المسامح ربنا

**yassin_samir** · 12-08-2010 01:16 AM

الحكاية دى حصلت اليوم قبل المدفع بنص ساعه
مع انى مبطل سجاير من فترة حوالى اسبوعين قبل رمضان لكن العصبية اللى فى رمضان هى هى
المهم ماشى بالعربيه فى المنطقه عادى و انا من النادر انى ادخل بالعربية جوا ابدا لكن كان عندى ظرف كدة خلانى اخل و اللى مش عارف ارض اللواء انه تقريبا من اكبر المناطق اللى فى الجمهوريه بها تكاتك
المهم خارج و الشارع لاول مرة فاضى و مش مزحوم و مرة واحدة اسمع ورايا دش دش
انا بدون تفكير نزلت و عصاية الدركسيون فى ايدى لقيت توكتك داخل فيا من ورا طبعا منغير مابص رحط ضارب الزجاج الامامى بتاعه ببص لقيته على الارض و الواد بتاع التوكتك مزهول لسه بيتكلم روحت ضارب الزجاج الجانبى بتاعه راح مكسور و طبعا بعد ما غلط جامد و قولت كلام وحش
المهم الناس انقسمت فريقين فريق يدافع عنى و اخر عايز يمسك فيا
المهم بعد ما جيت طبعا على رجلى بعد الفطار عرفق ان الناس مسكوا فى بعض بسببى
اللى عمل كدا انا حاسس انة مش انا دة شخص تانى انا مكنتش فى وعى ابدا مش عارف اوصف الحالة اللى انا فيها مش عارف يوم الصيام دة ضاع كدة ولا اية رضوا عليا ارجوكوا

**M.Mosaad** · 12-08-2010 01:27 AM

اليوم ضاع او مضاعشي دي حاجة بتاعه ربنا محدش يقدر يفتي فيها
انا مقدر حالتك يمكن كان رد فعلك عنيف اوي بس الواحد فعلا لما عربيته بتتخبط من غير ذنب و لا لازمه بيبقي شايط علي الاخر

بس اذكرك و نفسي بالأيه الكريمه ( و الكاظمين الغيظ و العافين عن الناس و الله يحب المحسنين ) صدق الله العظيم

حاول دايما و انت سايق تذكر نفسك بيها لان الواحد طول ماهو سايق بيحتاجها كتير جدااااااااااااا

**yassin_samir** · 12-08-2010 01:43 AM

شكرا يا فندم على مرورك
انا اصلى بسوق موتوسيكل على طول و من النادر انى اركب العربية الا لما بوصل الحاج او الحاجة يعنى مش متعود على حرقة الدم اللى بيسوق عربية بيلقيها الا نادرا و طبعا العربية لسة تعتبر جديدة يارب نعزل من المنطقه هنا انا بركن العربية على بعد 2 كم من البيت دة اقرب مكان اقدر اسيب العربيه فية او ممكن عند الشغل شوفت الحلاوة اللى انا فيها
انا نفسى اسكن فى مكان اركن العربية فية تحت البيت ذى باقى الناس الكويسة نفسى اخد شقة فى اكتوبر و الله

**AhMeD EzZ** · 12-08-2010 02:02 AM

و الله يا باشا نفس الي حصلي اتخانقت مع صاحبي ليلة رمضان بسبب انه حكلي العربية بتاعتي و هو سايق جنبي مش عارف في ايه او ايه الي خلاني اعمل كدة مهي بتتخبط و هي واقفة

**yassin_samir** · 13-08-2010 12:19 AM

والله انا قاعد ادور على الواد يتاع التكتك علشان ارضية باى حاجة انا حاسس انى ظلمتة و خصوصا انى لقيت بعد كدة ان العربية مفيش فيها تلفيات مجرد شوية خرابيش فى البوية فقط

**adel1212** · 13-08-2010 01:26 AM

انا كنت فاكر نفسى لواحدى
من اول اليوم حاسس ان البلد كلها بتكسر عليا
لا يقل عن عشر مرات و بقول مشى اليوم
اللهم انى صائم
وانا مروح قبل الفطار بساعتين على مطلع الدائرى نقل بمقطورة خدلى الجنب الايسر من الخلف
ويدوب نزلت من غير متكلم لقيت اللى واقفين كلهم كل سنة وانت طيب يا بيه رمضان كريم ده راجل غلبان
ربنا يعوض عليك عاااااااااااااااااااااااا ااااادة مصرية مش عارف الحقيقة اصنفها
قلت والكاظمين الغيظ واللهم انى صائم وعندى عيال عايز اربيهم
لانى لو اخذت اى اجراء فى التوقيت ده
على الاقل حتحبس
يا عالم الخير فين

**Abo_Lina** · 13-08-2010 02:12 AM

حاول ما تتخانقش خصوصا في منطقة بتتردد عليها
الناس حاسة بقهر و إنعدام وزن و ما بيصدقوا يفرغوا شحنة الكبت دي ,,, و لو بعد حين

**medo_2060** · 13-08-2010 02:18 AM

حضرتك حاول تشغل قران فى العربيه وانا مقدر ان بتوع التكاتك دول مستفزين لابعد الحدود بس .... خليك انت الافضل ومتحاوش تنزل كتير فى وقت الصيام الا لضروره
وكل سنه وانت طيب

**yassin_samir** · 13-08-2010 02:32 AM

المشاركة الأصلية كتبت بواسطة medo_2060

حضرتك حاول تشغل قران فى العربيه وانا مقدر ان بتوع التكاتك دول مستفزين لابعد الحدود بس .... خليك انت الافضل ومتحاوش تنزل كتير فى وقت الصيام الا لضروره
وكل سنه وانت طيب

و حضرتك بالف خير و سلامة ان شاء الله هتبقى اخر مرة يحصل كدة و الله المستعان