الموضوع: عاوز معلومات عن تجارة خطوط و كروت الشحن

المشاركة الأصلية كتبت بواسطة misoalex

ممممم عاوز تاخد من الشركه وتدى تجار مممممم

معاك كام مليون يا باشا

انت كده عاوز تبقى x وده مش سهل ولا صعب هو عامل زى واحد عاوز يدخل مجلس الشعب ههههههههه

بص يا باشا الموضوع مبقاش زى زمان ولا بالسهوله الى كل الناس متخيلاها خالص خالص وفاكره ان بتوع المحمول بيجيبو فلوس من الهوا
بالعكس انت ممكن تبيع بخساره اه والله تبيع بخساره عشان خاطر البونص الى بيبقى موجود والعروض الى بتتعمل للاكسات والى يكسب بيبقى هو ده مكسبه

هو عشان تاخد كروت شحن من الشركه لازم تاخد خطوط وكل خط متحمل عليه كام كرت شحن من جميع الفئات يعنى مش كروت 10 فقط وطبعا دى الى عليها الشغل كله بس عشان تاخدها اكتر حاجه او لوحدها دى بقا محتاجه تظبيط تانى

انا مش بعقد الموضوع بس الحوار ان الى دخل السوق خلاص دخله من زمان واخد مكانه فيه ده الناس بقت تسيب السوق دلوقتى للاكسات يشبعو بيه

المهم لو انت عاوز تتاجر فى الكروت يبقى تاخد من التجار الكبار وتبيع للمحلات والتجار الصغيره وبيبقى مكسبك 1 % واقل طبعا
يعنى ال 1000 مكسبها من 10 جنيه بالكتير بس طبعا معتمد على الشغل الى حتحرقه اد ايه والسوق عامل ازاى السوق ده كل ساعه فى حال مش كل يوم يعنى السعر اول اليوم مش زى اخره بس ده فى ايام محدده

لو محتاج معلومه قول وانا افيدك على اد مقدر وفيه كمان الاخ احمد موجه هنا فى المنتدى كمان شغال فى الموضوع ده على ما اعتقد ممكن يفيدك

ميزو باشا كل عام وانت بخير رمضان كريم عليك وعلي كل اهل اسكندريه الجدعان بكرم الله

استاذ maka كل عام وانت بخير وبعوده الأيام عاوز نصيحه أخويه مدخلش المجال الده الا أذا كان

معاك مبلغ وقدره يعني مبدئيا 150 الف جنيه علشان لو بيعت بيهم كلهم في يوم واحد 1000 تطلعلك

تقريبا 2.5 جنيه بمكسب 25 قرش في كارت 100 جنيه ده بالنسبه للتاجر الجمله الكبيرx أو السوبر

ديلر اللي بياخد من الوكيل مباشرة وبكميات كبيره

شغل الكارت والهوا والخط بيكون كالتالي انت متقدرش تاخد شغل من الشركه مباشرة لأن الشركات

بتتعامل مع وكلاء مش افراد لأن الوكلاء لهم كوته اسبوعيه بتبقي بالملايين مش هيقدر عليها الأفراد

فابيبقي تعاملك مع X او السوبر ديلر وحاليا الوكلاء نزلوا مناديبهم يوزعوا للمحلات الصغيره وسعر الجمله حاليا

كارت الو 100 بسعر جمله 97 بياخده الأكس ب96.5 وبيديه لتاجر الجمله 96.75 وحضرتك

بتديه للمحلات 97 جنيه

كارت فودافون 100 جمله 98 جنيه بياخده x او السوبر ديلر 97.40 وبيديه لتاجر الجمله 97.65 جنيه وبيوزعه 98 جنيه

كارت اتصالات 97.25 وأمبارح كان 97.5 بياخده الأكس ب97 وبيطلعه 97.25 وتاجر الجمله بيطلعه 97.5 للمحلات الصغيره

الهوا والطاير بنفس الأسعار تقريبا

بالنسبه لو فاتح محل وعاوز تبقي X اولا بتتفق مع شركه من شركات الأتصالات انك تبقي موزع

معتمد وبتاخد كود عندهم وبعد ده بتتفق معاهم انك تبقي اكس فبيطلبوا منك لو محلك مش علش شارع

عمومي فيه جزيره في النص انك تاخد محل ولازم في خلا 6 اشهر يكون سحبك كل شهر حوالي 3000 خط وممكن اكتر كمان

فايدة الأكس انك بيكون ليك نسبه بتتحددها الشركه من 3 الي 6% من قيمة الشحن اللي بيتشحن علي

الخط وطبعا في ظل الخط ابو 2 و3 جنيه اللي بيشتغل اسبوع ويترمي بعدها نسبتك ضايعه يعني

بأختصار موضوع X أكبر وهم هاتوهم بيه نفسك وتعويض الشركه اللي هتدهولك علي الخطوط

يكاد يغطي الخساره اللي خسرتها في حرق الخطوط + ان الشركه بتبلغ الضرائب بأن التعويض ده

اللي هي صرفتهولك وخد بالك من الحته دية بيكون مكسب صافي ليك يعني هتتقطع يامعلم من الضرايب

