تيل الفرامل وإعادة التأمين و زيارة بدون حجز و تعامل رائع من التوكيل
إخوانى أعضاء المنتدى كل سنة و حضراتكم طيبين بمناسبة حلول الشهر الكريم. طبعا الموضوع ده هو أصلا الموضوع اللى كنت هكتبه من حوالى أسبوعين قبل ما يتحول الموضوع لدعوة لمناقشة الشكاوى. الحقيقة كنت عايز أشرككم فى تجربة رائعة مع التوكيل و قد أكون محظوظ إنى اتعاملت مع أكتر ناس ذوق هناك بس الحقيقة كانت تجربة مميزة للغاية و جديرة بالذكر.
الحكاية باختصار إنى كنت رايح أعمل شوية حاجات هايفة تبع التأمين قبل ما يخلص و يروح عليا و أجدده بالمرة و لو الناس فاكرة أنا كان عندى تيل فرامل عايز يتغير فى صيانة ال20000 و أنا ما غيرتوش. المهم دخلت لمحسن صالح أستشيره فى موضوع التأمين و كان فنى اسمه يسرى ربنا يباركله و لسه له شكر على خدمة تانية هنجيلها قدام بصصلى على العربية و قاللى حرام عليك لأن الحاجات اللى فيها مش مستاهلة تتعمل قلتله آه بس لما آجى أجدد التأمين أكيد هتتفحص تانى و ساعتها هيتثبت فى الفحص الحاجات التافهة دى و هعملها على حسابى و بعدين دخلت لمحسن صالح اللى قاللى لو معاك فلوس التجديد دلوقتى و جددنا و العقد القديم سارى ممكن ما نحتاجش فحص جديد و قد كان و الله العظيم ما اتحركت من مكتب محسن صالح ربنا يكرمه و يباركله على ذوقه و تعبه معايا أخد منى الفلوس و جابلى وصل بيها و قاللى أروح أستلم منه الوثيقة بعد أسبوع و من غير فحص (ده أول موقف).
أنا بقى أصلا كنت عامل حسابى إن العربية هتدخل التأمين لمدة أسبوع و لا حاجة و قبل ما تخلص أحجز صيانة عشان تركيب التيل بس لما لقيت نفسى هرجع بالعربية قلت لما أروح أجرب و روحت و قلتلهم على البوابة إنى مش حاجز بس كان ليا قطعة غيار ما ركبتش فى الصيانة السابقة وقفوا العربية بره و قالولى استأذن المهندس/ محمد عبد الهادى الأول و الراجل ماشاء الله كان قمة فى الذوق و الاحترام بمجرد ما قلتله على الوضع قاللى تيل فرامل دى حاجة مهمة جدا و متعلقة بالسيفتى و سلامة حضرتك أكيد لازم تتعمل حتى لو مافيش حجز أنا هستلم منك العربية و بالفعل استلمها و قاللى عندنا 3 أنواع تيل المصرى و ده تمنه 250 جنيه و الماليزى و ده تمنه 350 جنيه و الألمانى زى اللى كان راكب فيها تماما و ده تمنه 1300 جنيه و سألته عن رأيه رشحلى الماليزى قاللى إنه ساعات بيصفر لكن كفاءته أفضل من المصرى اللى ممكن يكون ما بيصفرش بس فيه تكة كده بتقلق اللى بيفرمل رغم إنها مالهاش تأثير زيها زى الصفارة على كفاءة الفرامل و اتفقنا إنى هستلم على الساعة 3 و كانت الساعة وقتها 10:30 و ساعتها جالى يسرى و هو الفنى اللى بستلم منه العربية باستمرار فى كل المرات اللى عملت الصيانة فيها جه سلم عليا لأنه خلاص بقى تقريبا حافظنى و سألنى على سبب زيارتى تانى غير موضوع التأمين و لما قلتله سألنى عن ميعاد التسليم و قاللى اتطمن إن شاء الله تخلص علطول و المفاجأة المهندس محمد اتصل بيا الساعة 12 إلا ربع و قاللى العربية جاهزة تعالى عشان تستلمها و الأجمل إنى الحمد لله طلعت واحد من المحظوظين اللى التيل ما صفرش معاهم و عشان الناس ما تفتكرش إنى اتسرعت فى الحكم التيل بقاله معايا حوالى أسبوعين تقريبا و عملت بيه 650 كم منهم 360 طريق سفر و الحمد لله ما صفرش.
- شكرا للمهندس محسن صالح على مجهوده و الخدمة الجميلة اللى قدمهالى.
- شكرا للمهندس محمد عبدالهادى على حسن المعاملة و استلام العربية فى يوم مشحون بدون حجز و بس عشان خاطر أهمية قطعة الغيار و عشان سلامتى.
- شكرا للفنى يسرى لسرعة استلامى العربية لأنى واثق إن هو السبب الرئيسى فى النقطة دى.
و على فكرة المهندس آمر كان فى إجازة بس برده شكرا ليه لأنى واثق برده إنه وجوده على رأس الناس دى هى اللى خلتهم يتصرفوا كده.
