الموضوع: تقرير مختصر عن صيانة الـ 5000 لنيسان تيدا ....

السلام عليكم
بفضل الله عملت صيانة ال 5000 للتيدا فى مركز السبع زهراء المعادى وحبيت اشارككم التجربة

1- طبعا من لم يشكر الناس لم يشكر الله ... فانا لازم اشكر المهندس كريم اسامة بمركز السبع على ذوقه واخلاقه وتعبه معايا فعلا حاجة تفرح لما تشوف الناس بتقوم بشغلها بضمير كده ...
وكمان باشكر الدينامو احمد مصطفى اللى عرفنى على المهندس كريم الف شكر يا بو حميد ...

2- وصلت على الساعة 10.30 صباحا و المهندس كريم سألنى لو فيه اى حاجة باشتكى منها علشان يبصوا عليها مع صيانة ال 5000 فقولتلو يبص على العفشة قدام بصراحة المطبات فى بلدنا حاجة تحزن ...

3- صيانة ال 5000 عبارة عن :
- تغيير زيت وفلتر علشان انا باغير زيت كل 5000 وباحط زيت شل سوبر
- فحص وتزييت وتربيط العفشة
- فحص السوائل
- ضبط هوا الكاوتش
هى تعتبر صيانة بسيطة بس فى رأيى مهمة لاسباب كتيره اهمها اكتشاف اى اعطال او مشكلات بشكل مبكر بالاضافة لتغيير الزيت اللى بيفرق جدا مع الموتور والعربية والسحب والاستهلاك ...

4- التكاليف عبارة عن :
- صيانة الـ 5000 75 جنيه
- زيت شل سوبر 3 لتر 100 جنيه
- فلتر زيت 50 جنيه
-------
الاجمالى 225 جنيه
خصم من دفتر كوبونات مركز السبع - 50 جنيه
--------
الصافى 175 جنيه

5- طبعا آخر حاجة عايز اقولها ان مركز السبع اتصل بيا بعد الصيانة بيومين علشان يعرف رايى عن الصيانة ولو فيه اى مشكلة بعد الصيانة كنوع من انواع خدمة ما بعد البيع اقصد ما بعد الصيانة واعتقد ان ده مش موجود فى مراكز او توكيلات كتير ... ودى نقطة تحسب لهم الصراحة

ارجو اكون قد افدت وتحت امركم فى اى استفسار ...