حاليا دلوقتي مبقاش في حاجه اسمها بونص بقي في حاجه عملاها اتصلات اسمه بنك اتصالات كل

مارصيدك من سحب الخطوط بيزيد كل مانسبتك في النقط بتزيد وبتتحسب النقطه من جنيه الي 2 جنيه

والكروت بيتبقي لو اشتريت مثلا ب150 الف جنيه من الوكيل مباشره بينزلك 25 قرش علي كل ميه

نصيحه اخويه المجال ده خلاص مات ومحلات كتير بقت تغير نشاطها لأنه مبقاش يجيب همه وانا

واحد من الناس بفكر جديا بتغيير نشاطي لأني خسرت جامد جدا في الشغلانه دية ربنا يعوضني خير

ان شاء الله علشان كده بقولك لوضامن انك تبيع الشغل اللي هتشتريه كله في يوم واحد ويكون بمبلغ

وقدره وخد بالك ممكن المكسب يكون بالقروش 10 او 15 قرش في الميه توكل علي الله ولو مش

ضامن يبقي بلاش منها لأنها مش هتجازي معاك نهائي ده موضوع تجارة الكروت والخطوط

وربنا يوفقك

المشاركة الأصلية كتبت بواسطة misoalex

الله يكرمك يا باشا وكل عام وانت بخير وربنا يقوكم على الصيام فى جو القاهره ويتقبل منكم

انت قولت وشرحت الى انا بقوله بالتفصيل
وخصوصا ان فيه حاجات رايحه من بالى وحاجات اتغيرت لانى سيبت شغل التوزيع والمواضيع دى من 4 سنين وحاليا بطلت شغل الكروت والشحن كمان من المحل لانها بقت حاجه تقرف فعلا بجد خلاص باظت

الشغله دى كلها خلاص باظت وفيه ناس كتير فعلا غيرت النشاط وخصوصا التجار الصغيرين (انت اكيد عارف انهم بيقولو ايه على التجار الصغيرين دول مسمينهم ايه )

والاكسات عايشين دلوقتى وفاتحين محلاتهم على الشغل الى عملوه زمان وانت اكيد عارف ان ايجارات محلاتهم ومرتبات عمالهم بتدفع ليهم الشركه جزء كبير منها فمش فارقه معاهم واهم شغالين وخلاص

يلا الحمد لله على كل حال وكل عام وانت بخير

وانت بألف خير وسلامه وربنا يتقبل منا ومنكم ان شاء الله وربنا يقوينا فعلا الجو

فعلا بقي سئ جدا ولايطاق ربنا يقوينا

وفعلا ياميزو الدنيا فعلا خلاص وقعت والموضوع بقي نيله والوضع بقي من أسوأ

لأسوأ وخصوصا لما الوكلاء بقوا بينزلوا المناديب بتاعتهم توزع للمحلات الصغيره

يعني مبقاش لينا مكان نوزع فيه انا الحمد لله بقالي بتاع 6 اشهر وقفت شغل الجمله

بسبب الخساره اللي حصلتلي من شغل الخطوط حسبي الله ونعم الوكيل في اللي كان

السبب طبعا قصدي بالأكسات اللي بيحرقوا الخط ويبعوه بجنيه علشان الجوايز

الماليه اللي بتعملها الشركات وطبعا خسرت بسببهم لأن تعويضي غير تعوضهم وانا

مبحبش اخش في مواضيع المسابقات لأنها بتبقي زي القمار ياتكسب ياتخسر فطبعا

كل الخطوط اللي عندي سعرها وقع وبقت مابتتبعش الا فين وفين الحمد لله

علشان كده بقول لأستاذ maka خلي شغلك في الكارت فقط لو هتشتغل وابعد عن

شغل الخط تماما هما بيسوقوا لبيع الخط علشان بيع الكارت وده الهدف الأساسي

عندهم وعلي فكره ياميزو الشركات دلوقتي مبقتش تساعد حد من الأكسات ده كان

زمان دلوقتي بقت تديهم خطين ولا تلاته ديمو لاين وفين وفين لما تبعتلهم مبلغ في

العيد عديه او لو واحد فيهم قلهم مش شغال تاني معاكم فابتصالحه وتزودله مبلغ

النسبه او التعويض او تطلعه رحله لشرم او الغردقه

ده غير الأزمات اللي بقت بتحصل في كروت الشحن يعني من شهر تقريبا كارت

الفودافون كان ب103 جنيه جمله ووصل ل105 ولو عايزه اقل من كده لازم

تحمل عليه طاير يعني علشان تاخد 100 كارت ب10 لازم تاخد عليهم

10000 طاير ولو مش عجبكم متاخدوش شوفت الذل

علشان كده انا وتجار كتير وقفنا الشغل معاهم ويبقوا يشربوه وهو ده المفروض يبقي

النظام معاهم بعد كده انا كنت عامل موضوع قبل كده بخصوص كروت الشحن واستهبال الشركات

