الموضوع: من وحي تخرم الساعة

القاهرة -الثلاثاء 10 أغسطس - 11:45 مساءالنهاردة التوقيت هايتأخر ساعة بمناسبة شهر رمضان (وكل سنة وانتم طيبين) وزى مانتوا عارفين، الساعة دى هاترجع تانى بعد ما رمضان ما يخلص، وبعدين الساعة تتأخر تانى بعد حوالى 21 يوم...
اسئلة كتيرة الناس بتسألها، أبرزها:

ليه؟
ايه الفائدة؟
مين بيعمل كدة زينا فى العالم؟

الأسئلة دى طبعا حمضانة التنين، لأن احمد السقا جاوب على كل الأسئلة دى فى "كدة أوكيه"، والاجابة هى:

بتلاته صاغ هات زوقينى يا ماما
انترناشونال جرنال
وافتح صفحة مليون وتلتميت ألف
هاتعرف بأن الموضوع معاهم
هانى: موضوع ايه اللى معاهم؟
السقا: موضوع تخريم الساعة
هانى:(بانفعال) ايه تخريم الساعة دى؟ انت بتجيب الكلام ده منين؟
السقا:(بتأكيد): ايه يا هانى؟ انت عمرك ما سمعت عن تخريم الساعة؟
هانى: لأ انا سمعت عن تخريم عبد العزيز
السقا: لا دى بتمطر خفة النهاردة ... سلامو عليكو (يحاول أن ينصرف)
هانى: تعال خد خد ياض، ايه تخريم الساعة ده
السقا: (باندهاش) ايه ياهانى، نخرّم التوقيت ساعة لقدام، نخرًمه ساعة لورا ، عادى يعنى
هانى: (يفكر قليلاً) يكونش قصدك نأخر ونقدم الساعة؟
السقا: آاااااه انت ماعندكش خلفية ولا ايه؟
هانى: كان فيه وخلصت، خلفية ايه؟
السقا: ماهم اللى ماسكين التوقيت سموها تخريم
هانى: مين دول اللى ماسكين التوقيت؟
السقا: اللى ماسكين التوقيت .. المسئولين عن التوقيت فى مصر، هم اللى ماسكينو
هانى: طب ايه؟ جم يمسكوه خرًموه ولا ايه؟
السقا: أنت بتقول فيها؟ دول مش خرًموه، دول شخرموه
هانى: (بصوت واطى) ما فرقتش كتير (ثم بصوت أعلى) يعنى اللى ماسكين التوقيت دول عملوا ايه بالظبط؟
السقا: أقول لك يا سيدى...

زمااان .. اللى كان ماسك الساعة راجل كبير ليه هيبة اسمه الحاج جرينيتش، الراجل ده كان من الناس ال "مستقيمة" اللى عارفه أولها من آخرها، ورايحة فين وجاية منين...الراجل دة كان ماسك التوقيت بما يرضى الله
وبعدين جم ناس قالوا، طب مانلعب شوية فى الساعة علشان تستغل شوية الوقت اللى الدنيا بتكون منورة فيه علشان نشتغل فى النور؟ وبالمرة نوفر الشموع والفحم والذى منه؟ وفعلا ده حصل، ودول كتيير فى العالم طبقته...

جت مصر بقى فى التمانينات، قالت الكلام ده ماياكلش معايا، أنا ليه أمشى زى العالم ما بيمشى، أنا دولة حرة ليا سلطة حرة، فأغير الوقت زى مانا عايزة...

فمن ساعتها كل البلاد اللى بتستعمل التوقيت الصيفى تقدم الساعة فى يوم معين، انما تيجى مصر تقوللك، لأ مش النهاردة، خليها يوم تانى!
يا ستى يهديكى يرضيكى عاوزين نمشى مع بقية الدنيا... تقول لك دنية مين؟ أنا أم الدنيا...

وفعلا، الدنيا كلها كانت بتغير التوقيت فى معاد معين، نيجى احنا يكون عندنا تصور تانى خاااالص (مع الاعتذار لمحمد صبحى)

المهم كان فيه حاجة حلوة، كان فيه مبدأ ثبتنا عليه، آخر خميس فى أبريل هانقدم الساعة، وآخر خميس في سبتمبر هانقدمها، قلنا قشطة، على الأقل فيه قاعده ماشيين عليها

عدت سنه ورا التانية، وفى سنة جه أول رمضان قبل آخر خميس فى سبتمبر بكام يوم ، فراحوا اللى ماسكين الساعة قالوا "يعنى ماجتش على كام يوم، احنا نقدم الساعة بدرى أول رمضان بدل آخر خميس فى سبتمبر" ... قلنا مشيها أول رمضان، الى ماسكين الساعة يعرفوا اكتر مننا

ومن ساعتها بقى اللى ماسكين الساعة عرفوا ان كلمتهم ماشية عالكبير والصغير فصدرت القرارات التالية:

