الموضوع: السنه دي مش هانبعت رسائل في العيد. السنه دي هانتبرع وهانخلي طفل يتيم أو فقير يبقى سعي

السلام عليكم ورحمة الله وبركاته،،،




كل سنه وإنتم طيبين يا جماعه:


أنا جاتلي فكره هي إننا بدل ما نبعت رسائل تهنئه في العيد نتبرع بفلوس الرسائل دية ونجيب بيها لبس جديد للأطفال الفقراء واليتامى عشان هم كمان يحسوا بفرحة العيد.

أنا عملت جروب على الفيسبوك، وده الرابط بتاعها:

السنه دي مش هانبعت رسائل في العيد. هانتبرع وهانخلي طفل فقير يبقى سعيد





وده وصف الجروب:

السنه دي مش هانبعت رسائل في العيد. السنه دي هانتبرع وهانخلي طفل يتيم أو فقير يبقى سعيد

فاكرين لما كنا صغيرين فرحتنا بلبس العيد؟ فاكر لما كنت تنام ليلة العيد ولبس العيد في حضنك ومستني الصبح يطلع عشان تصحى وتلبس لبس العيد؟

فاكره قد إيه كنتي بتبقي فرحانه وانتي لابسه اللبس الجديد وعامله شعرك عند الكوافير؟

فاكر قد إيه كنت بتبقى زعلان وتعيط لو ما لقيتش لبس العيد اللي إنت كنت عاوزه؟

ولا فاكره لما كان لبس العيد يتقطع ولا يقع عليه حاجه كنتي بتبقي زعلانه إزاي؟

تخيل بقى إن في ملايين الأطفال عمرهم ما جالهم لبس العيد وعمرهم أصلاً ما لبسوا لبس جديد.

ومعتمدين على اللبس القديم اللي بيجيلهم تبرع وهم وحظهم بقى، ولا بيختاروا لون ولا شكل ولا مقاس.

عشان كده إحنا لازم نفرح الأطفال دول ونجيبلهم لبس العيد، من حقهم هم كمان يفرحوا في العيد.

كل اللي إحنا عوزين نعمله هو إننا نوفر تمن رسائل المحمول اللي بنبعتها في العيد ونتبرع بيها لشراء لبس العيد للأطفال الفقراء واليتامى.

تعالوا نحسب إحنا بنتكلف كام كل سنه عشان نبعت الرسائل دية:

الرساله بـ 30 قرش

والرساله الدولي لأي حته بره مصر بـ 80 قرش

والرساله لما بتكون مكتوبه بالعربي غالباً بتاخد أكتر من رساله واحده، يعني الرساله الواحده هاتتكلف ما بين 60 قرش لـ 90 قرش لو محلي وهاتتكلف ما بين 160 قرش لـ 240 قرش لو رساله دولي.

لو إنت بعت رسائل لـ 25 شخص بس منهم 5 بره مصر هاتتكلف في المتوسط ما بين 25 لـ 30 جنيه.

وده في حالة لو بعت لـ 25 شخص بس ومعظمنا بيبعت أكتر من كده بكتير.

في إحصائيه بتقول إن المصريين بعتوا رسائل تهنئه في عيد الفطر سنة 2007 بـأكثر من 2 مليون دولار. الكلام ده كان سنة 2007 وكان عدد الناس اللي معاهم محمول تقريباً نصف الناس اللي معاهم دلوقت. يعني متوقع السنه دية نبعت رسائل بـ 5 مليون دولا مثلاً.

طيب لو قررنا ما نبعتش رسائل ونوفر فلوسنا عشان نتبرع بيها للأطفال إزاي نعيد على الناس؟

ممكن نكتبلهم على الفيسبوك ودية وسيله سهله ورخيصه واللي هاتكتبه هايكون نابع من قلبك ومكتوب بأسلوبك مش زي رسائل المحمول اللي بتكون غالباً عباره عن أي كلام مقولب وخلاص مكتوب بس بشرط إنه يكون ليه سجع. أنا شخصياً عملت كده في أول رمضان وأصحابي فرحوا وكلهم ردوا علي بنفس الطريقه وماحدش قال لي مثلاً إني بخيل عشان ما بعتلهمش رسائل.

