الموضوع: إشارة روكسي على جسر السويس

لو حسبنا الفرق هنلاقي إن الوقت اللي ممكن نستهلكه في الوصول إلى أول يوترن لا يتجاوز عشرين ثانية بأي حال من الأحوال
ونضيف عليهم زيهم علشان الرجوع نفس المسافة
لما أوصل الإشارة المفترض -بإذن الله- إني هالاقيها رايقة علشان مفيش حد بيوقف حد وإشارته مفتوحة وحتى لو لقيتها مقفولة يبقى أقصاها ستين ثانية كمان
مع العلم إني المفروض ألا أعاني كثيرا من الإشارة الثانية لأني المفروض إني هاكسر يمين واليمين المفروض إنه مبيقفش ومخصص للي هيكسروا يمين
يعني العملية كلها موش هتستغرق أكثر من دقيقتين في أسوأ الظروف وأكثرها تعقيدا
شوفوا إحنا دلوقتي بنستهلك قد الدقيقتين دول كام مرة نتيجة اللعبكة الللي بتحصل نتيجة السماح بالدوران في الميدان

نقطة صغيرة على جنب
المفترض أخلاقياً وثقافيا إن السائقين في الإشارة يتركوا أقصى اليمين فاضي علشان اللي عايز يكسر يمين ميقفش في الإشارة ويعمل تكدس مالوش لزوم، وكده كده اللي هيكمل طوالي منتظر في الإشارة يبقى مالوش لازمة يعطل غيره
لكن تبص تلاقي ناس متعرفش عامله ناصحه وللا شايفة نفسها ميجبش تقف وسط الجرابيع اللي زينا وتستنى دورها في الإشارة، وللا يمكن شايفة إن الأغبياء أمثالي سايبين اليمين فاضي غباوة منهم، تلاقي العالم دي كبست على اليمين لما تشوفه فاضي وتقف في أول الإشارة علشان لما الإشارة تفتح تكون في الأول، أصل الكام ثانية دول هم اللي هيفرقوا وهم دول اللي خلوا جوز نادين العقاد يعرف يوصل من ميدان الإسماعيلية لمدينة زايد في خمسة وعشرين دقيقة

في نفس الوقت تلاقي ناس باااااااااااااااارده عارفه إنها هتخش يمين (أو شمال في حالات أخرى) وعلى الرغم من كده فضلت ماشية في الشمال علشان هو اللي سالك، ومرة واحدة أول الشمال ما يقف تكسر يمين علشان تخش يمين وتقطع الطريق بالعرض.. بالعرض فعلا موش مبالغة لأنك بتلاقي العربية بقت فعلاً عمودية على الإتجاه اللي جايه منه، وتلاقيه في منتهى السماجة مصر يجيب الطريق بالعرض وكأنه لو كمل طوالي ورجع من أول يوترن أو فتحة الدنيا هتقف، أو إن اليمين اللي عايز يدخله ده هو آخر يمين في الدنيا وبعد كده كله شمال.

الصنفين دول من البشر حلهم إيه؟!!!

دول حلهم إن في أقصى يمين الإشارة يتعمل زي محور صغنن جاي من بطن الشارع قبلها بمسافة صغننة بتاع عشرين متر أو حتى أقل، أنا شايف إن في حالة الإشارة اللي بنتكلم عليها ثلاثة متر حلوين قوي وكفاية...
أقصد تقسيم أو تفريع للطريق برصيف صغنن أو بلدورة عرضها مياخدش أكتر من عشرين سنتيمتر موش هيفرقوا مع الطريق خالص، وعليها عمود فسفوري أو علامة علشان اللي مبيشوفش ياخد باله إن الطريق بيتفرع.
.
علشان اللي عايز يخش يمين يضطر يحضّن على اليمين من بدري وميعملش أزمة عند المفارق أو عند الإشارة
وكله يعرف حدوده ومحدش يبلطج على حد

هو ممكن حد يقول إنها كده هتضيق من عرض الشارع، وممكن يكون عنده حق إلى حد ما، بس شوفوا مقابل إنسيابية في المرور شكلها إيه

هذا والله أعلم

العفو يا أحمد باشا

ده تبين إن إنتم السابقون ونحن اللاطشون :)

مكنتش أعرف إن فيه فكرة قديمة لحل الموضوع والله

بس عموماً هو الفرق بين الفكرتين إن فكرة حضرتك تتخص في إلغاء الإشارة وتحويلها لمحاور ودي فكرة جميلة بالمناسبة

أما فكرتي فهي عدم السماح بالدوران عند الإشارة

وأنا لجأت للفكرة دي علشان شغلي علمني إني أراعي ثقافة متخذ القرار، والبهوات اللي ماسكين المرور فكرهم الحالي بعيد عن موضوع المحاور ده
كانت موضة من كام سنة كده وعدت
فقلت أحاول أقدم فكرة تضبط الوضع القائم وخلاص

بس فعلاً فكرتك أحلى من فكرتي

المهم بقى، الكلام ده يوصل إزاي ويتطبق إزاي؟

حد معانا هنا ضابط مرور؟