يوليو 2010 - قرار ديكتاتورى رقم 349984: بوقف العمل بالتوقيت الصيفي , وبدء العمل بالتوقيت الشتوي بتأخير التوقيت لمدة ساعة، ويستمر ذلك طوال رمضان على أن يستأنف العمل بالتوقيت الصيفي مرة أخرى بعد انتهاء رمضان, بتقديم الساعة لمدة ساعة مع بداية يوم الجمعة العاشر من سبتمبر وحتى نهاية الخميس الثلاثين من سبتمبر, ليعود العمل بالتوقيت الشتوي يوم الجمعة أول أكتوبر

يونيو 2012- قرار ديكتاتورى رقم 4299842: بتجربة العمل بالتوقيت الشتوى صيفاً والتوقيت الصيفى شتاءاً، علشان لما تمشى بالتوقيت الشتوى فى الصيف الجو يرطب كده ويبقى حلو واهو بالمرة نشوف ايه تأثير القرار ده على الانبعاث الحرارى

مايو 2014 - قرار ديكتاتورى رقم 332919333 بشرطة: بحظر استخدام التوقيت الصيفى الا فى المصايف فقط، حيث أنه لا يوجد داعى لاستخدام التوقيت الصيفى وانت مش بتصيف، وبالمثل يطبق القرار بالنسبة للتوقيت الشتوى على الاقصر وأسوان حيث انهما "مشتى"، وتحذر الدولة أهل المنيا وادفو من استخدام التوقيت الشتوى حيث انهما لا يزالا على ال "ويتينج ليست" ولسه ما طلعش قرار من اللى ماسكين المشاتى باعتبارهما مشتى هما كمان.

أغسطس 2016: قرار دكتاتورى من غير رقم: باعتبار غداً توقيت صيفى خاص ، وذلك بتأخير الساعة لمدة 3 ساعات ونص، يعنى الساعة لما تبقى 12 تخليها 9 ونص تانى، وذلك لاتاحة الفرصة للطالب محمد .ج.م. لاستذكار دروسه قبل امتحان ال ماث بتاع أولى ابتدائى بكرة.
(لاحظ ان القرار صادر فى أغسطس)

يناير 2018:قرار سنغافورى رقم 87473222: بفرض التوقيت الصيفى على أيام 27 يناير2018 و 14 فبراير 2018 والذى ستقام فيهما مبارتى الذهاب والعودة بين مصر والجزائر فى تصفيات كأس العالم2018 وذلك علشان اليوم يبقى طويل شوية الشعب المصرى يصحى بدرى ويقعد يدعي لمنتخب مصر ويلحق يدعي على الجزائر

أبريل 2030- قرار ديكتاتورى رقم 999999999: بطرح "توقيت مصر" للخصخصة فى مزاد عام ،وسيتم عقد جلسة مظاريف مغلقة لتلقى مزايدات توكيل "توقيت مصر" وسيتم بيعة لأعلى سعر

مايو 2030- قرار ديكتاتورى رقم 2: (بعد تصفير العداد الشهر اللى فات) باسناد ادارة "توقيت مصر" لشركة "عز الدقيقة" للاستثمارات التوقيتية

يونيو 2030: اعلان دعائي عزاوى رقم 1:
ساعات عزو... اللى عاوز يعرف الساعة كام، لو بص فى ايده هانغزوا...
عاوز تعرف التوقيت، تيجى يشترى مننا ساعات عزو ، المتضمنه التوقيت الخريفى والربيعى والرمضانى والمناسباتى
، وأيضا التوقيت المقلم والمشجر والبيير كاردان
ساعات عزو مزودة أيضا بتوقيت للكبار فقط تم مراعاة زيادة عدد ساعات الليل فيه علشان تدخل حفلة الميد نايت 3 مرات فى يوم واحد
ساعات عزو أيضا بها ترجمة فورية للتاريخ، حيث أننا الآن متأخرون عن العالم حولنا بشهر و3 أيام وتلات ساعات ونص (الله يسامحك يا محمد يا جمال) فالساعة بها جهازGTS - Global timing systemلضبط التزامن مع العالم الخارجى،
بساعات عزو ممكن تعرف المعلومة اللى ماحدش فى البلد هايكون عارفها غيرنا
..الساعة كام دلوقتى؟

وايضا سيتم استخدام مصطلح "تخريم الساعة" بدلا من مصطلحىً تقديم وتأخير الساعة حيث أن التقديم والتأخير ليهم معنى والناس ممكن تستنتج منهم الساعة كام، انما التخريم هو نظام عشوائى ديناميكى يقوم بتغيير الساعة على حسب معطيات ومدخلات ومخرجات ومعدات كثيرة جداً ... فماتستغربش لو الساعة عشرة بالليل وتقول لواحد صاحبك "نتقابل كمان ساعة على 5 ونص كدة"
هذا هو الجديد فى عالم التخريم... ساعات عزو
(هانى: ده أنا نسيت ان الموضوع كان على.... اللى ماسكين الساعة)


القاهرة -الثلاثاء 11 أغسطس - 11:30 مساء
بعد 45 دقيقة منذ بداية الكتابة!

منقول
http://www.facebook.com/#!/notes/john-seleem/mn-why-tkhrym-alsat/141842842514431

موضوع رائع

ومتنساش كمان احتمال يطلع لنا التوقيت الربيعى والخريفى ودول بتمشى فيهم الساعة لورا مش لقدام

أما اقتراحى فهو توقيت مستقل لكل محافظة