خدمات للعربيات من التوكيلات.....تفتكروا ممكن نشوفها فى مصر ؟؟؟
السلام عليكم
الموضوع ده أنا بقالى فترة بشوفه فى الأمارات تقريباً عند كل التوكيلات
العربيات بتتباع معاها فترة ضمان.....و قد يكون هناك عرض للصيانة المجانية ( فورد هنا بتديك ضمان 3 سنين و صيانة مجانية أول سنة ببلاش )
و فى توكيلات تانية بتعمل زى مصر....العربية معاها ضمان و خلاص على كده.
لحد هنا والموضوع عادى.......الجديد عليا كان أنك ممكن تشترى ضمان زيادة لعربيتك ضد عيوب الصناعة.....مثلاً لو الضمان 3 سنين أو 60 ألف كم.....لأ تشترى كمان سنتين و 40 ألف كم زيادة مقابل مبلغ من المال.
الجديد برضه....ممكن تشترى عقد صيانة لعربيتك.....يعنى عربيتك صياناتها الدورية من غير أى أجزاء أخرى أستهلاكية زى التيل مثلاً......لحد 35 ألف كم بتعمل حوالى 2500 درهم لو جمعت أسعار الصيانات الدورية
تقتدر تشترى عقد الصيانة ب 3000 درهم مثلاً.....و تمشى بالعربية لحد 35000 كم من غير ما تدفع حاجة تانى بما فيها تيل الفرامل على سبيل المثال.
و برضه فى خدمة تالتة بعض التوكيلات بتقدمها......مثلاً توكيل نيسان بيعملها مقابل 95 درهم فى السنة.......الخدمة دى ببساطة زى خدمة المساعدة على الطريق....يبعتلك حد يساعدك لو حصل عندك اى مشكلة من الأتى:
1- البطارية فضيت
2- الكاوتش أتخرم أو باظ و مش معاك أستبن أو حتى لو معاك و مش عاوز تغيره بنفسك
3- البنزين خلص منك و أنت مش واخد بالك
و كذا حاجة تانية أنا مش فاكرهم دلوقتى
تفتكروا لو فى توكيل فى مصر عمل الخدمات دى........هل هيكون عليها إقبال ؟؟؟؟؟؟
طيب لو توكيل عربيتك عامل ال 3 خدمات دول.....هتشترى أيه منهم ولا مش هتشترى خالص ؟
