الموضوع: بعد الـ ABS و EBD وAuto parking - إختراع مصرى ATD !!

السلام عليكم،

حلوة أوى الأفكار دى حتى لو هيا موجوده بالفعل فى فئات عالية،

فكرتنى ايام زمان لما كان الواحد عنده قدرة على التخيل،

كنت دايما اقرأ عن العربيات ال 8 او ال 12 سلندر وسعات ليترية 4000 وما فوق،

كنت دايما بقول ليه القوة الهادرة دى تضيع فى الزحمة وخنقات المرور ويبقى بس اهدار للطاقة لا أكثر،

ساعتها قعدت أفكر بتاع اسبوعين كده ولا حاجه، وقلت طب ليه ما يعملوش نظام فى العربية يخليها تمشى على 4 سلندرات وسعة ليترية قليلة لما تكون القيادة هادئة او بطيئة جدا داخل المدينة واول ما يكون فيه مجال للسحب تفتح باقى السلندرات،

وبعدها بقيت زعلان جدا لأنى مش لاقى حد أقوله على الموضوع ده، ومكنش لسه فيه نت فى مصر،

المهم بعد سنة تقريبا على ما أذكر قريت ان جاكوار او مش فاكر شركة ايه بالظبط اعلنوا عن اختراع النظام ده،

وساعتها حسيت بالحسرة بجد،

ونفسى ربنا يقدرنى فى يوم وأقدر أتبنى الأفكار المتطورة وتكون فيه مؤسسة كبيرة تقدر تساعد على تنمية المهارات وتطبيق الإختراعات المفيدة،

وبالنسبة بقى لفكرتك،

فعلى الرغم انها ممكن تكون وجوده فى عربيات تانية،

ليه مانحاولش نفتكس طريقة بجد لتطبيق الفكرة دى؟

يعنى ممكن الإدارة تفتح ساحة جديده وتسميها افتكاسات او ماشابة،

والأعضاء يعبروا عن أفكارهم وطموحاتهم فى مجال السيارات واللى يقدر يناقش الموضوع تقنيا وواقعيا قدر المستطاع يشارك،

وصدقونى الموضوع ممكن يبدأ كده وينتهى بمؤسسة كبيرة وانجازات عظيمة جدا،

وعلشان بس محدش يفتكر انى خيالى ومش واقعى، فلو تعرفوا نظام اللينكس بدأ ازاى هتتعجبوا جدا،

ليناس تورفالدز اللى وضع أول نواة لنظام اللينكس كان على جروب على النت وبدأ الحديث كده كمحاولة بسيطة وانتهت بنظام تشغيل اعتبره الأروع حتى الآن،

وكفاية ان شركات ضخمة زى schlumberger وشركات بترول كتيره جدا حولت السيرفرات الى لينكس المجانى متوح المصدر بدلا من يونكس المكلف جدا،

وقريبا سيطيح اللينكس بالويندوز نهائيا الا اذا تخلت مايكروسوفت تماما عن سياستها الحالية وغيرت من كل استراتيجياتها ، واللى عايز يتفرج يشوف اللى بيعمله فيها الإتحاد الآوروبى.

فإيه رأيكم فى موضوع الساحة ده ؟