الموضوع: مشكلتي مع التوكيل و الحل غير مرضي ! يارب !

معليش يا باشا وبهدوء وزي ما قال ابو ليلى نفذ كده ولو مكنش على طول حتة ايميل لكيا كوريا هتلاقي التوكيل كله بيتصل بيك .......
اللي اعاتبك عليه يعني ايه بقى صنايعي يزعق ويخبط على العربية هي كانت بتاعته ولا ايه ؟؟؟؟ الدنيا صيام والواحد مش عايز يشتم على الصبح حضرتك كنت لازم تهزق المهندس والفني ده هو احنا جايبيين عربيات اطفال علشان حد يطبل عليها ولا ايه ......
ورمضان كريم يا باشا

المشاركة الأصلية كتبت بواسطة abouleila

كل سنة وانت طيب ورمضان كريم

فى بداية كلامى عاوزك تتاكد من شى انك وسط اخواتك وبيتك وكل اللى موجودين فى القسم مقدرين تماما ما انت فيه وكلنا فى قمة الضيق ومن حقك علينا اننا نسمعك ونخفف عنك ......ولكن

كلام حضرتك فى عصبية شديده جدا والنتيجه انك مش عارف تاخد قرار نتيجه التوتر اللى انت فيه

الموضوع محتاج هدوء علشان احنا كمان نقدر نفكر معاك بصوت عالى ونفيدك ولاازم نحط كل شى

فى وضعه الصحيح لان كل من سيدخل ويقرا الموضوع هياخد انطباع واحد فقط وهى ان العربية

سيئة جدا ودليلهم كلامك ده .

المشكلة كانت بسيطة وبتحصل عند اغلب اللى عندهم عربيات وانت وصلت لحلها ولكن للاسف

كان معاك الفرصه وقتها انك تتكلم ومعاك الدليل كمان ( الصورة ) وسكت ......؟!!!!!

راى الشخصى ترجع تانى للتوكيل وبهدوء تدخل مباشرة على مدير الصيانة وتحكيله الموضوع

من اوله وخليه يشوف الصورة واسمع رده ايه .

موصلتش الى شى كلم الشركة فى القاهرة واكيد هتلاقى موضوعك اتحل لان معك حق .

موضوع حماية المستهلك لما تكون المشكلة كبيره وعيب صناعه وفواتير وحاجات كتير بلاش تدخل فيها دلوقتى .

زمان قالهالى ابويا ربنا يديله الصحه ......اخد الحق حرفه .

والله كلامك كله صح يا باشا , و بعدين انا مستغرب كاوتش كبالن ازاى و العربيه 2010 و لو ده حصل يبقى تتغير فى الضمان الكبالن كلها او على الاقل الكاوتش و ده حصل معايا فى عربيتى الاوبترا القديمه و بصرحه بتليفون صغير لخدمه العملاء غيرو الكبلن بالكامل و اعتذرولى كمان. انا شايف ان صاحب المشكله مش عارف ياخد حقه ازاى

المشاركة الأصلية كتبت بواسطة computerking

انا مقهور لدرجة تجن اوي ! مهوا انا مخدش بالي الا لما روحت و شفت الصور !

الفكرة كانت انا في الخباثة اخد صور علشان الذكرة و اعرف شكل الكاوتشة في المستقبل ! لما رجعت البيت و حطيتها على الكمبتور لقيت الحوار ده

و هما اصلاً بعدوني عن العربية و مخلونيش اقرب منها و الصنيعين اخد الكبالين جوا علشان مشوفش و ركبهم علطول !

الاداء متأثرش بس الفكرة انوا الحورا ده حياثر في المستقبل و يبوظ بقيت الكاوتشات ! و البس انا !

والله انا كرهت العربية ديه و كل حاجة جت من وراها ! والله مالها مش ببلاش و الواحد تعب فيه سنين ليه كدة ! و عمري ما اذيت حد ولا اكلت جنيه حرام ! ده العربية ديه فرحت عمري زي ما بيقولوا و من اول ما جبتها عاملة زي 128 فاتحة بقها مصاريف !

والله صيانات و تصليحات توكيل لحد دلوقتي يخشوا في 10 مقفولة ! يعني انا شاريهات ب 122 فيها 6 استلام فوري و صارف 10 و هيا عربية زيروا !

منهم لله و يارب صبرني و ساعدني على مصيبتي !

ايه الحل دلوقتي ؟ اروح بكرة التوكيل في عز الحر و تاني يوم رمضان برضك ؟

ان حاحاول اساعدك بطريقة عملية شوية

خد معاك الصور و ار جع التوكيل (انا عارف انه مشوار رزل) و لما تدخل العربية لمهندس الأستقبال قوله انا عايز اقابل م/ محمد عادل مدير الصيانة حيدلك عليه و ممكن جدا تلاقيه بيلف هناك مش قاعد فى مكتبه

احكيله على القصة ووريه الصور و ان شاء الله المشكلة تتحل

فى اسوء الظروف لو ملاقتش م/ محمد عادل اسأل على م/ شريف انا مش فاكر اسمه شريف ايه بس هو اسمرانى و طويل هو راجل محترم و زوق

و ابقى طمنى عملت ايه و انا حتابع معاك

المشاركة الأصلية كتبت بواسطة ehabnoor

صباح الفل علي أحلي رجالة .. و كل سنة و انتم طيبين و بألف صحة و خير و سلام ياااااااا رب ..