ممكن برضه تكلم قرايبك و أصحابك المقربين اللي إنت شايف إن مش كفايه تكتبلهم على الفيسبوك أو اللي ماعندهمش فيسبوك وتعيد عليهم بدل ما تبعت رسائل، خاصة إن سعر الدقيقة بقى أرخص من سعر الرساله، وأكيد اللي هاتقوله في دقيقه هايبقى أكتر من اللي هاتقوله في رساله وهايكون وقعه أفضل عليهم.

وطبعاً لا بد من صلة الرحم وزيارة الأقارب وعدم الاكتفاء بإرسال رسالة محمول سخيفه.

نيجي دلوقت لكيفية التبرع:

طبعاً كل واحد مننا أدري بظروف الناس اللي حواليه اللي ممكن يكونوا محتاجين للتبرع ده:

يعني أكيد لو إنت شايف إن في بواب جنب بيتك غلبان أوي وولاده على طول لابسين لبس قديم ومقطع يبقى أكيد ولاد البواب دول يستحقوا التبرع.

وفي جمعيات خيريه وجوامع بيلموا عشان يشتروا لبس جديد وبيلموا اللبس المستعمل النظيف عشان يوزعوه. أكيد في كل منطقه هاتلاقوا جمعيه من دول.

وفي برضه جمعيات خيريه كبيره أكيد زي جمعية رساله وجمعية الأورمان.

الجروب ده مفتوح لكل الناس واللي عنده مكان بيقبل التبرعات أكيد هايقولنا. واللي عنده أفكار وإقتراحات برضه يا ريت ما يبخلش علينا.

يا ريت تدعوا أصدقائكم للجروب عشان نوجه إنتباه الناس للفكره دية، أو على الأقل تشرحوا الفكره دية للناس.


إيه رأيكم؟

يا جماعه هدف الفكره مش إن إحنا نبطل نهني بعض

طبعاً موضوع التهنئه ده منفصل عن موضوع التبرع.

الفكره دية ليها هدفين:

-توفير فلوسي والبعد عن السفه وإستبدال طريقة التهنئه برسائل المحمول بطرق أخرى أفضل وأكثر توفيراً، ومش معنى إن أنا معايا فلوس و الحمد لله إني أبذرها بدون حساب.

-إستخدام ما تم توفيره لزيادة التبرعات للخير. يعني مثلاً ممكن تقول أنا وفرت خمسين جنيه بسبب الفكره دية وهي كده كده كانت طالعه من ذمتي وعشان كده أنا هازود الخمسين جنيه دية على الفلوس اللي كنت ناوي أتبرع بيها في رمضان وممكن أخصصها لشراء لبس العيد لطفل فقير أو لأي فكره تانيه.

أيهم أفضل:

1- تجيلك نفس الرساله المكرره 10 مرات في نفس العيد من نوعية "قبل الزحمه وتقطيع اللحمه وتوليع الفحمه".
2-واحد يكتبلك على الفيسبوك "كل سنه وانت طيب يا محمد عيد سعيد عليك وعلى الأولاد".
3-واحد صاحبك يتصل بيك يعيد عليك ويسأل على أخبارك.

أنا شخصياً السنه دي فضلت الإختيار الثاني والثالث ودية وجهة نظري.

أنا عاوزكم تقرأوا الخبر ده : http://www.alarabiya.net/articles/2007/09/21/39402.html

وتركزوا على الجزء ده:

مجلة "المصور" الحكومية نقلت الجمعة 21-9-2007 عن علماء إجتماع أن رسائل التهاني عبر الجوال تؤثر بالسلب على العلاقات الاجتماعية لأنها تلغي الاتصال والزيارات الحميمية المباشرة، وتضعف صلة الرحم، وأرجعوا زيادتها لزيادة ضغوط الحياة وزيادة الاكتئاب الذي يؤثر علي قلة الحركة والتواصل، ما يجعل رسالة الجوال في نهاية الأمر هي البديل للتواصل الانساني.