إشارة روكسي على جسر السويس
إشارة روكسي في ميدان روكسي متهيألي ملهاش حل غير من عند ربنا :majd(4):
بس أنا بصراحة اللي فكرت فيه هو مشكلة إشارة روكسي اللي على جسر السويس
اللي بيحصل إن البهوات بتوع المرور بيوقفوا الإتجاه اللي الإشارة بتاعته مفتوحة علشان يمشوا العربيات اللي جايه من الإتجاه المقابل وعايزه تلف وكذلك علشان العربيات اللي جت من العمودي ومنتظرة تلف
يعني على سبيل المثال أنا لما أبقى جاي من ميدان روكسي ورايح سراي القبة وإشارتي مفتوحة أبص ألاقي العسكري موقفني علشان فيه عربيات جايه من سراي القبة وعايزه تدخل جسر السويس رايحه إتجاه الألف مسكن، وكمان بيوقفونا علشان العربيات اللي جايه في جسر السويس من رمسيس وعايزه تدخل شمال على سراي القبة، ويوقفونا كمان علشان العربيات اللي جايه من جسر السويس من إتجاه الألف مسكن وعايزة تلف شمال علشان تروح ميدان روكسي، ده بالإضافة إلى اللي جايين معانا وعايزين يلفوا شمال رايحين إتجاه رمسيس وبيعطلونا هم كمان...
ولو جاي من الألف مسكن ورايح رمسيس بيوقفونا علشان اللي بيلفوا رايحين سراي القبة رغم إن إشارتنا مفتوحة ده غير إن اللي جايين معانا وعايزين يلفوا شمال على ميدان روكسي هم كمان بيعطلونا لأنهم بيقفوا يستنوا اللي جايين من رمسيس يلفوا...
وهكذا .. كل الإتجاهات بتقف رغم إن إشارتهم مفتوحة أو أضعف الإيمان بيتعطلوا علشان اللي جايين معاهم بيلفوا أو عايزين يلفوا.
الواحد ساعتها يبقى هيتجنن لأنه أصلاً وقف في الإشارة دي كتير وما صدق إنها تفتح، وأحيانا والله تبص تلاقي على ما حنوا علينا وفتحوا لنا الطريق تلاقي الإشارة قفلت تاني، ويادوب كام عربية هم اللي عدوا، وأحيانا مفيش عربيات تلحق تعدي قبل قفل الإشارة
ده بالإضافة إلى إن الوقت اللي بيروح في التبديل بين الإتجاهات بيبقى كبير وبيسبب تعطيل وتكدس للعربيات في كل الإتجاهات
متهيألي إن الحل وبكل بساطة يكمن في منع الدوران في الميدان نفسه...
اللي جاي من سراي القبة وعايز يدخل شمال على الألف مسكن يكمل في إتجاه ميدان روكسي شوية صغيرين ويلف شمال في أول يوتيرن "محور أو دوران أو أياً ما كان اسمه" وياخد يمينه في الإشارة اللي هتكون غالبا رايقه لأن محدش بيلف فيها.
أو ياخد يمين في جسر السويس إتجاه رمسيس وياخد أول يوتيرن ويرجع يكمل على طول.
اللي جاي من رمسيس وعايز يدخل شمال على سراي القبة ممكن برضه يدخل يمين في إتجاه روكسي ويوترن وبعدين طوالي أو طوالي في إتجاه الألف مسكن وبعدين يوترن ثم يمين في الإشارة
أظن كده وضحت بالنسبة للباقيين... اللي جاي من الألف مسكن وعايز يلف شمال في إتجاه روكسي ممكن يطلع طوالي ويلف من جسر السويس شمال في يمين، واللي جاي روكسي وعايز يخش شمال على اتجاه رمسيس ممكن يخش يمين في إتجاه الألف مسكن ويرجع من أول يوترن طوالي أو يطلع طوالي في إتجاه سراي القبة وشمال في يمين.
متهيألي كده يبقى عملنا إنسيابيه في الميدان اللي هو أس المشكلة ووفرنا وقت لا يمكن نستهلك ربعه في عملية الإنطالق طوالي والدوران من اليوتيرن التالي.
هذا والله أعلم
وإلى اللقاء في فكرة أخرى