http://www.nilemotors.net/Nile/140759-a.html

ان شاء الله ربنا يوفقني والاقي مجال تاني احسن معلش طولت عليك كل سنه وانت

طيب وصوما مقبولا منا ومنكم ان شاء الله وبأذن الله تعالي احتمال اكون في العيد

عندكم في اسكندريه اتمني من الله عز وجل اني اشوفكم انت وشنوري ودكتور

بحري وابو رقيه مع خالص تحياتي

المشاركة الأصلية كتبت بواسطة misoalex

انا كنت زيك كده زمان فى واقع الاحداث ونقعد نحسبها من اليمين والشمال عشان تساوى نفسها ونطلع بأى مكسب
انت عارف الشركات بطلت تنزل رصيد فى الخطوط بسبب ااننا اخترعنا حوار اول متفتح تحويل الرصيد وهو نسحب الرصيد الى فى الخط ونبيع الخط ب 3 حنيه و 5 جنيه فاضى رصيد وطبا الناس اتهبلت خط ب 5 جنيه دى معجزه وطبعا الزبون مستفيد واحنا بنحرق شغل

الموضوع ده بسببه اكسات دفعت غرامات للشركه فودافون لان عرفو ان سرايل الخطوط دى طالعه من عندهم
وبعد كده الخطو ط بقت تنزل ب 5 جنيه رصيد عشان مينفعش تحولها

كنا بنشغلها مكالمات بال5 جنيه ونبيع الخط برضه برخص التراب عشان نحرق شغل
راحت الشركه بقت تنزل فى الخط 1 او 2 مش فاكر هههههههههههههههه


وكل الى قولته انا اتحطيت فيه وعارف بس اول مره اعرف ان الاكسات بطلو يوضبولهم المحلات ويدفعو جزء من الاجور بتاعه العمال زى زمان

موضوع الخطوط الديمو ده عارفه طبعا ده اتعمل معايا عشان مرديتش اعلق يفطه فودافون على محل البيطاش والمكان كان جاااااامد جدا ليهم لانه شارع عمومى كبير ومنطقه سياحيه و فضل يرصولى فى العروض وبينهم الخط عشان ادفع فاتوره الكهربا بتاعه اليفط كان ساعتها 30 جنه فى الشهر بينزلو فيه

يلا راحت الايام دى الله يرحمها واستحاله ترجع تانى

المشكله الواحد حيشتغل ايه هى دى المشكله بقالنا سنين فى المجال ده حنغيره ازاى

ههههههههه فكرتني ياميزو بالذي مضي وكلمه كنت بقولها للأستاذ ايمن نعمة الله بتاع موبنيل ولوووووووووو اعملوا اللي انتوا عايزينه وباردوا هنلاقي حل هههههههههههه
لدرجه والله العظيم كل مايعملوا حاجه علشان يقفلوها علينا يعدي عليه ويقولي هتحلوها ازاي اقوله هنعمل كده يعني لما خلوا التحويل خمسه جنيه ولازم رصيدك مايقلش عن1.5في الخط وبالتالي مفيش تحويل 3.5 كنا بنعمل ايه كنا بنحول للخط 5 جنيه تاني فيبقي الرصيد 9.80جنيه نروح محولين 8 جنيه من الخط يبقي كده احنا اخدنا 3 جنيه وال1.80 جنيه الباقيه نستخدمها مكالمات علشان تخلص بسرعه ههههههههههه
والخط يتباع فاضي وبنقل العميل طبعا ان الخط فاضي ب5 جنيه وطبعا الزبون كان مابيصدق لحد ماقفلوها علينا بالضبه والمفتاح والخط بقي عليه نص او جنيه بس وبيتباع بجنيه او 2 بسبب الأكسات وبيدفعوا في غرامات هما والوكلاء اللي بينزلولهم الخطوط ومفيش فايده مابيحرموش مصنفات فنيه وباردوا مفيش فايده وبصراحه الشركات هي اللي بتشجعهم علي كده علشان المنافسه بين الشركات وبعضها المنافسه دية اثرت علي الشركات نفسها وبدأوا يعمل المكالمات ببلاش زي ماتتصل ببلاش من اتصالات لأتصالات او موبينيل بموبينل او فودافون بفودافون وده علشان مبيدفعوش رسوم للشركه المصريه للأتصالات او للشركه المستقبله للمكالمه
وموضوع توضيب المحلات للأكس لسه موجود فعلا لحد دلوقتي وده بيبقي زي هدية الأفتتاح من الشركه للأكس او السوبر ديلر وكده كده هي من فلوسه ودفعهم وهيدفعهم
عاجلا ام آجلا ههههههههههه وخطوط الديمو اعرف صديق ليه بيجيله كل شهر خط ديمو 32 ساعه مجانا علشان النور والأيجار وغيره وهو بيتصرف فيهم بمعرفته.
انا بقالي 6 شهوروالله ياميزو بدورعلي مشروع تاني وكل مشروع لازم ادرسه صح فالاقي مش هيجازي معايا وينطوي علي احتكاك مباشر مع خفافيش الحكومه وبصراحه مبحبش احتك بيهم خالص ربنا ييسر ان شاء الله في الخطوه الجايه