/4 من اليوم انت مبطل غصب عنك ، اقترح ان الموضوع ده يكون بدايه لكل الناس الى بتفكر تبطل سجاير ، كل واحد يخش كل يوم و يحكى تجربه فى اليوم الى فات ، و نحاول نشد بعض و نقوى بعض على الصمود و الاستمرار ، و انا من تجربتى انصح بالاتى .
1- كل واحد يحلف بالله انه مش هيرجع للتدخين تانى .
2- دش ماء بارد هو افضل رد فعل سريع فى الوقت الى دماغك فيه هتزقزق .
3- البعد عن المكيفات لانها ترتبط ارتباط لا يقبل التجزئة بالسيجاره .
4- عدم تعويل كل فشل او احباط او زهق على السيجارة و متنساش انك فيه حاجات كتير احبططك و نرفزتك و انت بتشرب سجاير ، يعنى السجاير مش هيه الحل السحرى لاى مشكله .
5- و اخيرا انا لا انصح بالبعد عن المدخنين ، بل العكس لما تقرب منهم و تحس انك اقوى منهم ده هيديك قوه و صلابه اكتر .
و كل عام و انتم بخير