الحمد لله وصلت مصر بتاريخ 1اغسطس وقعدت اسبوع دايخ علي عربية ايجار لان الوقت دة زي مانتم عارفين موسم واللي عندة حمارة بيأجرها بمبلغ وقدرة
اول عربية (كارثة) وقعت فيها كانت عربية لانوس 2005 زبالة بمعني الكلمة وكان عاوز يأجرها لي ب 100 جنية في اليوم بس العربية لما سقتها لاقتها طلعان عينها
تاني عربية اجرتها لمدة يوم واحد بس كانت فيرنا 2007 ودي كانت جاية لي من واحد صاحب اخويا في بلدنا في المنوفية وكانت علي 110 في اليوم بس ماستريحتلهاش ورجعتها
دلوقتي انا معايا لانسر 2007 حلوة بس العربية باين عليها متهانة شويتين لان صاحبها قالي انة لسة مركب لها ماكنة جديدة استيراد
المهم اول يوم وانا جايبها وجاي من المنوفية علي الطريق السريع من شبين الكوم للقاهرة وقبل القاهرة ب 25 كيلو فجأة الدبرياج بتاعها سقط وكانت ليلة مهببة المهم انا استمريت ماشي عالخامس لاني مش ممكن اقف وكانت الساعة 3 بالليل المهم وصلت الحمد لله بالسلامة ودخلت محطة بنزين عشان اشتري زيت باكم لاني لاقيت الزيت اللي فيها فاض كلة وحاولت احضر الدبرياج انة يشتغل....ابداً
وصلتها لحد البيت بالعافية وركنتها في الشارع وتاني يوم جبت لها ميكانيكي غيرلي مستر الدبرياج والحمد لله ماشي بيها بس بخاف منها جدا ليحصل لها حاجة وانا ماشي. مش عارف لية في مصر العربيات الايجار بتكون متبهدلة بالشكل دة
علي فكرة...تخيلوا انا مأجرها اليوم علي كام؟