الاونو بتبطل و انا ماشى

السلام عليكم

انا هحكيلكم الحوار من الاول و يا رب حد يقدر يساعدنى

انا اشتريت العربية من حوالى 5 شهور , اول ما جبتها كانت بتغيب فى الدوارة فغيرت مشط اسبراتير (1) و بوجيهات (1)


من حوالى شهر , ابتدت العربية تبطل و انا ماشى , كانت تبطل لما اكبس بنزين , و الله اعلم كانت بتشرق


رحت لميكانيكى (1) , قالى المشكلة فى مشط الاسبراتير هاتلى واحد و هتبقى زى الفل , قلتله ده لسه جديد قالى عادى ممكن يبوظ بسرعة , المهم جبت مشط (2) , وركبهولى و مشيت , و فى نفس اليوم بطلت منى تانى , كلمته قالى طب هاتلى ابلاتين و موبينة اغيرهملك و هتبقى زى الفل

حسيت انه بيفتى , رحت لميكانيكى (2) , قالى ده الكاربراتير عايز يتنضف , قلتله نضفه , المهم نضفه و قالى كده تمام

العربية بقت بتطلع دخنة سوداء و مدافع و بتستهلك بنزين بشكل مبالغ فيه , و فوق كل ده بردو بتبطل , رجعتله قالى الكاربراتير و حش و عايز يتعمله اكس و باب

قلت اروح لواحد تانى , رحت لميكانيكى (3) , فك الكاربراتير و غيرلى بيك البنزين , كان فيها بيك 105 حط بيك 100 , و غيرلى بوجيهات (2)

المدافع راحت و الدخنة السوداء راحت , بس المهم بردو العربية بتبطل و انا ماشى , و كمان مخنوقة

كلمته قالى ده بيك السلانسيه متوسخ , تعلالى انضفهولك و هتبقى تمام


قلت اجرب اروح لواحد تانى , رحت لميكانيكى (4) , سبحان الله لما رحتله و ركنت , العربية مش عايزة تدور تانى , جاب مفك كده و حطه فى سلك و قالى دور , المفروض يطلع شرار بس مطلعش , قالى المشط قاطع , قلتله ده لسه جديد , قالى يبقى الراجل اداهولك بايظ

رجعت للراجل اللى خدت منه المشط , و اصريت انه يغيرهولى , و فعلا ادانى مشط تانى (3) بس امريكى (مشط (2) كان ايطالى) , ورحت للراجل ركبهولى و غيرلى فيشة مشط الاسبراتير كمان

الكلام ده كان امبارح , النهاردة و انا رايح الشغل و راجع من الشغل بردو بتبطل , انا مش عارف اعمل ايه


ملاحظات:

-العربية بتدور الصبح عادى

-العربية بتبدأ تبطل بعد ما اطلع بفترة , يعنى بتفضل 5 كيلو كده (او ربع ساعة) ماشية تمام (يمكن بتبطل لما تسخن)

-العربية غالبا بتبطل لما اهدى عشان مطب او اشارة مثلا

-ساعات تبطل و تدور على طول و ساعات بتغلبنى و تفضل ربع ساعة مش عايزة تدور

-العربية فضلت كذا مرة بتبطل فى نفس المكان بالظبط كل يوم , لسبب ما انا مش عارفه

-من بعد ما ضيقت البيك , بتعمل حركة سخيفة اوى اول ما بطلع , بتنخع كده , كانى بدوس بنزين و اسيب و انا على الاول

- فى كذا مرة من المرات اللى بطلت فيها , اجى ادور تلقط بس احس انها هتبطل , اكبس بنزين على الاخر صوتها مبيعلاش , بسمع صوت تك تك تك , بعد حوالى دقيقة كده صوتها يعلى و تمشى عادى



ساااااعدونى , انا يمكن كتبت معلومات كتير ملهاش لازمة , اسف على الرغى الكتير , بس قلت يمكن اى معلومة تيجى بفايدة

و شكرا مقدما و جزاكم الله خيرا

جرب بوبينا تانيه

الله يكون فى عونك يا باشا فانا حاسس بيك لانى تقريبا اتعرضت لنفس الموقف و عارف اد ايه ممكن يخلى الواحد قرفان و مخنوق

الموضوع دة لة علاقة بدورة البنزين فقط راجع علي مسار البنزين من التانك لحد الماتور يمكن يكون في حاجة مسدودة وتاكد من تنظيف بك السلانسية كويس وغير فلاتر البنزين وايضا تاكد من نظافة البنزين

السلام عليكم

شكرا جدا ل م/سمير , و الاستاذ momenfayed


بصراحة انا ابتديت بالارخص , النهاردة بعد الصلاة رحت جبي فلتر بنزين و بيك بنزين 105 جديد زى الاصلى بتاع العربية و رحت للميكانيكى و غيرهملى و خليته ينضف بيك السلانسيه و كان فعلا متوسخ

بصراحة حسيت بفرق فى سحب العربية بشكل كبير , و النتيجة هتبان فى المشاوير الطويلة يوم الاحد و انا رايح و راجع من الشغل


الف شكر لمساعدتكم يا رجالة , لو بطلت تانى هفكر فى البوبينا وربنا يسهل

بتبطل و انت ماشى تروح تنضف الكربراتير عدل لو العربية انجكشن تروح تظبطة لانها لو كربراتير عادى هتلاقى بك السلانسية مسدود ده اللى بيبطل العربية و هى ماشية

فعلا يا رجالة الحمد لله النهاردة مبطلتش منى خالص

الف شكر ليكم يا رجالة نايل موتورز

فك بيك السلانسيه بنفسك ونضفه عن طريق النفخ فيه

بص يا باشا العيب ده بسبب ان البكات بتكون مشفطه تراب او الكربيراتير مش مظبوط نضف دورة البنزين كويس والمشكله هتتحل وراجع علي سلك الارضي الا واصل للماتور واتاكد ان الموبينه مش بتهرب كهربا بس الاكيد ان شاء الله ابدا بدورة البنزين من اول التانك لغايه ما يوصل لغرف الاحتراق واتاكد من نضافة فلتر العمه

العيب طلع فى "الابلتين" اللى جوه الاسبراتير

انا بقول عشان الناس تستفيد

و معرفتش العيب غير لما قطع خالص و العربية مش عايزة تدور نهائى , مدارتش غير لما الميكانيكى ركبلى ابلتين تانى