الله يسامحكم ... حببتوني في الصني، ودلوقتي عايز واحدة

زي ما هو واضح في العنوان

أنا دلوقتي حبيت الصني

كنت متمسك جدا بالهيونداي نيو أكسنت أو الشيفرولية الأوبترا

بس بعد كام موضوع في القسم ده بقيت موش قادر أبطل تفكر في الصني

وواحدة زميلتي معاها صني كلمتها علشان أشتريها منها فقالت إنها موش هتبيع دلوقتي علشان عندها ظروف

أنا بقى دلوقتي عايز صني

وبما إنكم إنتم السبب في إني بقيت أحب الصني يبقى إنتم لازم تشوفولي واحد صني متصلح ومظبوط ومتوصي عليه كمان :)

هو بصراحة أنا موش عايز حاجة عالية قوي
على قد لحافي يعني هامد رجليّ

أنا ميزانيتي للموضوع ده حوالي ستين ألف، نقدر نقول إنهم هم اللي جاهزين معايا
وصعب في المدى القريب أوفر أكتر منهم كتير
هو طبعاً لو فيه حاجة لقطه في رينج قريب ممكن أحاول أدبر الفرق بس يكون بسيط، وتكون العملية تستاهل سلف وزنقة

سمعت إن موديلات صني 2006 و 2007 تعمل أسعار قريبة من ميزانيتي، فهل ده صحيح؟

و في رأيكم إيه الأوبشنات اللي ممكن ألاقيها في حدود ميزانيتي دي؟

والسؤال الأهم، حد منكم قدامه حاجه في الحدود دي؟؟

أنا جاد فعلا والله العظيم
ونفسي قبل العيد بإذن الله أكون مخلص الموضوع ده علشان باتفائل بعربية جديدة في الأيام المفترجة ودخلة الفرحة.
وبيانات الإتصال أرسلها لأي أخ كريم ممكن يوفر لي طلبي

وأجره وثوابه على الله

وحقه المادي -إذا كان راغب فيه- محفوظ بإذن الله.

اعتقد ان المبلغ يشتري نيسان صني موديل 2002-2003

ألف شكر لإهتمامك يا أستاذ محمد

أنا عملت سيرش سريع دلوقتي
وعلى كونتاكت كارز لقيت فيه ناس عارضه عربيات صني وده الرابط

موديلات 2007 الأتوماتيك بيتكلموا حوالين السبعين ألف
وال 2006 الأتوماتيك بيتكلموا حوالين ال 65 ألف

ومع كلام البيع والشراء والمبالغة المتوقعة عند عرض السيارة للبيع متهيألي إن الأسعار دي ممكن تتهز شوية، عندي حق وللا أنا غلطان؟

----------------------------------
لقد خالفت القاعدة رقم 17 من قواعد المنتدى
يرجى مراجعة قواعد المنتدى

10-8-2010
pm 5:30
مشرف القسم
19ب

ممكن حضرتك تتابع أهرام الجمعة أو موقع كونتاكت كار زى الرد السابق، وربنا يوفقك

اقتباس:

---

المشاركة الأصلية كتبت بواسطة harizy

ممكن حضرتك تتابع أهرام الجمعة أو موقع كونتاكت كار زى الرد السابق، وربنا يوفقك

---

شاكر إهتمامك وردك

أنا يهمني المصداقية والصدق والحاجتين دول لمستهم في مشاركات كتير للأفاضل الأعضاء هنا
وعلشان كده قلت أبدأ بحثي هنا

وحاسس إني بإذن الله ربنا هيوفقني

طيب ما تفكر انك تدفع الـ 60 ألف مقدم و تجيبها بالتقسيط
الصني 2010 دلوقتي اوتوماتيك بـ 88 ألف
يعني هيبءي باقي ليك 28 ألف بس تقسطهم
لو كده يبءي احسنلك كتير و القسط مش هيكون كتير فكر كده و شوف القسط هيبءي كام و علي كام سنة (طبعا لو فكرة التقسيط دي مناسبة ليك)
و لو احسنلك المستعملة عشان تريح دماغك من القسط هاتها و روح اكشف عليها في التوكيل عشان تضمن انها سليمة.

المبلغ ده يجيب صنى موديلات(2001- 2002 - 2003 ) بحالة جيدة كامله مانيوال

يا باشا خد عربيتى هديه و تمنها وصل !!

