الموضوع: محدش ياخد السيراتو بتاعتى ويدينى بدلها مروحه ...!!

ممكن تكون نازل من بيتك زى الفل وكلك نشاط وحيوية وتقابل واحد صاحبك وتسلم عليه واول حاجه يقلها انت عيان ....؟
تبصله وانت مستغرب....!! لا انا تمام وزى الفل يقلك اصل باين عليك الارهاق وعنيك داخله لجوه كده .

تقوله لا ياعم انا مفيش حاجه وكله تمام تسيبه وتمشى ومتختش فى بالك ....

تروح وانت داخل العمارة يقبلك جارك اللى فى الدور التالت ...ازيك يا ... محدش بيشوفك يعنى ترد وتقول ابدا اصل الفترة اللى فاتت كان عندى شغل كتير ويروح يرد ويقول اه ما هو باين عليك انك تعبان ....
تحس وقتها انك اتخدت كده واتخضيت وتقوله الحمد لله على كل شى وتتطلع على بيتك .

اول شى تعمله انك تروح جرى على المرايا وتبص فيها وتفحص كل شى فى وشك
وتبدى تقول لنفسك ايه ده ....انا شكلى تعبان اوى وتبدى كتافك تنزل وتحس ان جسمك مش قادر تشيله وتحس ان عينك مش شايف بيها .

تدخل عليك امك ولا مراتك وانت واقف كده قدام المرايا وتستغرب وتقول مالك فى حاجه
ترد ابدا هو انا شكلى تعبان ترد عليك انت زى الفل ووشك منور وزى القمر تسال تانى يعنى انا باين عليا انى تعبان تروح راده عليك باستغرب ولهفه ....بعد الشر انت زى الفل تروح واخد نفس جامد مع تنهيده وتحس ان روحك رجعت تانى وتقول الحمد لله .

قصه حلوة صح .... بس عاوز تقولنا ايه..؟ انت فاضى يعنى ولابتتسلى وانت صايم ولا مستنى السحور ...؟!!

ياساتر هو الواحد ميعرفش يتكلم معاكو كده ويفك شويه انا هقولك ياعم

بقالى فترة كده كل ما اركب العربية احس ان فى حاجه هتحصل من كتر ما الواحد بيشوفه هنا كل شويه حد يقول الحقونى .... محتاج مساعدة ضرورى ...احزرو ...... تدخل على الموضوع من دول وتقراه وانت متلهف تلاقى ان الموضوع بسيط ومش محتاج للعنوان ده اما ترد عليه واما تقول لنفسك ياعم الموضوع مش مستاهل .

تيجى تانى يوم تركب العربية تبدى تفكر فى الموضوعات اللى قريتها وتجرب كل حاجه فى العربية ده فلان بيتكلم عن صوت طالع من هنا تبتدى تسمع متلقيش حاجه وفلان كان بيتكلم عن كذا وكذا وتحس انك بتشترى العربية من اول وجديد وبتابع كل شى بيحصل فيها وانت مترقب وملهوف احسن يكون الكلام ده بيحصل على عربيتك وانت مش واخد بالك .وتكتشف ان عربيتك تمام وزى الفل تروح واخد نفس كده كان مكتوم.

وهو انا كنت شارى العربية علشان استمتع بيها ولا اعيش فى رعب ....؟
كل يوم سؤال بساله لنفسى كتير وارجع اقول للدرجه دى انا وصلت لكده للدرجه دى بقيت بفكر كده ...... كله ضرب ضرب مافيش شتيمة

لدرجه انى ابتديت اقول لنفسى محدش ياخد السيراتو بتاعتى ويدينى بدلها مروحه .

ده اسمه الاحياء النفسى انت عربيتك تمام وزى الفل ومتخليش حد يعكر عليك متعتك مع العربية وسيب كل حاجه على الله وتاكد تماما ان ربنا مش بيعمل حاجه وحشه فى حد .

ورمضان كريم

المشاركة الأصلية كتبت بواسطة uubaby2000

تمام والله احلى كلام بجد سمعته انا كان نفسى اجيب بروتون ساجا وفضلت ورا كلام الناس لحد ماركرهت العربية وحتى البيكانتو سمعت عنها كاام كرهنى فيها والاى تن واللوجان وخلاص مش لاقية حاجة اشتريها ومش طايقة العربيات من اللى سمعته

مالها البيكانتو ؟؟؟؟؟

ابو ليلى
بطل خض فى الناس