أولا يعني ربنا يعينك و يصبرك علي اللي حصلك .. و ثانيا عشان ما أطولش أنا متفق 100% مع الناس اللي قالت انك لازم تاخد الصور و ترجع للمهندس في التوكيل و كلمهم بمنتهي الذوق و من غير عصبية عشان تعرف تاخد حقك بالذوق ، و لو لا قدر الله ما حصلش حاجة .. لازم إن شاء الله تكلم (المكتب الرئيسي في القاهرة) ولو ما جابولكش حقك أمانة عليك ما تسكتش و تبعت ايميل لشركة كيا في كوريا وانا متأكد بإذن الله انهم يا إما هيكلموك شخصيا يا إما هيبعتولك ايميل و إن شاء الله بإذن الله مشكلتك تتحل .. بس المهم ما تسكتش رجاءا عشان الغلط و الله بييجي من هنا .. لو كل واحد خد شغل مش عاجبه و سكت عليه عمر ما هتلاقي بعد كده رقابة و لا حد بيشوف شغله مظبوط و الأمور هتبقي أسوء من كده .. و ما تقولش انك يعني لوحدك هتغير الكون .. الفكرة مش كده .. لكن لو مرة في مرة وواحد علي واحد الموضوع و الله بإذن الله هيفرق في النهاية .. السلبية في الحاجات الصغيرة اللي بتوصلنا للإهمال في الحاجات الكبيرة .. المرادي كوتشة المرة الجاية يا عالم الإهمال ممكن يوصل لإيه و طالما إن غلطات التوكيل زادت أوي كده يبقي لازم إن شاء الله يتحطله حد و الشركة الأم في كوريا تعرف عشان يبقالهم موقف و الحقيقة و الله هما ناس محترمين جدا و أول ما استلمت العربية كانو بيتصلوا بيا عشان يعرفوا معلومات عن العربية و هل في حاجة في الصيانة مدايقاني ، و علي فكرة انا عاوز اقولك علي موقف حصل معاية شخصيا و الله العظيم .. انا مش بحكيلك الموقف ده عشان أدايقك أكتر بس عشان أوريلك الناس بره بتتصرف ازاي و احنا للأسف الإهمال وصل عندنا لدرجة إيه ..
من حوالي كام شهر كنت بعمل صيانة 7500 كم (أنا بعمل صيانة حسب التوكيل كل 7500 كم) المهم بعد ما العربية خرجت الحمد لله رب العالمين و انا بشيك كده لقيت غطا القربة البلاستيك اللي بتزود فيها المية الخضرا للريدياتير مفتوح المهم رحت لفت نظر الراجل و الراجل اعتذرلي و مشيت ، المهم بعدها بكام يوم كانت الشركة بتتصل بيا زي ما قلتلكم بصفة دورية عشان يعرفو اخبار العربية و هل عندي مشكلة مع الصيانة المهم قالولي ممكن تقيملنا اخر صيانة كان اخبارها ايه المهم قلتلهم انا كان عندي مشكلة في المراية اللي في النص و هي ان اللمبة الحمرا لما تيجي تطفي المراية مش بتنور هي المراية الحمد لله رب العالمين شغالة كويس لكن اللمبة بس مش شغالة ، و كمان قلتلهم علي موضوع غطا القربة .. و المهم اعتذرولي و قفلوا معاية و والله العظيم تاني يوم لقيت مهندس الصيانة بيتصل بيا و بيعتذرلي و بيحدد معاية معاد عشان يحللي اي مشكلة عندي و الله العظيم يا رجالة انا كنت سعيد بالمكاملة و كأن مشكلتي اتحلت مع ان الموضوع اصلا من وجهة نظر اي حد تافه و بسيط جدا ، بس هي دي الفكرة الناس دي ما عندهاش حاجة صغيرة و حاجة كبيرة ، اهمال يعني اهمال و في حد غلط و حد لازم يتحاسب .. انا عارف اني طولت بس اللي عاوز اقوله ان الموضوع حتي لو صغير و مش فارق معاك ممكن بعد كده لا قدر الله يفرق مع غيرك و معاك او معاية وممكن كمان يبقي في حاجات اكبر .. و انا كنت قبل كده برده علقت علي طريقة تعامل التوكيل في مصر مع بعض الناس في مشاركة ليا الحقيقة مش فاكر في اي موضوع وقلت لو التوكيل في مصر بيتعامل بالمبدأ ده يبقي مش أمين الصراحة علي عملاؤه و لا بيهمه غير انه ياخد فلوس و بس .. و حرام الفلوس الزيادة عشان العربية تبقي تابعة للتوكيل إسما و بس ..

ده طبعا مش فى مصر ,على فكره انا متفق معاك 100 فى 100