انا عربيتي 2007 اتباعت 68000

اقتباس:

---

المشاركة الأصلية كتبت بواسطة mk682

طيب ما تفكر انك تدفع الـ 60 ألف مقدم و تجيبها بالتقسيط
الصني 2010 دلوقتي اوتوماتيك بـ 88 ألف
يعني هيبءي باقي ليك 28 ألف بس تقسطهم
لو كده يبءي احسنلك كتير و القسط مش هيكون كتير فكر كده و شوف القسط هيبءي كام و علي كام سنة (طبعا لو فكرة التقسيط دي مناسبة ليك)

---

وبعدين بقىىىىىىى

لازمته إيه اللعب في الأفكار ده؟!!! :3mla:

أنا باعمل ده كله علشان أهرب من موضوع التقسيط
أنا أصلاً لسه باسدد أقساط شوية أجهزة منزلية وألكترونية وفاضل لي فيهم سنة سداد

فصعب جدا إني ألزم نفسي بقسط جديد

أصلاً الستين دول ربنا يعلم جايين إزاي

بالإضافة إن الرقم اللي حضرتك ذكرته ده بتاع المانيوال

الأتوماتيك بتسعين تقريبا

وأنا بصراحة نفسي في أتوماتيك وأوبشنات
موش شرط فول أوبشن بس شوية أوبشنات ميضرش برضه، وعلشان كده فكرت في المستعمل

اقتباس:

---

المشاركة الأصلية كتبت بواسطة mk682

و لو احسنلك المستعملة عشان تريح دماغك من القسط هاتها و روح اكشف عليها في التوكيل عشان تضمن انها سليمة.

---

نصيحة جميلة فعلا
مجتش في بالي بجد

وهاحاول أعملها بإذن الله لو قدرت أقنع البائع بها

اقتباس:

---

المشاركة الأصلية كتبت بواسطة fady_anis

المبلغ ده يجيب صنى موديلات(2001- 2002 - 2003 ) بحالة جيدة كامله مانيوال

---

متهيألي يا باشا حسب السيرش اللي عملته النهارده عالسريع كده إنهم ممكن يجوبوا موديل أحدث
ولو سنة بسيطة

هذا والله أعلم

على أي حال شكراً جزيلا على اهتمامك وردك

اقتباس:

---

المشاركة الأصلية كتبت بواسطة ahmediak

يا باشا خد عربيتى هديه و تمنها وصل !!

---

يا باشا منتحرمش
ده كتير علىّ قوي

إحنا موش قد الغالي والعالي

ربنا يملهالك بركه
ويديك خيرها ويكفيك شر طريقها

اقتباس:

---

المشاركة الأصلية كتبت بواسطة mohamedrabia

انا عربيتي 2007 اتباعت 68000

---

طيب يا باشا
معنى كده إننا قريبين برضه

يعني 2005 مع الفصال والذي منه ممكن تييجي في الرينج اللي باقول عليه

وربنا يعوض عليك بأحسن منها

السلام عليكم ..لكل سنه وحضرتك طيب
نصيحه من اخوك الصغير هات حاجه 2004 لانه اخر الياباني في الصاني 2004 بعد كده كله مصري بس الاهم في الحالتين حالتها تكون ممتازه وهيا فعلا في رينج ال 64 ال 63 كده ومش عارف اذا كان الجماعه هنا يؤيدوني في الراي ولا لا ..وبالتوفيق انشاءالله

اقتباس:

---

المشاركة الأصلية كتبت بواسطة mr_lancer

السلام عليكم ..لكل سنه وحضرتك طيب
نصيحه من اخوك الصغير هات حاجه 2004 لانه اخر الياباني في الصاني 2004 بعد كده كله مصري بس الاهم في الحالتين حالتها تكون ممتازه وهيا فعلا في رينج ال 64 ال 63 كده ومش عارف اذا كان الجماعه هنا يؤيدوني في الراي ولا لا ..وبالتوفيق انشاءالله

---

وانت بألف صحة وسلامة

نصيحة جميلة وفعلا أنا بكده أبقى بضرب أكتر من عصفور بحجر واحد
أبقى في حدود الميزانية بتاعتي وفي نفس الوقت أجيب حاجة أصلي
وحسب أسعار كونتاكت كارز ممكن يكون سعرها أقل من اللي حضرتك بتقول عليه كمان

الفكرة بقى
مين يدلني على حاجات زي كده تكون مضمونة وبنت حلال؟!!

تصحيح, 2005 هو أخر اليابانى و بعض الموديلات من 2006 (منها مصرى و منها يابانى), لكن 2004 هو أخر الشكل القديم و الموتور 1300 سى سى فقط, 2005 هو بداية الشكل الجديد و 1600 سى سى و تقفيل يابانى (و على فكرة هتلاقى تاس بتتطلب سعر أعلى فى موديلات 2005 من موديلات 2006 المصرى و 2007 على اعتبار انها تقفيل يابانى)

ربنا يوفقك للخير
...