الموضوع: ألماس دهب صفيح .. معدنك ايه؟

سؤالك غريب يا نور .... مش لاقي له إجابات
انا معدني خليط من اعجب الخلطات
ساعة ما اروق يبقى حرير بيهفهف مع النسمات
ولما بأحب ... بيبقى معدني الهمسة و الكلمات
ولما اسوق في الشارع مع البشر والميكروباصات
بألاقي معدني صبح صفيحة ... مليانة بالنفايات
وساعتها باهرب من الخلق والحر والكلاكسات
واروح لبيتي التاني ..... اجمل المنتديات
واكلم زمايلي واصحابي ... الاعضاء والعضوات
بيبقى معدني كيبورد وشاشة .... وشوية الكترونات
ولما بأبص في عيون ولادي بيكون معدني البسمات
يارب تكتبلهم من كل ضيق سلامات
يمكن زمانهم يكون احسن من زمننا .. زمن السرقات
ولما باكون حزين وافتكر حبايب وحبيبات
باقول يارب اكتب لنا نقابلهم في الجنات
بيكون معدني مزيج من الشوق والحزن والدمعات
و افتكر ذنوبي ألاقي معدني ندمي على اللي فات
ويدوب معدني الترابي في سيل من العبرات
وأفتكر رحمة ربنا واتأمل في الأرض والسموات
اقول اكيد ربنا ح يرحمني مع باقي المخلوقات
ده انا من غير رحمته ح اكون اضعف من الحشرات
اكيد ح يرحمني ده هو رحمن الارض والسموات
حتى الجماد له فضل عني .... لولا فضله والرحمات
انا معدني كل دول .... تفتكري يا أم يارا اختار ايه من الخيارات ؟؟؟؟؟؟