انا اشتريت يانسن سمك 25 سم - سوست متصلة - ب1350 جنيه من مصطفى النحاس - مدينة نصر بجوار اولاد رجب
الحاجات اللي لازم تعرفها :
1-الأنواع الموجودة في السوق : يانسن - ماستر بد - هابيتات - الدورا - انجلندر - تاكي - فوربد
2- تخانة المرتبة المتوفرة : 22 - 24 - 25 -27 -30 سم وكل ما يزيد السمك تزيد طبقات التبطين وبالتالي الراحة
3-نوع السوست المستخدم سوست منفصلة أو سوست متصلة ..... وبالطبع السوست المنفصلة أريح وأغلى ودة علشان انفصال سوست المرتبة عن بعض يعني لو حد قام من جنبك وانت نايم ما تحسش باهتزازات في المرتبة
4- في حاجات زي وجه صيفي للمرتبة ووجه شتوي وفيه وجه واحد فقط يمشي صيفي وشتوي وكدة يعني
5- حدود الاسعار المعقولة للمقاس 160x200 هو 1200-3500
وماستر بد فيه منها نوع ب7000 جنيه وشفت مرة مرتبة أمريكي ب37 ألف جنيه
6- ممكن تجرب المرتبة في المحل ما تتكسفش ...يعني تحطها على الأرض وتقعد وتنام عليها عادي
7- الأماكن اللي ممكن تجيب منها في مدينة نصر : شارع مصطفى النحاس ملياااان محلات
8- ممكن تتفق مع المحل على النقل والمشال وممكن تاخدها على سقف عربيتك عادي بس خد بالك علشان بتكون تقيلة جداً
9- ما تنساش تملى ورقة الضمان بالبيانات ويختمهالك ختم المحل وتاريخ الشراء
أي استفسارات تانية انا تحت أمرك